Nɔnaar daka la bɛ Filistia dim tɛɛnsin
5
1 Filistia dim la da faaɛn Wina'am Nɔnaar Daka la, ba da nɔki li yi Ebɛnɛza keŋ Asdod teŋin. 2 Ba da zi daka la keŋ kpɛn'ɛsi ba ba'ar linɛ ka ba buon Dagon la dɔɔgin zi'eli kpi'el ba'ar la. 3 Bɛogʋ da nie la, ka Asdod dim yina nyɛɛ ba ba'ar linɛ buon Dagon la luu vanbin Zugsɔb Nɔnaar Daka la tuon. Ka ba duoe li, 4 amaa bɛogʋ da lɛn nie la, ba yina nyɛnɛ ba ba'ar la lɛn luu vanb Zugsɔb Nɔnaar Daka la tuon ya'as, ka o zug nɛ nu'us la kɔɔ dig za'anɔɔrin la, ka o niŋgbiŋ la ma'aa kpɛlim zi'e. 5 Linzug lin yi saŋkanɛ ti paae zina Dagon maanmaan, bɛɛ onɛ kpɛn'ɛd ba'ar la dɔɔgin wʋsa, pʋ nɔɔd za'anɔɔrin la.6 Zugsɔb la sʋnf da pʋ malis nɛ Asdod teŋ nidib la nɛ zin'ibanɛ wʋsa kpi'e teŋ la. Ka o kɛ ka ba nyɛ san'auŋ nɛ tɔɔg ka natiŋkpi'emis gban'e ba. 7 Asdod dimi da nyɛ linɛ maan la, ka yɛl taaba ye, “Israel dim teŋgban daka la pʋ nar ye li bɛ nɛ ti kpɛla, bɔzugɔ li kɛnɛ ka Zugsɔb la sʋnf duod nɛ ti nɛ Dagon onɛ aan ti ba'ar la wʋsa.” 8 Linzug ba da buol Filistia dim teŋ sʋ'ʋdib la wʋsa la'as ka bu'osi ba ye, “Ti na niŋ wala nɛ Israel dim teŋgban daka la?” Ka ba lɛbis ye, “Yisiminɛ li mɔri keŋ Gaf teŋin.” Ka ba sid yis Israel Wina'am Nɔnaar Daka la. 9 Amaa ban da yisi mɔri keŋ paae ani la, Zugsɔb la sʋnf da duoe nɛ teŋ la dim, ka o kɛ ka dabiem tita'ar kpɛn' ba. O da kɛ ka natiŋkpi'emis gban'e teŋ la nidib wʋsa, dasam nɛ bʋnkʋt wʋsa. 10 Dinzug ba da zaŋ Wina'am Nɔnaar Daka la keŋ Ekron teŋin. Nɔnaar daka la da kpɛn'ɛd Ekron la, Ekron nidib da kaas kuŋʋ yɛt ye, “Ba mɔr Israel dim teŋgban daka la giligi paae kpɛla na ye ba kʋ tinam nɛ ti nidib la wʋsa.” 11 Dinzug, ba da buol Filistia dim teŋ sʋ'ʋdib la wʋsa la'as ka yɛli ba ye, “Mɔri Israel teŋ dim win daka la lɛbisi li zin'igin, ya'a ka' ala li na kʋ tinam nɛ ti nidib la wʋsa!” Bɔzugɔ, kum da kʋʋd nɛ zin'ig wʋsa ka dabiem kpɛn' ba, ka Zugsɔb la sʋnf da duoe ka o namisi ba hali. 12 Banɛ da pʋ kpi la, natiŋkpi'emis da mɔdi ba, ka ba kaasid yɔɔg-yɔɔg.