Hanna winsɔsʋg
2
1 Ka Hanna pʋ'ʋs Zugsɔb la yɛt ye,“M sʋnf malis nɛ Zugsɔb la.
M mɛ tun'e duoe m zug agɔla yʋ'ʋs.
M nɔɔr mɛ yʋ'ʋn kpi'emi m dataas tuon
bɔzugɔ m pʋʋg pie Zugsɔb faangir la yɛla.
2 Sɔ' kae an kasi wʋʋ Zugsɔb la,
sɔ' lɛn kae nwɛnɛ fɔ;
Tampinkpi'euŋ kae nwɛnɛ ti Wina'am la.
3 Da pian'ad nɛ nyɛɛsim saŋa wʋsaa,
bɛɛ kɛ ka tita'alim pian'ad yiti ya nɔya nii.
Zugsɔb Wina'am la an onɛ mi' si'el wʋsa.
Onɛ mɛ makid sɔ' wʋsa tʋʋma.
4 Zabzabidib la tiraad wʋsa kɔya,
amaa banɛ tadig la paam kpi'euŋʋ o san'an.
5 Banɛ da diti tigid la yʋ'ʋn kuosidi ba mɛŋ nɛ diib yɛla.
Amaa banɛ ka kɔ'ɔm da mɔri ba la yʋ'ʋn tignɛ.
Pu'a kanɛ da an kʋndu'ar la du'a biis ayɔpɔi;
amaa pu'a kanɛ da mɔr biis bɛdegʋ la yʋ'ʋn zin'inɛ zaalim.
6 Zugsɔb la tun'e zi kum na, ka lɛn tun'e mɔr vʋm na.
O tun'e sigis sɔ' yaʋgʋn ka lɛn vʋ'ʋg o.
7 Zugsɔb la tun'e kɛ ka nɔŋ bɛɛ arezak kena.
O tun'e sief ka lɛn dʋ'ʋsif
8 onɛ ʋkid nɔŋ dim saazug,
ka banɛ ka' si'el la mɛ paam si'el;
ka kɛt ka ba nyaŋidi zin'inid nɛ na'abiis.
Zugsɔb la sʋ'oe dunia ɛɛnbir wʋsa,
ka nɔk teŋgbauŋ la sʋn'ʋli li zug.
9 O na gur banɛ ka o gaŋ la,
amaa bugusnam na an baanlimm likin.
Sɔ' zi' nyaŋ nɛ o mɛŋ paŋa.
10 Banɛ ki'is Zugsɔb la na lieb zaalim,
o na naan arezana nii zab nɛ ba;
Zugsɔb la na kad saria ti paae dunia bɛn wʋsa.
O na tis o na'ab la kpi'euŋ,
o na gaŋ o ka dʋ'ʋs o yʋ'ʋr agɔla.”
11 Ka Elkana lɛbi kul Rama teŋin, amaa biig la da kpɛlim Eli onɛ an maanmaan kpɛɛm la san'anɛ tʋmmi tisid Wina'am.
Eli bibɛ'ɛdnam la yɛla
12 Eli biis la da anɛ bibɛ'ɛdnam. Ba ba'a da kae nɛ Zugsɔb la. 13 Saŋkan la, maanmaannib la da niŋid nidib la si'em anɛ ye ba ya'a maal maan ka dʋg ni'im la ka li nam bɛ dʋkʋn, onɛ sʋŋid maanmaan la na nɔk dakanɛ an yiriba atan' 14 kʋns dʋk la pʋʋgin ka lin kʋnsi gban'e ni'im si'a wʋsa la ka ba yaae, ka li an maanmaan kpɛɛm la din. Anwa ka ba da maan Israel dim banɛ ken Siilo na maan maana la wʋsa. 15 Hali ba ya'a da ye ba nyu'oe ni'im kpaam la, onɛ sʋŋid maanmaan la na kena yɛl onɛ ye o maal maan la ye, “Tisim maanmaan la ni'im ka o sɛn'; o kʋ siaki di'e ni'im dʋgidaa fʋ san'anɛ asɛɛ ni'im kansa.” 16 O sɔb ya'a ye, “Kɛl ka ti naae malʋŋ bʋn la yiiga ka fʋ nyaan nɔk linɛ ka fʋ bɔɔd,” onɛ sʋŋid maanmaan la na lɛbis ye, “Ayei tisim nannanna, ya'a ka' alaa, m na nɔk nɛ paŋ!” 17 Zugsɔb la da nyɛ dasam la niŋid si'em la ka li anɛ tʋʋmbɛ'ɛd tita'ar, bɔzugɔ ba da pʋ tisid maan kanɛ nyu'od bugum la girima.
