9
L, l
Lefi (Lévi)
Heb 7.5, 9-10; 'Lɩlɛ 7.7. Ɛ mɔ la Sakɔbʋ* a 'yu nyɩbɛyu ‑bɩ ꞊nɩɔ la, 'kɩ 'lɩ 'a 'yonʋ nyɩbɛpʋ nɩ ‑pu ꞊tu 'ʋ 'hʋɛn ‑mʋ' 'nyɩ, ‑ʋ mɔ Yisraɛkʋɛ* a ꞊tugbi nɩ ‑pu ꞊tu 'ʋ 'hʋɛn ‑mʋ' a 'baɩnʋ. Lefi a 'yonʋ, ʋ pʋ ꞊nʋ 'kɩbɩa kɩ, 'kɩ ʋ 'mʋ Nyɩsʋa a ‑kʋan nu, 'kɩ 'lɩ Nyɩsʋa a 'kagbaʋ* bʋ. Nyɩsʋa a ‑cɔhlʋnpinyʋdɛ*, nɔ‑ mɔ la Lefi꞊tugba a ‑nɛ du, Nyɩsʋa ‑nyi la ꞊nʋ, sɛyɩ nyibli ‑mʋ', ‑ʋ mɔ Ayrɔ a 'yonʋ. ‑Hre Ayrɔ a ‑tɩ a klɛ‑hɩhɩalɛ.
‑Yusu kɔ la ‑nagbopi*, 'a 'nyrɛ 'ɛ mɔ la Lefi. 'A 'nyrɛ ‑bɩ mɔ Matie. Mat 9.9-13; Mak 2.14; Luk 5.27-29. Ɛ nɔ‑ 'crɩ ꞊haantitie, ‑ɛ nɛ ‑Yusu a ‑tɩ ‑mɔ lɛ.
lɛ'bɔɔdiidɛ; Kʋkɔnyɔ ‑Yusu 'Klɩsʋ a lɛ'bɔɔdiidɛ (Sainte Cène)
Luk 22.14-20; 1Kol 11.17-34.
lɛlenyɔ; Nyɩsʋa a lɛlenyɔ (ange)
'Kɩ Nyɩsʋa a lɛlenyʋ nɩ 'ʋ Nyɩsʋa 'hʋɩ. Ʋ 'yɩ ‑tonyibli 'pa‑. Ʋ mɔ 'kuodʋ* ‑bɩ ꞊nɩɔ. 'Bʋ mɔ, 'bʋ 'yɩ 'waa dɩɔnʋ nyibli yɩ ‑tɔɔ ‑nɩ, nyibli 'yɩ 'lɩ꞊ɩ 'lɩ ‑wɛ bʋ 'ye ꞊nʋ.
Ʋ nʋ‑ Nyɩsʋa yɩ lɛ le, 'kɩ bʋ nu 'a ‑kʋan. 'Waa ‑kʋan, nɔ‑ mɔ bʋ ꞊tu ‑tonyibli 'yie: Nunu 12.6-11; 27.23; Heb 1.14. Ɛ kɔ ti, Nyɩsʋa 'ɛ yɩ ꞊nʋ le, 'kɩ bʋ pʋ nyiblo ꞊dʋ titie.
Nyɩsʋa a lɛlenyʋ a 'mʋ, 'waa nyiblo gbagbʋ a 'nyrɛ mɔ Mikaɛ: Judɩ 9. Ɛ kɔ Nyɩsʋa lɛlenyɔ gbagbʋ ‑bɩ. 'A 'nyrɛ mɔ Gabriɛ: Luk 1.19, 26.
lɛ'mimle a gblegble (fêtes)
Lɛ'mimle a gblegble, nɔ ‑Juukʋɛ* ni la, 'kɩ 'lɩ 'yrʋ 'kwli. Lɛ'mimle a gblegble a 'mʋ, ‑Juukʋɛ ni la ꞊nʋ nɩ, 'kɩ ʋ 'mʋ la Nyɩsʋa 'nyrɛ lɛ pʋ, 'a ꞊wlʋ a yɩnɩnɔ, kɔ ‑tɛblɩ ‑mʋ', ɛ ni la ꞊nʋ 'yi ꞊hlɔn lɛ a ‑tɩ.
