Filistia dim faaɛn nɔnaar daka la
4
1 Samuel da pian'adi tisid Israel dim wʋsa ka ba kɛlisid o pian'ad. Saŋa da paae ya ye Israel dim la yii keŋ zab nɛ Filistia dim la. Israel dim la da la'as nɛ zin'ikanɛ ka ba buon ye Ebɛnɛza, ka Filistia dim la mɛ la'as taaba Afek teŋin. 2 Filistia dim la da ti'ebi tʋ'ʋs Israel dim la, ka zaba la da mu'oe la, Filistia dim la da nyaŋ Israel dim ka kʋʋ ba nidib tusa anaasi. 3 Zabzabidib la da lɛbi ba gbɛɛnb zin'igin ka Israel kpɛɛmnam la kena bu'os ye, “Bɔɔ kɛ ka Zugsɔb la basi ti ka ti dataas Filistia dim la nyaŋi ti zina wala? Kɛlli ka ti nɔki Zugsɔb la Nɔnaar Daka la yi Siilo kena ka li na faaɛn ti yisi ti dataas la nu'usin.” 4 Dinzug ba da tʋm nidib Siilo ka ba mɔr Zugsɔb Onɛ an Paŋtita'ar Sɔb ka zin' Kerubnama ayi' la teŋsʋk Nɔnaar Daka la zug na. Ka Eli biis ayi' la, Hofini nɛ Finehas da bɛɛ ani nɛ Wina'am Nɔnaar Daka la.5 Ban da zi Zugsɔb Nɔnaar Daka la paae la'asʋg zin'igin na la, Israel dim wʋsa da maal vuud pamm ka teŋ la mi'im. 6 Filistia dim la wʋm vuud la ka bu'os taaba ye, “Bɔ vuudi la yit Hibiru dim la'asʋg zin'igin la na?” Ban ti baŋ ye Zugsɔb Nɔnaar Daka la paae la'asʋg zin'igin la, 7 dabiem da kpɛn' Filistia dim la ka ba yɛt ye, “Yɛl paae ti! Israel dim teŋgbana la kena bɛɛ ba san'an. Ti nan zi' nyɛ nɛ'ɛɛ. 8 Li na tɔi tisi ti. Anɔ'ɔnɛ na faaɛn ti yi teŋgban kpi'ema nwa nu'usinɛ? Teŋgban banɛ da kɛ ka ban'anyalima gban'e Egipt dim pipirigin la. 9 Filistia dima gʋdigimini ya mɛŋ! Aaɛn dap, ya'a ka' ala Hibiru dim la na sʋ'oe ya wʋʋ yanamɛ da sʋ'oe ba si'em la. Kpɛ'ɛŋimini ya mɛŋ, ka zabi!” 10 Alazugɔ Filistia dim la da zabi nyaŋ Israel dim la, ka ba wʋsa zɔɔ lɛbi kuli ba yaan. Ban da kʋ ninsieba da ka' bi'elaa. Israel dim la da kɔ'ɔŋi ba zabzabidib tusa pistan'. 11 Filistia dim da faaɛn Wina'am Nɔnaar Daka la, ka Eli biis ayi' la, Hofini nɛ Finehas mɛ kpi.
Eli kum yɛla
12 Daakan nɔɔ ka Benjamin nid yi zab bɔn'ɔgin la na aans o fuud ka bug o zug nɛ titan sʋnsa'aŋ zug. Ka o duoe zɔɔ keŋ Siilo. 13 On da zɔɔ paae na la, ka Eli zin' o kʋk zug suor kpikpɛŋi gɔsid, bɔzugɔ o ya'am da ian'adnɛ Wina'am Nɔnaar Daka la yɛla. Dau la paae tempʋʋgin la naa yɛl linɛ maal la, ka teŋ la wʋsa da suak nɛ kaasig. 14 Eli da wʋm la ka bu'os ye, “Nɛ' gbin an bɔ?” Ka dau la zɔ tɔ' keŋ Eli san'an. 15 Saŋkan la Eli da anɛ yʋma piswai nɛ anii ka o nini pʋ lɛn nyɛt sʋ'ʋŋaa. 16 Ka dau la yɛl Eli ye, “Man nan yinɛ zaba zin'igin la zina zɔɔ paae na.” Ka Eli bu'os ye, “M biiga, bɔɔ maalɛ?” 17 Ka dau kanɛ mɔr labaar la na yɛl ye, “Israel dim zɔnɛ ka Filistia dim la kʋ soogianam la bɛdegʋ. Fʋ biis ayi' la, Hofini nɛ Finehas mɛ kpiya. Filistia dim faaɛn Wina'am Nɔnaar Daka la gaad.” 18 On yɛl ye ba faaɛn Wina'am Nɔnaar Daka la, ka Eli kpɛn bik nɛ kʋk la li azampɛ'ɛl Siilo teŋ la za'anɔɔr la baba. Ka o niŋgɔɔnr kɔ'ɔg ka o kpi, bɔzugɔ o da anɛ bʋnkʋdʋg ka an nintɛbisʋg. O da an Israel dim tuongat nɛ yʋma pisnaasi.
19 O bipu'a onɛ an Finehas pu'a la da mɔri pʋʋg. Ka on wʋm labaar la ye Filistia dim faaɛn Wina'am Nɔnaar Daka ka o sid nɛ o dayaandau mɛ kpi la, o da sa'ae nɛ kpi'emis ka du'am la zabir da wʋm o hali. 20 On da bɔɔd kum la ka pu'adu'asnam la yɛl o ye, “Da kɛ ka yɛla la kʋʋ fʋ giinlaa; gɔsima, fʋ du'a nɛ biribiŋ.” Amaa o da pʋ ya'ae o nɔɔr bɛɛ kɛlis ban yɛt si'el la. 21 Ka o pʋd biig la yʋ'ʋr ye, Ikabod.a Ka yɛl ye, “Israel girima gaadya;” bɔzugɔ ba faaɛn Wina'am Nɔnaar Daka la, ka o sid nɛ o dayaandau mɛ kpi. 22 Dinzug ka o ye, “Israel girima gaadya, bɔzugɔ ba faaɛn Wina'am Nɔnaar Daka la.”