Winbʋɩ A Klɛ‑hɩhɩalɛ 14

W, w

Wanyɔ (Sauveur)

‑Yusu, nɔ‑ mɔ 'klɔ ‑bʋ a Wanyɔ, ‑ɛ nu꞊o, ɛ nɔ‑ ‑ha 'hru, kɩ Nyɩsʋa bʋ wa nyibli, 'kɩ 'ʋ 'waa dɛ 'kuku* a ‑ta'. Ɛ ꞊hɛn 'nyrɛ, ‑ɛ mɔ, ‑tonyibli a dɛ 'kuku a ‑tɩ, ʋ blɛɛ 'kʋkʋʋ yɩ, kɔ, ʋ blɛɛ yɩ, bʋ hlɔɔ Nyɩsʋa ‑mɔ lɛ. Kɛɛ, ‑Yusu, nɔ‑ Nyɩsʋa hlɛ ‑aan dɛ 'kuku a 'mʋ, 'ɛ 'kʋ, 'kɩ 'ʋ ‑aan ‑ta'. Ɛ nɔ‑ nu꞊o, nyibli a pɛpɛ ‑mʋ', ‑ʋ kuo ‑Yusu ꞊wlʋ* yɩ, ‑ʋ ‑nyi꞊e 'waa 'klɔ, Nyɩsʋa 'ɛ 'wʋwlɛ 'waa dɛ 'kuku. Dɛ a 'mʋ, ‑Yusu nu a ‑tɩ, Nyɩsʋa 'ɛ yɩ 'ʋ ꞊nʋ yɩ 'sii ‑nɩ, 'kɩ 'ʋ 'a dɩɔnʋ yɩ, 'ɛ yɩ ꞊nʋ kʋa 'ble. 'Kɩ 'lɩ 'a dɩɔnʋ a 'kʋkʋʋ 'kwli, 'kɩ ‑Yusu naa 'lɩ, 'ɛ ꞊gblɛ nyibli, 'kɩ 'lɩ Satan*, ‑ɛ mɔ 'kuo ‑hʋɩn* a nyiblo gbagbʋ a 'klɩ bʋ. ‑Hre wʋwa a klɛ‑hɩhɩalɛ.

winwlɔn‑hanyɔ; Nyɩsʋa a winwlɔn‑hanyɔ (prophète)

Nyɩsʋa a winwlɔn‑hanyɔ, nɔ‑ mɔ nyiblo ‑bʋ, Nyɩsʋa ꞊tui 'a ‑tɩ wlɔn, 'tɩ‑ winwlɔn‑hanyɔ a 'mʋ, 'ɛ yɩ ‑tɩ a 'mʋ nyibli ‑lee ‑nɩ.

Ti ‑hi la a ti 'yri, Nyɩsʋa lee la 'nɛ‑ 'a winwlɔn‑hanyʋ ‑hʋɔhʋɩ, 'kɩ 'nɛ‑ ‑tonyibli ‑mɔ: Samuɛlɩ, Esai, Selemi, kɔ 'waa dɛ ‑bɩ 'hʋɛn‑. 'Kɩ Nyɩsʋa nɛɛ la 'lɩ ꞊nʋ 'lɩ, 'ɛ tʋɛ la nyibli ‑tɛblɩ, ‑ɛ di la 'lu ‑mɔ mu, 'kɩ 'lɩ ye'. 'Tɩ‑ ‑Yusu 'mʋ la ‑kʋɛ ‑nɩ, ʋ hlɛ la 'a didie a ‑tɩ nɩ, kɔ 'a nunu‑tɛblɩ, ɛ di la nu, kɔ ‑tɛblɩ ‑mʋ', ‑ɛ di la 'ʋ nyre, 'kɩ 'ʋ꞊ʋ ‑mɔ. Ʋ hla ‑tɛblɩ a 'mʋ a ‑tɩ, 'ɛ ‑hie ti ‑hʋɔhʋɩ, 'tɩ‑ ‑Yusu a 'mʋ, 'ɛ ‑di. Winwlɔn‑hanyʋ a 'mʋ, 'ya 'ʋ 'lu de, ɛ nɩ la ke', 'ʋ nɛ la ‑tɛblɩ ‑mʋ', ‑ɛ di 'lu ‑mɔ mu ‑mɔ lɛ, 'tɩ‑ ‑Yusu 'mʋ di de, ‑ɛ di꞊e nu, ɛ 'mʋ nyibli ‑bati lɛ ‑pʋʋ ‑nɩ. ‑Tɩ a 'mʋ, ʋ 'crɩ la꞊a nɩ, 'kɩ 'lɩ 'yrɩ* 'kɩ a Nyɩsʋacrɩɛn 'kwli.