1. Lɛ'mimle, 'kɩ 'ʋ Nyɩsʋa a 'kagbaʋ* a ‑ta' (fête de la Dédicace) Saan 10.22. Lɛ'mimledʋ a 'mʋ, ʋ dɛɛ ꞊nɛ ‑Nyrɛ a lɛ'mimle ‑wɛ. Ɛ nɔ‑ nu꞊o, lɛ'mimle a 'mʋ a ti 'yri, ‑Yusu 'ɛ pʋ la lɛ, ‑ɛ mɔ, ɛ nɔ‑ yɩ nyibli ‑nyrɛ ‑nyi: Saan 9.5.
2. Pakɩ (Pâque) Mat 26.2, 5, 18-19. Pakɩ, nɔ‑ mɔ ‑Juukʋɛ a lɛ'mimle gbagbʋ, 'kɩ 'lɩ 'waa lɛ'mimle a pɛpɛ 'nyɩ. Pakɩ a 'mʋ, ɛ ꞊hɛn 'nyrɛ kɩ꞊tɩta, Pakɩ a ti 'yri, Yisraɛkʋɛ pɩ la 'lɩ꞊ɩ 'waa dɩɔnʋ 'kwli lɛ, ‑tɛ Nyɩsʋa nu la 'lɩ 'waa ꞊kodɛ a 'klɩ a bʋ‑hɩha, 'kɩ 'lɩ Esipʋblʋgba* 'kwli. 'Tɩ‑ ʋ 'mʋ la 'lɩ 'blʋ a 'mʋ 'kwli 'hrɩ, ɛ lee la ‑Juukʋɛ nɩ, ‑ɛ mɔ, 'a ‑nɛ 'fanble 'bʋ nɩ 'ʋ, bʋ 'la 'blayu*, ʋ 'mʋ 'a ‑hlʋ 'waa 'kayu a 'maji a wanɩ 'yri lɛ hri, 'ɛ le 'a lɛlenyɔ* ꞊dʋ, 'kɩ bʋ 'la 'a ‑nɛ 'kayu a yɩ‑hɛyu nyɩbɛyu, 'kɩ 'lɩ Esipʋkʋɛ 'nyɩ. ‑Tɛ Nyɩsʋa a lɛlenyɔ a 'mʋ, ɛ 'ye ‑hlʋ ‑mʋ', ‑Juukʋɛ hri 'waa wanɩ 'yri lɛ, ‑ɛ ‑bɩ ɛ ꞊ta 'kayu a 'mʋ kɩ, 'ɛ 'yɩ 'lɩ 'yu 'lɩ 'laa ‑nɩ. Ɛ nɔ‑ kɔ ‑tɩ Pakɩ a lɛ'mimle a ti 'yri, 'kɩ 'lɩ 'a ‑nɛ 'kayu ꞊dʋ bʋ, ‑Juukʋɛ 'ʋ 'lɛ 'blayu, 'ʋ yɩ꞊ɩ di.
3. Pakɩ a ti 'yri, yɩ‑hɛ‑nyrɔwɔ, 'kɩ ʋ yɩ 'ʋ 'flɔɔdʋ ‑mʋ', ‑ɛ kɔ ‑mɔ ʋ 'yɛ nɩ pʋ 'lɩ 'yaadɛ 'ʋ ‑dii ‑nɩ: Mat 26.17;... Ɛ mɔ lɛ'mimle ꞊nɩɔ ‑wɛ (Fête des pains sans levain). Ti ‑mʋ' ‑kɔ 'yri ‑Juukʋɛ ‑hʋɛn la 'lɩ Esipʋblʋgba 'kwli, ʋ 'yɩ la ti ‑kɔ, 'kɩ bʋ di la 'flɔɔ a 'yɩya ‑ple, 'tɩ‑ ʋ 'mʋ꞊ʋ pi. Ɛ nɔ‑ kɔ ‑tɩ lɛ'mimle a 'mʋ a ti 'yri, ‑Juukʋɛ 'ʋ yɩ la 'flɔɔdʋ a 'mʋ di, ‑ɛ kɔ ‑mɔ ʋ 'yɛ nɩ pʋ 'lɩ 'yaadɛ.
