Ruf tʋm Boaz pɔɔgin
2
1 Ka Naomi sid Elimalek onɛ kpi la du'ad sɔ' da bɛ Betilehem an ninsʋŋ, ka an arezak sɔb ka o yʋ'ʋr buon Boaz. 2 Ka Ruf bu'os Naomi ye, “M kem pɔɔdin la wi'isɛɛ? Daasi'erɛɛ m na paam ninkanɛ zɔt nimbaanlig, ka o kɛ ka m wi'is ban bʋn ka yaad sieba la.” Ka Naomi lɛbis ye, “Kem!” 3 O da keŋi nyɛ pɔɔg ka nidib bɛɛ ani bʋn ki, ka o dɔl bunnib la nya'aŋi wi'isid. Zi' ka pɔɔg la anɛ Naomi sid Elimalek du'ad Boaz din. 4 Ban da nan tʋm saŋa bi'ela la ka Boaz yi Betilehem paae na, ka pʋ'ʋs banɛ bʋn ki la ye, “Zugsɔb na niŋi ya zug bareka!” Ka ba mɛ lɛbis ye, “Zugsɔb na niŋi fʋ zug bareka.” 5 Ka Boaz bu'os onɛ an bunib kpɛɛm la ye, “Pu'a kaŋa yi yaanɛ na?” 6 Ka kpɛɛm la lɛbis ye, “Moab pu'a kanɛ dɔl Naomi lɛb na la, la. 7 O yɛlim ye, ‘Fʋ na siak ka m wi'isi dɔl banɛ bʋn la nya'aŋa?’ O tʋmnɛ bɛogʋn sa ka keŋ ma'asim vʋ'ʋs bi'ela nwa.”8 Ka Boaz yɛl Ruf ye, “M pu'ayua kɛlisim! Bɛ kpɛla wi'isim ka da lɛn keŋ zin'isi'a ya'asɛ. Dɔlli m pu'asada la nya'aŋi wi'isid. 9 Gɔsim dap la bɛ zin'isi'a ki'ed la, ka dɔl pu'asada la nya'aŋ; m yɛl dasam la ye ba da kadi fɔ. Ku'onuud mɛ ya'a ti mɔrif, fʋn kabigim ku'okanɛ ka dap la wiki zi'el la nu.” 10 Ka Ruf igin ka o nindaa paae teŋin pʋ'ʋs o bɛdegʋ ka ye, “Bɔ ka fʋ na'as man anwa wʋsa, la'am nɛ man an saan la?” 11 Ka Boaz lɛbis ye, “M pʋn wʋm fʋn tʋm sʋm si'em tisi fʋ sid ma la, lin yi fʋ sid kum saŋa ti paae zina, ka lɛn wʋm fʋn basi fʋ ba' nɛ fʋ ma nɛ fʋ teŋ ka kena zin'in nɛ nimbanɛ ka' fʋ buudii. 12 Zugsɔb na kɛ ka yɛlsʋm dɔllif, fʋ tʋʋm sʋŋ la zug. Israel Wina'am onɛ ka fʋ zaŋi fʋ mɛŋi niŋ o nu'ugin la na yɔɔf, fʋn maal sʋm la zug.” 13 Ka Ruf lɛbis ye, “M zugdaana, fʋ na'asi m bɛdegʋ, fʋ pian'ad la kɛ ka m sʋnf ma'ae, baa man pʋ zem nɛ fʋ tʋmtʋm yinne la.”
14 Diib saŋa da paae ya ka Boaz yɛl Ruf ye, “Kem na di'e bodobodo nwa gɛndig nɛ bʋnnuuda la di.” Dinzug, o da zin'in nɛ tʋmtʋmnib la, ka Boaz tis o kawɛnsɛn'ɛda. O da dii tig ka nya'al diib. 15 Ka on duoe pin'il wi'isʋg la Boaz yɛl dap la ye, “Kɛl ka o wi'is la'am nɛ zin'ikanɛ ka ki bɔba la bɛ la ka da kat o. 16 Dinɛ paas, fuomi ki bɔba la nii digil ka o kena pi'isi paas ka da zɛrigi nɛ o.”
17 Zaam da ma'ae la, Ruf da la'as o mui la bʋ' yɛlig ka li nwaas ye li pɛ'ɛl layalʋŋ. 18 Ka o zii lɛb teŋin la pa'al o sid ma la on paam si'em. O da lɛn tis o dikanɛ ka o di pɔɔgin ka li kpɛlim la. 19 Ka Naomi bu'os o ye, “Fʋ keŋ anɔ'ɔn pɔɔgine wi'is zina? Wina'am na niŋ o sɔb zug bareka.” Ka Ruf yɛl Naomi ye, on wi'is ki la sɔ' pɔɔgin la yʋ'ʋri buon Boaz. 20 Ka Naomi yɛl ye, “Wina'am onɛ pʋ tammid o kaanbʋg banɛ vʋe nɛ banɛ kpi zug la na niŋ Boaz zug bareka!” Ka lɛn ye, “Dau kaŋa anɛ ti du'ad ka na nyaŋi dii ti faar.” 21 Ka Ruf paas ye, “Dinɛ gaad wʋsa, o ye m dɔl o tʋmtʋmnib la wi'is ki la hali nɛ ki bunib la na ti naae.” 22 Ka Naomi yɛl Ruf ye, “Fʋn wi'isidi dɔl pu'a banɛ bɛ Boaz pɔɔgin la an sʋm gaad fʋn na wi'is ninsieba pɔɔgin. Ya'a aan sɔ' pɔɔgin, ba na daamif.” 23 Dinzug, Ruf da wi'isid nɛ dɔl tʋmtʋmnib la hali ka mui nɛ ki bunib la ti naae. Tʋʋma la naar nya'aŋ la, on nɛ o sid ma da kpɛn bɛ nɛ taaba.