'Kɩ 'lɩ 'yrɩ yrayrɩ a Nyɩsʋacrɩɛn 'kwli, ʋ hlɛ nyibli ‑mʋ', ‑ʋ hle 'lɩ Nyɩsʋa a 'klɩ 'kwli a ‑tɩ, 'ʋ hlɛ ‑tɩ ‑mʋ', Nyɩsʋa ꞊tui ꞊nʋ wlɔn ‑wɛ. Nyibli a 'mʋ, ʋ dɛɛ ꞊nʋ Nyɩsʋa a winwlɔn‑hanyʋ ‑wɛ.

‑wɩdɛ ‑Hre 'kuo a dɩda a klɛ‑hɩhɩalɛ

‑wlablecrɩɛn (Psaumes)

'Kɩ ɛ nɩ 'lɩ 'yrɩ* 'kɩ a Nyɩsʋacrɩɛn 'kwli. ‑Wla a 'mʋ, Dafidɩ* kɔ nyibli ‑bɩ 'hʋɛn‑, ʋ nʋ‑ 'crɩ꞊ɩ, ‑ɛ di꞊e nu, ʋ 'mʋ꞊ʋ hla, ‑tɛ ‑mʋ' ʋ nu Nyɩsʋa a nʋɛlɛ, kɔ, ʋ 'mʋ꞊ʋ 'nyrɛ lɛ pʋ.

‑wlawlɩ, 'lawlu (adultère, impudicité)

Mat 5.27-30; Mak 10.1-12; Luk 16.18; Saan 8.1-11; 1Kol 6.9-20; 1Tes 4.1-8; Heb 13.4.

'wliyɛ, kʋkɔ‑tɛblɩ (argent, possessions)

Mat 6.19-21; 24-34; Luk 12.13-21; 32-34; Nunu 20.35; 1Tim 6.6-10; Heb 13.5; Sak 2.1-9; 5.1-6.

꞊wlʋ a yɩ kuo lɛ; nyiblo bʋ kuo kʋkɔnyɔ ꞊wlʋ yɩ (foi, croire)

Mak 11.22-25; Luk 17.5-6; Gal 2.16; Ef 2.8-9; Heb 11; Sak 1.2-8; 2.14-26; 1Pi 1.3-9.

‑wuwle‑nyrɔwɔ (sabbath)

Ɛ mɔ ‑nyrɔwɔ gbagbʋ ꞊nɩɔ. Ta 'lɩ tete a klɛ‑hɩhɩalɛ 'kwli lɛ, ꞊mʋ ‑wuwle‑nyrɔwɔ a tete ‑hre (2Mose 20.8). ‑Juukʋɛ* ꞊tu 'ʋ tete ‑bɩ, 'kɩ 'ʋ ‑wuwle‑nyrɔwɔ a ‑ta'. Tete a 'mʋ, ɛ 'yɩ Nyɩsʋa a tete 'pa‑. Ʋ 'nɩ ‑hʋa꞊a la꞊a, 'kɩ nyiblo bʋ nu ‑kʋandɛ 'cɩmɩɛ, 'kɩ 'lɩ ‑wuwle‑nyrɔwɔ 'kwli. Nyiblo 'bʋ nu ‑kʋan, ‑ɛ ‑bɩ ʋ pɩ yrʋ dɩakɩ. ‑Tɩ a 'mʋ, ɛ nɔ‑ kɔ ‑tɩ 'ʋ yɩ la yrʋ' lɛ bi, ‑tɛ ‑wuwle‑nyrɔwɔ 'kwli, ‑Yusu ‑wɛ 'hʋɩhrennyɔ ꞊dʋ a 'kʋɛ, kɔ ‑tɛ 'a ‑nagbopʋ* 'cɛ la 'dʋdɔ‑tɛblɩ ꞊dʋ a 'hlɛ gbi, 'a didie a ‑tɩ (Mat 12.1-8). ‑Juukʋɛ a 'mʋ, ʋ wɛn 'nɩ, nunu‑tɛblɩ a 'mʋ, ɛ mɔ ‑kʋandɛ ꞊nɩɔ.

wʋwa (salut)

‑Yusu bʋ wa nyiblo, ‑ɛ blɛɛ 'kʋkʋʋ yɩ, 'a dɛ 'kuku* a ‑tɩ, Nyɩsʋa a ‑bati 'nɩ ‑ha꞊a klɔ: Saan 3.16-17; Nunu 2.37-39; 4.11-12; Rɔm 5.1-11; 10.9-13; Ef 2.1-10; 1Tim 1.15-16; 2.3-7; 1Pi 1.3-5.