Samuel bɛ Siilo
18 Amaa Samuel da anɛ biig ka yɛ dansiki bɛ Wina'am tuonnɛ tʋmmi o tʋʋma. 19 Yʋʋm wʋsa o ma da sɛɛnd nɛ dansik ka on nɛ o sid ya'a ti keŋ ye ba maal yʋʋm-yʋʋm maan la ka o mɔri keŋ tis Samuel. 20 Yʋʋm wʋsa Eli da kaanbidnɛ kaanb sʋŋʋ tisid Elkana nɛ o pu'a la yɛt ye, “Zugsɔb la na tisi ya biig ka o lɛdig onɛ ka ya da sɔs ka o tisi ya ka ya lɛbisi tis o ye o tʋm o tʋʋma la.” Ka ba nyaan kul. 21 Zugsɔb la da zɔ Hanna nimbaanlig ka kɛ ka o du'a biribis atan' nɛ bipumis ayi'. Samuel on da bɛnɛ Pʋ'ʋsim Sʋgʋrin la ti bi' Zugsɔb la tuon. 22 Eli da yʋ'ʋn lɛbignɛ bʋnkʋdʋg, ka mɛ wʋmi o biis la maan Israel dim la si'em. Ba da dig nɛ pu'a banɛ tʋm Pʋ'ʋsim Sʋgʋr la za'anɔɔrin la. 23 Ka o bu'osi ba ye, “Bɔ ka ya tʋm tʋʋm banɛ? M wʋm nidib la pian'adi ya tʋʋmyɔɔd la yɛla. 24 Ayei, m biisɛ; mam wʋm labasieba Zugsɔb la nidibin zaŋi kɛnɛ ya yɛla la ka' sʋm! 25 Ninsaal ya'a tʋmmi o ninsaal tiraan taal, Wina'am tun'e nwɛ' nu'ugʋ tis o; amaa ninsaal ya'a tʋm Zugsɔb la taalɛ, anɔ'ɔnɛ na nwɛ' nu'ugʋ tis o?” Amaa biis la da pʋ kɛlisi ba saam la sa'alʋgɔ, bɔzugɔ li da anɛ Wina'am mɛŋ bɔɔdim ye o kɛ ka ba kpi. 26 Samuel da nan kpɛn nɔbigid nɛ niŋgbiŋ, ka Zugsɔb la nɛ nidib wʋsa nɔŋ o yɛla.
Eli yidim la yɛla nie paalʋ
27 Saŋkan ka Zugsɔb la da tʋm Wina'am tʋmtʋm Eli san'an na yɛl o ye, “Zugsɔb la yɛl si'eli nwa: ‘Ka' manɛ da nie m mɛŋi pa'ali fʋ saam yidim ban da nam bɛ Egipt Faaro nu'usin laa? 28 Manɛ da gaŋi fʋ saamme yis Israel buudi wʋsa ni ye o aan m maanmaan, ka kennɛ m maan daka la ni na nyu'od bʋnnyubisa. Ka yɛɛd maanmaan dansik la m tuon. M mɛ lɛn nɔk maan banɛ nyu'od bugum la wʋsa tisi fʋ saam yidim. 29 Bɔzug ka ya nɛ'ɛsi m maana nɛ piinbanɛ ka m ye ya zaŋi niŋi m Pʋ'ʋsim Yin zin'ikanɛ ka ba maan maana la. Bɔ ka fʋ tisidi fʋ biis la girima gat mam ka gaansid ni'im sʋma Israel dim banɛ kenna maan maana la san'anɛ ɔnbidi nɔbɛda?’
30 “Alazug, Zugsɔb onɛ an Israel Wina'am la, yɛli ya nyain ye, ‘Manɛ da kaanb ye fʋn nɛ fʋ saam tuŋ la wʋsa na an maanmaannib yʋma linɛ ka' bɛnnɛ.’ Amaa Zugsɔb la lɛn yɛl ye kpan-kpan: ‘Banɛ na'asid man la m mɛ na na'asi ba, amaa banɛ ki'is mam la m mɛ na ki'isi ba. 31 Gɔsima, saŋa kenna ka man na nwaae fʋn nɛ fʋ saam zak la paŋ giŋa, ka dau baa yinne kʋ kʋdig ka o zug pɛligɛ. 32 Ka ya na paam mugusʋg man san'an, la'am nɛ man na tʋm sʋ'ʋm tis Israel buudi la, yanam zak la sɔ' kʋ maligim lieb bʋnkʋdʋgɔ. 33 Onɛ yii fʋ zakin, ka m pʋ kad o maan daka la tʋʋma nii, o sɔb na bɛ amaa o tʋʋma na kɛ ka fʋ kaasid saŋa wʋsa ka ya ninta'am kɛ ka ya pʋ nyɛta ka nwɛnɛ zinzɔɔs nɛ. Ka kɛ ka fʋ sʋnf san'am ka fʋ yaas wʋsa na kpi kum kansa.
34 “ ‘Dina na pa'al ye man yɛl si'el la na niŋa ala; fʋ biis ayi', Hofini nɛ Finehas na kpi daar yinne. 35 Mam mɛŋ na gaŋ maanmaan onɛ na an sida sɔb, onɛ na tʋm wʋʋ man gban'e si'em m pʋtɛn'ɛrin nɛ m sʋnfʋn la. M na maal o sɔb yir sʋ'ʋŋa ka on sɔb na tʋm nɛ na'akanɛ ka m gaŋ la saŋa wʋsa. 36 Ka banɛ wʋsa yʋ'ʋn kpɛlimi fʋ zakin la na kenna igini o tuonnɛ sɔs anzurifa nɛ bodobodo zɔris ka bɛllim ye, “Gaŋimi ti ka ti sʋŋid maanmaan la ka paamid diibi dit.” ’ ”