Zugsɔb la zi'el nɔɔri tis Abram
15
1 Nɛ'ɛŋa nya'aŋ ka Abram wʋm Zugsɔb pian'ad zaansʋŋin, ye, “Abram, da zɔt dabiem! Ka m na gurif ka yɛltɔɔg kʋ paae fɔ, ka na tisif yʋ'ʋtita'ar.” 2 Ka Abram yɛl ye, “Naa, m Zugsɔb Paŋtita'ar Sɔba! Bɔ ka fʋ ye fʋ tisim, ka m ka' biig la? Ka anɔ'ɔnɛ ye o dii m faar la, ka'anɛ Eliezer onɛ yi Damaskus la naa?” 3 Ka Abram lɛn yɛl ye, “Fʋ pʋ tisim biisɛ, dinzugɔ sankpan'as onɛ bɛ m yin la na dii m faar.” 4 Ka Zugsɔb la lɛbis o ye, “Ayei, dau kaŋa kʋ dii fʋ faarɛ, amaa fʋ mɛŋ biribiŋ du'adiŋi na dii fʋ faar.” 5 Ka o kɛ ka o yi paalʋ ka yɛl o ye, “Gɔsim saŋgbana la ni ka kaal nwadbibis la! Fʋ sid na nyaŋi kaali baa?” Ka lɛn yɛl o ye, “Ala ka fʋ yaas mɛ na zu'oe.” 6 Ka Abram da niŋ Zugsɔb yadda, ka Zugsɔb gɛlig ka yɛl ye o anɛ pʋpielim sɔb o tuon.7 Ka Zugsɔb la yɛl o ye, “Manɛ an Zugsɔb onɛ mɔrif yi Ur Kaldea teŋin ken teŋ kaŋa na ye fʋ sʋ'oe li.” 8 Amaa Abram yɛl ye, “Naa, m Zugsɔb Paŋtita'ar Sɔba! M na niŋ wala ka baŋ ye man na sʋ'oe li?” 9 Ka Zugsɔb yɛl o ye, “Mɔr na'asa'a, nɛ bʋnya'aŋ, nɛ pɛrabanɛ an yʋma atan', tan' nɛ sian'arin dawan nɛ na'adawan na.” 10 Ka Abram mɔri li wʋsa na ka kɔdigi ba buak pʋsʋk pʋsʋkʋ digili ba ka ba ya'ad taaba, amaa o pʋ buak dawana la. 11 Ka zuund da sig na ye ba di ni'im la, ka Abram kadi ba. 12 Ka winnigi da lut la, gbɛɛm da zɛɛg Abram ka o gbis ka zin'ig la lieb lik biridi ka dabiem kpɛn' o. 13 Ka Zugsɔb la yɛl o ye, “Baŋim ye fʋ yaas na lieb saam teŋ si'a linɛ ka' ya mɛŋ teŋa, ka ba na namisi ba yʋma kɔbisnaasi (400). 14 Amaa m na namis sʋ'ʋlim kanɛ zaŋi ba liebi ba yammis la, ka li nya'aŋ ba na ti zaŋ arezak pamm yi teŋin la. 15 La'am nɛ wala, fʋ na kʋdigi paae fʋ bɛn ka kpi nɛ sumbʋgʋsʋm ka ba mumif. 16 Zʋmaaŋ kanɛ paas anaasi la ni, fʋ biis na ti lɛb kpɛla na, bɔzugɔ Amor dim tʋʋmbɛ'ɛd la nan pʋ paae li bɛnnɛ.” 17 Ka winnigi da li ka yʋ'ʋŋ sɔb la, Abram nyɛ ka bugum nɛ nyɔ'ɔs dɔl bʋnkɔnbbu'ama la teŋsʋki gaad. 18 Daakan la ka Zugsɔb la maal nɔnaar nɛ Abram ye, “M na kɛ ka fʋ yaas sʋ'oe teŋgbauŋ nwa wʋsa, lin yi Egipt teŋ titɔndig la paae Efiritis kɔldatita'ar la nɛ 19 Ken dim sʋ'ʋlim la, nɛ Kenas dim nɛ Kadmon dim 20 nɛ Hitti dim nɛ Perizi dim nɛ Refa dim 21 nɛ Amor dim nɛ Keenan dim nɛ Girgas dim nɛ Jebus dim la wʋsa.”