10
M, m
manɩ (manne)
Saan 6.31, 49; Heb 9.4 'Lɩlɛ 2.17. ‑Tɛ Yisraɛkʋɛ ‑hɔn la 'lɩ Esipʋblʋgba 'kwli, 'blʋgbɩ, ‑ɛ kɔ kɩ nyibli ꞊dʋ 'yɩ la 'lɩ 'ti, 'kɩ ʋ nɛɛ la 'lɩ, 'kɩ 'lɩ 'yrɩ a ‑wlɩ nɩ 'hʋɛn 'kwli. 'Kɩ 'lɩ ti a pɛpɛ a 'mʋ 'kwli, Nyɩsʋa, nɔ‑ yɩ la ꞊nʋ diidɛ ‑nyi. Diidɛ a 'mʋ, ʋ dɛɛ ꞊nɛ manɩ. 'Kɩ manɩ a 'mʋ, ɛ yɩ 'lɩ yakɔ 'kwli lɛ ble, nyibli 'ʋ yɩ꞊ɩ lɛ 'kukue ‑nɩ, 'ʋ yɩ꞊ɩ di.
Mari (Marie)
'Kɩ 'lɩ 'yrɩ* yrayrɩ a Nyɩsʋacrɩɛn 'kwli, nʋgbɩ ‑hʋɔhʋɩ nɩ 'lɩ, 'waa 'nyrɛ 'ɛ mɔ Mari. 'Kɩ 'lɩ ꞊nʋ 'nyɩ, 'waa 'yɔ nɩ ꞊hun, nʋ‑ ‑bʋ:
1. Mari, ‑ɛ mɔ ‑Yusu a 'dii.
2. Mari, ‑ɛ kɔ 'lɩ Madala. Ɛ nɔ‑ kɔ ke' ‑Yusu bla la 'ʋ 'kuo ‑hʋɩn* nɩ ꞊hlon'hʋɛn lɛ, 'tɩ‑ 'ɛ nɛɛ la ‑Yusu ‑mɔ. Mat 27.55-56; Mak 16.9; Luk 8.2; Saan 20.1-2; ...
4. Mari, ‑ɛ mɔ Sakɩ kɔ Sosɛfʋ* 'hʋɛn‑ a 'dii. Mat 27.56; Mak 15.40; 16.1; Luk 24.10. ‑Baklɛ Mari a 'mʋ, ɛ nɔ‑ kɔ nyɩbɩʋ ‑mɔ Klopasɩ. Luk 24.17.
5. Mari, ‑ɛ mɔ Saan* Makɩ a 'dii. Nɔ‑ kɔ 'kayu, 'kɩ 'lɩ Jrusrɛ, ‑ɛ kɔ bʋ ‑Yusu a ‑nagbopʋ*, ʋ kla 'lɩ lɛ'kukue‑tɩ. Nunu 12.12-17.
Mɛkisɩdɛkɩ (Melkisédec)
milɩ (myrrhe)
Mat 2.11; Mak 15.23; Saan 19.39. Ɛ mɔ hɩnhrʋnpʋ‑tɛblɩ a 'nyrɛ ꞊nɩɔ. Milɩ a 'mʋ, ɛ pɩ ꞊die dɩakɩ. Tugbɛ ꞊dʋ a 'nie, nɔ‑ ʋ ni la, 'ʋ ni milɩ. Ɛ mɔ la ‑cɩ ꞊nɩɔ ‑wɛ, ‑Juukʋɛ* 'ʋ ni la꞊a, 'ʋ pɩɛ la nyibli, 'bʋ 'mʋ la 'ʋ 'kʋkʋku 'ʋ ‑ha, 'ʋ yɩ hri la꞊a milɩ a 'mʋ lɛ, 'tɩ‑ 'ʋ ‑hɛ la 'ʋ꞊ʋ 'ʋ.
