Boaz di faar
4
1 Ka Boaz keŋ tempʋʋg za'anɔɔrini zin ka fadit onɛ ka o sa yɛl o yɛla la kena gat. Ka Boaz buol o ye, “M zua, kem kpɛ' na zin'in!” Ka o kena zin'in. 2 Ka Boaz yɛl teŋ la kpɛɛmnam piiga ye ba zin'inim an kasɛtib. 3 Ka Boaz yɛl fadit la ye, “Naomi onɛ yi Moab teŋin lɛb na la kuosidi ti ba'abiig Elimalek paalʋ. 4 Ka man tɛn'ɛs ye m na mɔr yɛl nwa paaf ka fʋ da' paalʋ la kpɛɛmnam nwa tuon. Fʋ ya'a na nyaŋ, fʋn da'ami li. Amaa fʋ ya'a kʋ nyaŋɛ, fʋn yɛlim ka m baŋ. Bɔzugɔ sɔ' ka' suori na da' li ka ya'a ka' fʋnɛ, ka manɛ mɛ dɔlli fʋ nya'aŋ.” Ka o lɛbis ye, “M na da' li.” 5 Dinzug ka Boaz ye, “Tɔ; fʋ ya'a da' paalʋ la Naomi san'an, li anɛ tilas ye fʋ la'am sʋ'oe Ruf onɛ an Moab pu'a onɛ an pʋkɔɔnr la, ala ka paalʋ la na kpɛm bɛ onɛ kpi la nu'usin.” 6 Anina ka fadit la ye, “Li ya'a aan ala, man kʋ nyaŋɛ. Fʋn ya'a na nyaŋ, fʋn da'am, bɔzugɔ m ya'a da' li m biis kʋ nyaŋi sʋ'oe lii, ka ba mɛŋ faar pʋdigir na tɔi.” 7 (Saŋkan la fʋ ya'a da ye fʋ da' bɛɛ tiak paalʋ, li da anɛ onɛ kuosid la pidig o ta'adire tis onɛ da'ad la. Anwa ka Israel dim da niŋid ka li pa'an ye ba kuosidnɛ bɛɛ ba tiakidnɛ si'el.) 8 Dinzug ka fadit la yɛl Boaz ye, “Fʋn mɛŋ da'ami li.” Ka pidig o ta'adir. 9 Ka Boaz mɔɔli tis kpɛɛmnam nɛ kasɛtib la ye, “Zina zaŋi wa'ae la manɛ da' Elimalek nɛ Kilion nɛ Mahlon paalʋ la Naomi san'an. 10 Manɛ la'am sʋ'oe Ruf onɛ an Mahlon pʋkɔɔnr onɛ yi Moab teŋin la na. O na liebi m pu'a. Linɛ na kɛ ka onɛ kpi la yʋ'ʋr da bɔdig buudi la nii. Din ka m bɔɔd ye ya di kasɛt zina.” 11 Ka kpɛɛmnam nɛ nimbanɛ bɛ za'anɔɔrin la yɛl ye, “Tinam anɛ kasɛtib. Zugsɔb la na kɛ ka pu'a kanɛ kpɛn'ɛdi fʋ yin la na an nwɛnɛ Rakɛl nɛ Lea banɛ da la'asi zi'el Israel buudi la. Fʋ na paam zi'esim Efirata teŋin ka mɛ nyɛ yʋ'ʋr Betilehem teŋin. 12 Zugsɔb la na tisif yaasi yi pu'a kaŋa san'an, ka fʋ yir la na nwɛnɛ Perez onɛ an Tama nɛ Juda biig la.”Boaz di Ruf
13 Ka Boaz di Ruf ka digin nɛ o, ka Zugsɔb kɛ ka o nɔk pʋʋgʋ du'a biribiŋ. 14 Ka pu'ab la yɛl Naomi ye, “Zugsɔb di'em na'asi, on pʋ basif zaalim ka fʋ paam onɛ na di faar la. O na paam yʋ'ʋr Israel buudi ni. 15 Bikanɛ ka o du'a nwa na tiaki fʋ bɛllim ka mɔrif hali nɛ fʋ kʋdigir. Fʋ bipu'a onɛ nɔŋif hali gaad fʋn na mɔrin biis ayɔpɔi la du'a yaaŋi tisif.” 16 Ka Naomi nɔk biig la niŋ o nɔba zug yuol o. 17 Pu'abanɛ da bɛɛ ani la yɛl ye, “Naomi paam biribiŋ!” Ka ba pʋd o yʋ'ʋr ye Obɛd. Obɛd mɛ da du'a Jese, ka Jese du'a Na'ab David.
Perez yaas yɛla