Yiiga Samuel
Samuel du'am yɛla
1
1 Dau sɔ' da bɛ Ramataim teŋin an Zuf dɔɔg nidi yi kʋkʋna teŋ kanɛ yʋ'ʋri buon Efiram la, ka o yʋ'ʋr buon Elkana. O da anɛ Jeroham biig ka Jeroham mɛ an Elihu biig ka Elihu mɛ an Tohu biig ka Tohu mɛ an Zuf onɛ yi Efiram dɔɔgin la biig. 2 O da mɔri pu'ab ayi'; yinne yʋ'ʋri da buon Hanna ka oŋa la an Penina. Penina da mɔr biis ka Hanna an kʋndu'ar. 3 Yʋʋm wʋsa Elkana nɛ o yidim da ɛɛnti keŋnɛ Siilo pʋ'ʋs Zugsɔb Paŋtita'ar Sɔb la, ka maal maana anina. Eli biis ayi' banɛ yʋda da buon Hofini nɛ Finehas la da an maanmaannib saŋa kan la. 4 Elkana ya'a da maal o maan, o pʋdigid ni'im la nɛ tisid o pu'a Penina nɛ o biribis nɛ bipumis la wʋsa. 5 Amaa o da ɛɛn tis Hanna nɛ pʋdigir ayi', on nɔŋ o la zug, la'am nɛ Zugsɔb la da pʋ tis o du'am la. 6 Zugsɔb la da pʋ tis Hanna du'am la zug, o nintaa la da niŋid o bʋnsieba linɛ na duoe o sʋnf. 7 O da maan o nɛ ala yʋʋm woo. Saŋkanɛ wʋsa ka Hanna dɔlli keŋ Zugsɔb la Pʋ'ʋsim Yin, o nintaa la na maal o siia hali ka Hanna sʋnf ti duoe ka o kaasi zan'as diib. 8 O sid Elkana na bu'os o ye, “Hanna, bɔ ka fʋ kaasida? Bɔ ka fʋ zan'as diibɔ? Bɔ ka fʋ sʋnf san'am? Man an si'em tisif la pʋ gaad biis piigaa?”9-10 Daar yinne ka ba bɛ Siilo teŋin; ka di ka nuu naae ka Hanna duoe keŋ Pʋ'ʋsim Sʋgʋrin la kaas nɛ sʋnsa'aŋ hali sɔsid Zugsɔb la. Saŋkan la ka Eli onɛ an maanmaan la zin kʋk zug Zugsɔb Pʋ'ʋsim Fuug Sʋgʋr za'anɔɔrin la. 11 Ka Hanna kaanb kaanbʋgʋ, yɛt ye, “Zugsɔba, m anɛ fʋ sankpan'as, fʋ ya'a na gɔsim sʋnsa'aŋi zem si'em, ka tiɛn m yɛla ka da tam. Fʋ ya'a na tisim biribiŋ, m na nɔk o lɛbisi tisif ka o tʋm tisif nɛ o nyɔvʋr bɛn wʋsa ka ba kʋ pʋni o zugɔ.” 12 On da nan sɔsid Wina'am ken tuon la ka Eli gɔt ka o nɔɔr la yʋmisid. 13 Hanna da sɔsid Zugsɔb la nɛ o sʋʋnrin ka o nɔŋgban yʋmisid ka lɛɛ pʋ pian'ad ka li yita. Ka dinzug Eli da tɛn'ɛs ye o kʋʋl nɛ daam, 14 ka yɛl o ye, “Bɔ ka fʋ bugi kena maana ala? Fʋ kʋ bas daam bugubɔɔ?” 15 Ka Hanna lɛbisi o ye, “M Ba'a, li ka' ala! Mam anɛ pu'a kanɛ mɔr sʋnsa'aŋ bɛdegʋ. Mam zi' daam bɛɛ dankpi'euŋ nuubɔ; li anɛ m sʋnsa'aŋ ka m fabinnɛ tisid Zugsɔb la. 16 Da tɛn'ɛs ye mam onɛ aan fʋ biig la anɛ pu'a yɔɔgɔ. Saŋa wʋsa mam sɔsidnɛ Zugsɔb la m sʋnsa'aŋ yɛla.” 17 Ka Eli lɛbisi yɛl o ye, “Kem nɛ sumbʋgʋsʋm, Israel Wina'am la na tisif fʋn sɔs si'el la.” 18 Ka Hanna ye, “Tɔ, m Ba'a, kɛl ka man onɛ aan fʋ tʋmtʋm pu'ak la nyɛ zugsʋŋʋ fʋ san'an.” Ka o yii lɛbi bɔ diibi di, ka tam sʋnsa'aŋ la yɛla ka o nindaa yʋ'ʋn an nyain.
19 Bɛogʋ da nie la ba da duoe pʋ'ʋs Zugsɔb la ka lɛbi ba yir dinɛ bɛ Ramataim la. Elkana daa digin nɛ o pu'a Hanna, ka Zugsɔb la tiɛn Hanna yɛla 20 ka li daa pʋ yuugɛ ka Hanna gban'e pʋʋgʋ du'a biribiŋ. Ka o pʋd o yʋ'ʋr ye, Samuela bɔzugɔ o sɔs nɛ ka Zugsɔb tis o.
Hanna pɛsig Samuel la yɛla
21 Maan saŋa da lɛm paae ka Elkana nɛ o yidim keŋ ye ba maal maannɛ tis Zugsɔb la ka li kɛ ka o kaanbʋg la pɛ'ɛl. 22 Hanna da pʋ dɔlla, ka yɛl o sid la ye, “Biig la ya'a ti tuk bin'isir, m na mɔr o keŋ Pʋ'ʋsim Sʋgʋrin la pɛsig o tis Wina'am ka o na bɛɛ anina saŋa wʋsa.” 23 Ka o sid Elkana yɛl o ye, “Niŋim linɛ na an sʋm tisif. Kpɛlim kpɛla ti paae saŋkanɛ ka fʋ na tuk biig la bin'isir. Zugsɔb na kɛ ka o pian'ad la niŋ amɛŋa.” Ka pu'a la kpɛlim yinne ugus biig la hali nɛ on ti tuk biig la bin'isir. 24 On da bas bin'isim mu'ab la o ma da nɔk o la'am nɛ on da nan an bibil la ka nɔk yʋma atan' lɔlʋg, ka mak zɔm kuriba anaasi niŋ laan ka paas daam nɛ waa, keŋ Zugsɔb la Pʋ'ʋsim Fuug Sʋgʋr linɛ da bɛ Siilo teŋin la. 25 Ban da kʋ naaf la naae la, ba mɔr biig la kɛn Eli san'an na. 26 Ka Samuel ma yɛl Eli ye, “Gaafara, m zugdaana, li anɛ sida ye manɛ an pu'a kanɛ da kɛn Pʋ'ʋsim Sʋgʋrin na zi'e kpi'e fʋn da zin si'el la sɔsid Zugsɔb la. 27 M da sɔsid nɛ biig nwa yɛla, ka Zugsɔb la sid gandigi m sɔsʋg ka tisim. 28 Zina m nɔkid o nɛ pɛsigidi tisid Zugsɔb la. O nyɔvʋr bɛn wʋsa o ye o anɛ Zugsɔb la din.” On naae la ka wɔ'ɔg Zugsɔb la anina.