Mose (Moïse)
Ɛ nɔ‑ mɔ la Yisraɛkʋɛ* a naanyɔ gbagbʋ. Ti ‑mʋ' ‑kɔ 'yri ʋ nɩ ꞊kodɛ ‑mɔ, 'kɩ 'lɩ Esipʋblʋgba* 'kwli, Mose, nɔ‑ Nyɩsʋa ‑ha la 'lɩ, 'kɩ ɛ 'mʋ la 'a dakɔ Yisraɛkʋɛ Esipʋblʋgba 'kwli ‑ha, ɛ 'mʋ la ꞊nʋ ‑naa ‑nɩ, ʋ 'mʋ la 'lɩ 'blʋgba ‑mʋ', Nyɩsʋa ‑nyi ꞊nʋ 'kwli mu. Mose, nɔ‑ Nyɩsʋa ‑nyi 'a tete* 'kɩ 'ʋ 'a dakɔ Yisraɛkʋɛ ‑mɔ. Tete a 'mʋ, ʋ 'crɩ꞊ɩ nɩ, 'kɩ 'lɩ 'crɩɩn nɩ ꞊hun 'kwli, ‑ʋ mɔ Mose a 'crɩɩn. ‑Hre tete a klɛ‑hɩhɩalɛ ‑wɛ.
‑mɔnanyɔ; ‑Yusu a ‑mɔnanyɔ (apôtre)
‑Tɛ ‑Yusu ꞊tui la 'a ‑kʋan ‑wlu, 'kɩ 'nɛ‑ ‑tʋtʋ kɩ, ɛ ‑ha la 'lɩ nyibli nɩ ‑pu ꞊tu 'ʋ 'hʋɛn, 'ɛ nu ꞊nʋ 'a ‑nagbopʋ* ‑mɔ. Nyibli a 'mʋ, ʋ nʋ‑ mɔ la 'a ‑mɔnanyʋ, ‑ɛ ꞊hɛn 'nyrɛ 'a lɛlenyʋ. Mat 10.1-4; Mak 3.13-19; Luk 6.12-16.
Nyibli a 'mʋ, 'kɩ ʋ 'cibi la 'ʋ꞊ʋ 'hʋɩ, 'ɛ tʋɛ la ꞊nʋ 'a ‑nɛ ti. ‑Tɛ ‑Yusu nu la 'kʋkʋʋ, kɔ ‑tɛ ɛ nu la 'klɔ'hɩhrɩɩ, 'a ‑mɔnanyʋ a 'mʋ, ʋ 'ye la꞊a nɩ, ‑Yusu a 'mumu, 'ɛ tɛ ꞊nʋ bʋ, ‑ɛ di꞊e nu, ‑Yusu a nunu‑tɛblɩ ‑mʋ', ʋ 'ye, kɔ 'a tɔɔwin ‑mʋ', ʋ 'wɩn, ʋ 'mʋ꞊ʋ ‑mɔ lɛ na, 'kɩ 'ʋ nyibli ye'. ‑Yusu a ‑mɔnanyʋ a 'mʋ, nʋ‑ mɔ nyibli ‑mʋ', ‑ʋ kuo ‑Yusu ꞊wlʋ* yɩ a ye'nanyʋ.
'Kɩ 'lɩ 'crɩɛn ‑mʋ', ‑ɛ nɛ ‑Yusu a ‑mɔnanyʋ a nunu‑tɛblɩ a ‑tɩ ‑mɔ lɛ 'kwli, Pɔlʋ, kɔ Banabasɩ, kɔ nyibli ‑bɩ 'hʋɛn‑, ʋ dɛɛ ꞊nʋ ‑Yusu a ‑mɔnanyʋ ‑wɛ. Pɔlʋ kɔ Banabasɩ a 'mʋ 'hʋɛn‑, ‑Yusu lee ꞊nʋ nɩ ‑wɛ, 'kɩ bʋ nu 'a ‑kʋan. ‑Hre ‑Yusu a ‑nagbopʋ a klɛ‑hɩhɩalɛ.