Babɛl girimbisa mɛɛb
11
1 Dunia nidib wʋsa da mɔri pian'ad buudi yinne. 2 Ka nidib la lɛb ya-nya'aŋ baba ka nyɛ zin'ikanɛ dig sassi bɛ Sinar teŋin, ka zin'in ani. 3 Ba da yɛl taaba ye, “Kemi na ka ti nwɛ' birikiisi ka sɛn' ba ka ba kpi'em.” Ba da nɔk nɛ birikiisi mɛ' ka ka' kugaa, ka lɛn nɔk kotaali mɛ' birikiisi la. 4 Ka ba yɛl ye, “Kemi na ka ti mɛ' tempʋʋg, ka mɛ' girimbisa ka li wa'alim paae saŋgbana. Ala ka ti na kɛ ka ti yʋ'ʋr dʋ, ka ti kʋ widigi gilig dunia la.” 5 Ka Zugsɔb la sig na ye o gɔs tempʋʋg la nɛ girimbisa dɔwɔk kanɛ ka ba mɛɛd la. 6 Ka Zugsɔb la yɛl ye, “Nidib la an buudi yinne ka pian'ad, pian'ad yinne, ka pin'ili tʋm tʋʋm kaŋa si'em la, ba ya'a gban'e ye ba tʋm si'el wʋsa li kʋ tɔi tisi ba. 7 Kɛl ka ti sigi tiaki ba pian'ad la kɔn'ɔb-kɔn'ɔb, ka ba kʋ lɛn wʋm taaba pian'adɛ.” 8 Ala ka Zugsɔb da widigi ba wʋsa, ka tempʋʋg la mɛɛb wɛɛl. 9 Linzug ka ba buon teŋ la ye, Babɛl, bɔzugɔ anina ka Zugsɔb da kɛ ka ba pian'ad la bʋr, ka tisi ba pian'ad kɔn'ɔb-kɔn'ɔb, ka li kɛ ka ba widigi tiig dunia la.Lin pin'il Sem keŋ paae Abram la yɛla
10 Nwa' pa'an Sem nɛ o yaas yɛla: Sem da anɛ yʋma kɔbiga (100) ka du'a Arfaksad, ku'om la da di dunia la yʋma ayi' la nya'aŋ. 11 Arfaksad du'am nya'aŋ la Sem da lɛn du'a biribis nɛ bipumis sieba ka nan kpɛn vʋe paae yʋma kɔbisnu (500). 12 Arfaksad n da paae yʋma pistan' nɛ anu la o da du'a Sela. 13 Sela du'am nya'aŋ la Arfaksad da lɛn du'a biribis nɛ bipumis sieba ka vʋe paae yʋma kɔbisnaasi nɛ atan' (430). 14 Sela n da vʋe paae yʋma pistan' (30) la, o da du'a Ebɛr. 15 Ebɛr du'am nya'aŋ la Sela da lɛn du'a biribis nɛ bipumis sieba ka vʋe paae yʋma kɔbisnaasi nɛ atan' (403). 16 Ebɛri da an yʋma pistan' nɛ anaasi (34) la, o da du'a Peleg. 17 Peleg du'am nya'aŋ la Ebɛr da lɛn du'a biribis nɛ bipumis sieba ka vʋe paae yʋma kɔbisnaasi nɛ pistan' (430). 18 Pelegi da an yʋma pistan' (30) la, o da du'a Reu. 19 Reu du'am nya'aŋ la Peleg da lɛn du'a biribis nɛ bipumis sieba ka vʋe paae yʋma kɔbisyi' nɛ awai (209). 20 Reu n da an yʋma pistan' nɛ ayi' (32) la, o da du'a Serug. 21 Serug du'am nya'aŋ la Reu da lɛn du'a biribis nɛ bipumis sieba ka vʋe paae yʋma kɔbisyi' nɛ ayɔpɔi (207). 22 Serug n da an yʋma pistan' (30) la, o da du'a Nahor. 23 Nahor du'am nya'aŋ la Serug da lɛn du'a biribis nɛ bipumis sieba ka vʋe paae yʋma kɔbisyi' (200). 24 Nahor n da an yʋma pisi nɛ awai (29) la, o da du'a Tera. 25 Tera du'am nya'aŋ la Nahor da lɛn du'a biribis nɛ bipumis sieba ka vʋe paae yʋma kɔbiga nɛ pii nɛ awai (119). 26 Tera da an yʋma pisyɔpɔi (70) la, o da du'a Abram nɛ Nahor nɛ Aran.
Abram du'am yɛla
27 Nwa' pa'an Tera nɛ o yaas yɛla: Tera da du'a Abram nɛ Nahor nɛ Aran. Ka Aran da du'a Lot. 28 Aran ba' Tera da nan vʋe la, Aran da kpinɛ Ur linɛ bɛ Kaldea teŋgbauŋʋn, zin'ikanɛ ka ba da du'a o la. 29 Abram nɛ Nahor da di pu'ab. Abram pu'a yʋ'ʋr da buon Sarai, ka Nahor pu'a yʋ'ʋr mɛ da buon Milika, o da anɛ Aran pu'ayua. Aran da anɛ Milika nɛ o pitʋ Isika ba'. 30 Sarai da anɛ kʋndu'ar. 31 Tera da nɔk o biig Abram nɛ o yaaŋ Lot onɛ an Aran biig la, nɛ o bipu'a Sarai onɛ an o biig Abram pu'a la, ka ba yi Ur linɛ bɛ Kaldea teŋin la, ye ba keŋ Keenan teŋin. Ka ban da paae Haran tempʋʋgin la ba da zin'in anina. 32 Tera da vʋe paae yʋma kɔbisyi' nɛ anu (205) ka kpi Haran teŋin.