Haga nɛ Isimael yɛla
16
1 Abram pu'a Sarai da nan pʋ du'a biiga. Amaa o da mɔr yammʋg onɛ an Egipt pu'asadir ka o yʋ'ʋr buon Haga. 2-3 Abram nɛ o yidim la da zin'in Keenan teŋin yʋʋm piiga la nya'aŋ ka Abram pu'a Sarai da yɛl o ye, “Zugsɔb la kɛ ka m an kʋndu'ar. Nɔkimi m yampu'ak la ka daasi'erɛɛ o na du'a biisi tisim.” Ka Abram siak Sara yɛl si'el la. Ala ka Sara nɔk o yammʋg Haga onɛ an Egipt pu'asadir la tis o ka o di. 4 Ka o digin nɛ o ka o nɔk pʋʋg. Haga da nyɛ ka o mɔr pʋʋg la ka pin'ili nɛ'ɛsid Sarai. 5 Ka Sarai yɛl Abram ye, “Nɛ'ɛskaŋa wʋsa yinɛ fʋ san'an na! Manɛ nɔki m yammʋgi tisif, ka on yʋ'ʋn nyɛ ka o mɔr pʋʋg la o pʋ lɛn na'asid mam ya'asa. Zugsɔb la na gaŋ onɛ mɔr bʋʋd mam nɛ fʋn sʋʋgin!” 6 Ka Abram yɛl Sara ye, “Fʋ yammʋg la bɛ nɛ fʋ nu'usin. Maalim o fʋn na maal si'em!” Ka Sara namis Haga hali ka o zɔ ka bas o.7 Zugsɔb maliak da nyɛ Haga ka o bɛ mɔɔgin zin'ikanɛ ka ku'om bun, ka li kpi'e suokanɛ ken Seur la. 8 Ka maliak la yɛl o ye, “Haga onɛ an Sarai yammʋga, fʋ yi yaanɛ na, ka wa'ae yaanɛ?” Ka o gandig ye, “M zɔtnɛ yiti m zugdaan Sarai san'an.” 9 Ka Zugsɔb maliak la yɛl o ye, “Ayei! Lɛm Sarai san'an ka siak o nɔɔr!” 10 Ka maliak la lɛn yɛl ya'as ye, “M na kɛ ka fʋ yaas nɔbigi zu'oe hali ka fʋ kʋ nyaŋi kaali ba.” 11 Ka o lɛn yɛl o ye, “Fʋn mɔr pʋsi'a nannanna la, fʋ na du'a biribiŋ ka pʋd o yʋ'ʋr ye Isimael, Zugsɔb la nyɛ fʋ namisʋg la zug. 12 Biig la na gɔɔnd nwɛnɛ wɛog bʋŋ nɛ ka kisig sɔ' wʋsa, ka sɔ' wʋsa mɛ na kisig o, ka on nɛ o ba'abiis na an dataas nɛ taaba.” 13 Ka Haga pʋd Wina'am onɛ pian' tis o la yʋ'ʋr ye, “Fʋnɛ an Wina'am onɛ nyɛtim” Ka yɛl ye, “M sid nyɛ Wina'am ka nan kpɛn vʋe!” 14 Lin ka ba buon bulig la ye Beer-Lahai-Roi la. Li nan kpɛn bɛ Kades nɛ Bered teŋsʋk hali ti paae zina. 15 Ka Haga du'a biribiŋi tis Abram, ka Abram pʋd o yʋ'ʋr ye Isimael. 16 Abram da anɛ yʋʋm pisnii nɛ ayuobʋ saŋkan ka Haga da du'a Isimael n tis o la.