Zugsɔb la buol Samuel
3
1 Samuel da bɛnɛ Eli san'anɛ tʋm Zugsɔb la tʋʋma. Saŋkan la Zugsɔb labaar la da pʋ lɛn ken o nidibin la nwɛnɛ lin nar si'em, ka ba mɛ pʋ lɛn nyɛt Wina'am nɛɛsim. 2-3 Saŋkan la Eli nini da pʋ lɛn nyɛt sʋ'ʋŋa. Yʋ'ʋŋ yinne ka Zugsɔb Pʋ'ʋsim Sʋgʋr fitir bugum la nam pʋ kpiigɛ, ka Eli da digi o dig zin'ig ka Samuel mɛ da dig Pʋ'ʋsim Sʋgʋrin la kpi'e Wina'am Nɔnaar Daka la baba. 4 Ka Zugsɔb la buol Samuel ka o siak ye, “Wooi!” 5 Ka zɔɔ keŋ Eli san'anɛ yɛl ye, “Manɛ nwa, fʋnɛ buolɛɛ?” Ka Eli lɛbis o ye, “Mam pʋ buolɛ; lɛm digin!” Ka o sid lɛbi digin. 6 Ka Zugsɔb la buol ya'as ye, “Samuel!” Ka Samuel duoe keŋ Eli san'anɛ yɛl o ye, “Manɛ nwa, fʋ buolim nɛɛ?” Eli lɛbis o ye, “M biiga, mam pʋ buolɛ, lɛm digin!” 7 Saŋkan la Samuel da nan zi' Zugsɔb la, ka o mɛ da nan zi' nie o labaar la tis o. 8 Zugsɔb la da lɛm buol Samuel n pɛ'ɛs nɔɔra atan' ka Samuel duoe keŋ Eli san'anɛ yɛl o ye, “Manɛ nwa, fʋnɛ buolɛɛ?” Ani ka Eli yʋ'ʋn baŋ ye li anɛ Zugsɔb la buon biig la. 9 Alazugɔ Eli da yɛl Samuel ye, “Kem digin ka o ya'a lɛm buol ya'as, fʋn on yɛlim ye, ‘Zugsɔba, pian'am ka man onɛ aan fʋ sankpan'as la kɛlisid.’ ” Ka Samuel sid lɛbi o dig zin'igin la digin. 10 Zugsɔb la da lɛn sig na nɛ o girima buon nwɛnɛ on da dɛŋi buol si'em la ye, “Samuel! Samuel!” Ka Samuel siak ka ye, “Pian'am ka man onɛ aan fʋ sankpan'as la kɛlisid.” 11 Ka Zugsɔb la yɛl Samuel ye, “Gɔsima, m bɔɔd ye m maal si'el Israel dim san'an ka li lidig onɛ wʋsa wʋm. 12 Di daar ya'a paae, man daa yɛl ye tɔɔg na kɛn Eli nɛ o zak dim wʋsa zugin la na niŋ amɛŋa din yii li pin'ilʋgʋn ken paae li bɛn. 13 Bɔzugɔ m da yɛl o ye m na kadi o zak la saria saŋa linɛ ka' bɛnnɛ, tʋʋmbɛ'ɛd kanɛ ka o mɛŋ mi' li yɛla la zug; o biis la tʋm nɛ linɛ an bɛ'ɛd ka o pʋ nyaŋi gu'oe baa. 14 Alazugɔ, m pɔnɛ tis Eli zak la ye, ‘Maan si'a bɛɛ suguru sɔsʋg kae na nyaŋi yis taal linɛ bɛɛ ani la.’ ”15 Samuel da digin ka bɛog nie ka o duoe yɔ'ɔg Zugsɔb la Pʋ'ʋsim Sʋgʋr la za'anɔya. O da zɔti dabiem nɛ on na yɛl Eli Wina'am nie si'eli pa'al o la. 16 Amaa Eli da buol o yɛl ye, “M biig Samuel!” Ka Samuel siak ye, “Manɛ nwa!” 17 Ka Eli bu'os o ye, “Bɔ ka o sa yɛli fɔ? Da su'adi ma! Fʋ ya'a su'a on yɛlif si'el la wʋsa nɛ mam, Wina'am kʋ kɛɛ fɔ.” 18 Samuel da yɛl o si'el wʋsa, ka pʋ su'aa. Ka Eli lɛbis ye, “Onɛ an Zugsɔb la; kɛl ka o tʋm linɛ ka o gɔs ka li nar la.”
19 Samuel n da nɔbigid la ka Zugsɔb la bɛ nɛ o, ka kɛ ka on kaanb si'el la wʋsa pʋ li teŋa. 20 Lin da zaŋ Israel dim wʋsa, pin'il Dan keŋ paae Beerseba, da siak ye Samuel sid anɛ Zugsɔb la nɔdi'es. 21 Zugsɔb la da pʋ gu'oe ka kpɛn ken tuonnɛ nɛɛn o mɛŋ Siilo, ani mɛn ka o da nɛɛn o mɛŋi pa'an Samuel o pian'ad pʋʋgin.