Boaz onɛ na di faar la yɛla
3
1 Daar yinne ka Naomi yɛl o bipu'a la ye, “M biiga, li kʋ an sʋm ka m bɔ sid sʋŋʋ tisif ka fʋ vʋ'ʋsɛ? 2 Fʋ zi' ye Boaz onɛ ka fʋ dɔl o tʋmtʋm pu'ab la anɛ ti du'adaa? Gɔsima, o na yɛlig o mui la zieŋin zaama. 3 Sʋʋm ka lɔɔ fʋ zug ka zaŋ fusʋma la sɔɔn keŋ zieŋin la, amaa da kɛ ka o baŋ ye fʋ bɛɛ anii, asɛɛ ka o di ka nuu naae. 4 Ka o ya'a keŋ digin, fʋn kpa'am keŋ on dig zin'isi'a la, ka laki o fuug o nɔba babaa digin. Fʋ ya'a niŋ ala o na yɛlif fʋn na niŋ si'em.” 5 Ka Ruf lɛbis ye, “Tɔ; m na maal dinɛ wʋsa ka fʋ yɛl la.”6 Ka Ruf keŋ zieŋin la maal dinɛ wʋsa ka o sid ma la yɛl o ye o niŋ la. 7 Boaz n di ka nu naae ka li malis o hali la, o keŋ digin ki dʋʋr la kpikpɛŋ ye o gbis. Ka Ruf keŋ baanlimm lak fuug la o nɔba baba ka digin. 8 Yʋ'ʋŋ tisʋʋs ka Boaz gbisi lɛbigi si'is o ka gɔsi nyɛ ka o digi o nɔba baba. Ka li lidig o, 9 ka o bu'os ye, “Anɔ'ɔnɛ la?” Ka Ruf lɛbis ye, “Li anɛ man Ruf, fʋ tʋmtʋm pu'ak la. Fʋn sadigim an onɛ na dii ti faar la, nɔkimi fʋ fuug la pilim.” 10 Ka Boaz lɛbis ye, “Zugsɔb na niŋi fʋ zug bareka. Fʋn tʋm tʋʋm sʋŋ si'el nwa gaad fʋn dɛŋi maal si'em tis Naomi la, bɔzugɔ fʋ pʋ keŋ dɔl dasaŋ sɔ' onɛ an nɔŋdaan bɛɛ onɛ an kpan'am daana. 11 M biiga, da zɔt dabiem, ka m na maali fʋ yɛla wʋsa. Fʋn bɔɔd si'el wʋsa m na tisif, bɔzugɔ sɔ' wʋsa baŋ ye fʋ anɛ pu'a sʋŋ. 12 Ya'a an sida, m anɛ onɛ na nyaŋi dii ya faar, amaa onɛ an fadit bɛɛ gaad man. 13 Diginim ka bɛog nie, ka o ya'a bɔɔd faar la, o na yɛl, amaa o ya'a pʋ bɔɔda, Wina'am kanɛ vʋe la yʋ'ʋr zugɔ, man na diif. Diginim ka bɛog nie.” 14 Ka o digin o nɔba baba ka isigi duoe ka bɛog nam pʋ nie naae, ka Boaz yɛl o ye, “Da kɛ ka ba baŋ ye pu'a kɛn zieŋin nwa naa.” 15 Ka lɛn ye, “Nɔkimi fʋ fubil la yadig!” Ka on yadig fuug la ka Boaz mak mui nwama ayuobʋ tis o, ka o zii lɛb tempʋʋgin. 16 Ka Ruf paae o sid ma san'an ka o bu'os ye, “M biiga, bɔɔ maalɛ?” Ka o tu'asi pa'al o dinɛ wʋsa ka Boaz maali tis o la. 17 Ka paas ye, “Onɛ tisim mui nwama ayuobʋ nwa ka ye, ‘Da lɛbi fʋ sid ma la ni nɛ nu'uzaalisɛ.’ ” 18 Ka Naomi ye, “M biiga, gu'usim, ka ti gɔs on na maal yɛl nwa si'em, bɔzugɔ dau la kʋ vʋ'ʋsɛ asɛɛ ka o nyɛ yɛl la maalʋg.”