4. Papʋɛ a lɛ'mimle (Fête des Tabernacles ou des Tentes) Saan 7.2-52. Lɛ'mimle a 'mʋ a ti 'yri ‑Juukʋɛ ni dɔdʋ, ‑ɛ nu꞊o, 'cɩcɛti ‑hi nɩ. Ti a 'mʋ, 'bʋ nyre 'ʋ, ʋ pɩ papʋɛ, 'ʋ yɩ 'lɩ꞊ɩ bʋ ‑wlee ‑nɩ, 'kɩ 'lɩ 'wee nɩ ‑do 'kwli, ʋ 'mʋ 'lɩ꞊ɩ 'waa dɩɔnʋ 'kwli lɛ pʋ, ‑tɛ 'waa 'baɩnʋ nu la, 'ʋ nɛ la 'blʋgbɩ ‑mʋ', nyiblo 'yɩ la 'lɩ kɩ 'ti 'kwli lɛ, 'kɩ 'lɩ 'yrɩ a ‑wlɩ nɩ 'hʋɛn 'kwli, 'tɩ‑ 'ʋ pa la 'lɩ 'blʋgba ‑mʋ', Nyɩsʋa ‑nyi la ꞊nʋ, ‑ɛ mɔ Kanaablʋgba* 'kwli.
5. Patɩkɔtɩ (Pentecôte) Nunu 2.1; 20.16; 1Kol 16.8. Ɛ mɔ ‑Juukʋɛ a lɛ'mimle gbagbʋ ꞊nɩɔ ‑wɛ. Patɩkɔtɩ ꞊hɛn 'nyrɛ ‑nyrɔwɩ a ꞊wlɩ nɩ 'hʋɛn ꞊tu 'ʋ ‑pu. Pakɩ a lɛ'mimle 'bʋ ‑wɛ 'lɩ, ‑nyrɔwɩ a ꞊wlɩ nɩ 'hʋɛn ꞊tu 'ʋ ‑pu a 'mɩa 'yri, 'kɩ ʋ ni lɛ'mimle a 'mʋ.
Ti a 'mʋ 'yri, ʋ yɩ 'mle lɛ, 'ʋ ni dɔdʋ, 'waa 'cɩcɛ‑tɛblɩ a ‑tɩ. ‑Tɛ ‑mʋ' Nyɩsʋa nu la, 'ɛ ‑nyi la Mose* 'a tete*, ti ‑hi la a ti 'yri, 'kɩ 'ʋ 'waa ‑ta', 'kɩ 'lɩ dʋgba ‑mʋ', ‑ɛ mɔ Sinai* ꞊hlɔn.
Ti ‑bʋ 'yri, Patɩkɔtɩ a ti 'bʋ nyre 'ʋ, ‑Yusu a nyibli yɩ ‑hie꞊e 'lu ‑mɔ lɛ, ‑tɛ ‑mʋ' Nyɩsʋa nu la, 'ɛ ‑nyi 'a ‑Hihiu* 'a yɩ‑hɛnyibli ‑mʋ', ‑ʋ kuo la ‑Yusu ꞊wlʋ* yɩ (Nunu 2.1-4).
'lɩ꞊tɩɔlɛ; 'a dɩɔnʋ a 'lɩ꞊tɩɔlɛ (humilité)
Lɔtɩ (Lot)
Luk 17.28-32; 2Pi 2.7. Ɛ mɔ Hara a 'yu ꞊nɩɔ, Hara, ‑ɛ mɔ Abrahamʋ* a 'dɩayɩ 'cɩmɩɛ. ‑Hre Sodɔmʋdɩɔ a klɛ‑hɩhɩalɛ.