3
C, c
꞊cicie (jeûne)
Ɛ mɔ la ‑Juukʋɛ* a dɛ ꞊nɩɔ, 'kɩ bʋ 'yɛ nɩ di la dɛ, bʋ ꞊ci la, 'kɩ 'lɩ ti gbi 'kwli, ‑ɛ di꞊e nu, ʋ 'mʋ la Nyɩsʋa a ‑tɩ 'yi 'bʋa ‑nɩ. Dɛ ꞊cicie ꞊hɛn 'nyrɛ, ɛ nɔ‑ mɔ nyiblo ‑bʋ, ‑ɛ yɩ ꞊ci, ɛ yru꞊o nɩ, ‑ɛ mɔ, ɛ nu dɛ 'kuku*, 'ɛ ꞊tɩʋɛ 'lɩ 'a dɩɔnʋ 'lɩ, 'kɩ 'ʋ Nyɩsʋa ye'. ‑Hre Mat 6.16-18; Mak 2.18-20; Nunu 13.2-3; 14.23; 1Kol 7.5.
‑cɩ a kʋklɔ ‑Hre 'kuo a dɩda a klɛ‑hɩhɩalɛ.
‑cɔhlʋn (sacrifice)
'Kɩ 'lɩ 'yrɩ* 'kɩ a Nyɩsʋacrɩɛn 'kwli, ʋ 'crɩɩ 'lɩ꞊ɩ nɩ, ‑tɛ Nyɩsʋa ‑nu, 'ɛ tʋɛ la 'a dakɔ, ‑tɛ ‑mʋ' ʋ di la 'a ‑cɔhlʋn a pielɛ nu.
Ɛ kɔ la ‑cɔhlɩn a gblegble. Ɛ kɔ ‑cɔhlʋn, nyibli yɩ la Nyɩsʋa ‑pie ‑nɩ, ‑ɛ di꞊e nu, Nyɩsʋa 'mʋ 'waa dɛ 'kuku* 'wʋwla ‑nɩ. Nyiblo 'bʋ nu dɛ 'kuku, ɛ blɛɛ 'kʋkʋʋ yɩ. Ɛ 'yɩ wɛn yɩ ‑blɛɛ ‑nɩ, 'kɩ Nyɩsʋa bʋ wɛn wɛn 'a dɛ kɩ. ‑Tɛ ‑Yusu 'yɛ la 'nɛ‑ 'klɔ ‑bʋ kɩ nɩ di, Nyɩsʋa a dakɔ a nyibli ‑hɛ la 'wlugba‑tɛblɩ. 'Wlugba‑tɛblɩ a 'mʋ, ʋ nʋ‑ 'kʋɩ la, 'kɩ 'ʋ 'waa dɛ 'kuku a ‑ta', ‑ɛ di꞊e nu, Nyɩsʋa 'mʋ wɛn, 'kɩ bʋ 'wʋwla 'waa dɛ 'kuku, ɛ 'mʋ 'waa dɛ 'kuku a 'mʋ, 'a ‑tɩ ‑mɔ ‑hru. Nyibli a 'mʋ, ɛ 'yɩ 'waa ꞊gbɛtʋ 'pa‑, ʋ 'nɩ 'la꞊a la 'wlugba‑tɛblɩ a 'mʋ, kɛɛ, 'kɩ ʋ yɛ la 'lɩ꞊ɩ Nyɩsʋa a 'kagbaʋ* a ‑yaa 'kwli, 'ʋ yɩ꞊ɩ Nyɩsʋa a ‑cɔhlʋnpinyʋ ‑nyi, ‑ɛ di꞊e nu, ‑cɔhlʋnpinyʋ a 'mʋ, ʋ 'mʋ Nyɩsʋa a ‑cɔhlʋn pi, 'kɩ 'ʋ nyibli a 'mʋ, 'waa ‑ta'. 'Wlugba‑tɛblɩdʋ a 'mʋ, ʋ nʋ‑ mɔ blibɩʋ, kɔ 'blabɩʋ, kɔ wlibɩʋ, ‑ʋ 'yɩ la nɩa ‑nɩ, ‑ʋ ꞊cɛɛ 'ʋ yɩ. ‑Hre Mat 9.13; Mak 12.33; Rɔm 12.1; Heb 9.6-10, 18.
‑Tɛ ‑Yusu yɩ la nɩ 'kʋɩ, nyibli ‑bʋ, ‑ʋ kuo ꞊nɛ ꞊wlʋ* yɩ, nʋ‑ kɔ ‑cɔhlʋn ɛ ‑hɛ, ‑ɛ di꞊e nu, Nyɩsʋa 'mʋ 'waa dɛ 'kuku 'wʋwla ‑nɩ.
Ɛ kɔ la ‑cɔhlʋn ‑bɩ, nyibli 'ʋ yɩ la꞊a pi, 'kɩ 'ʋ Nyɩsʋa a 'wio a ‑nyinyie a ‑ta', ꞊haandɛ ‑mʋ', ɛ nu ꞊nʋ 'yi ꞊hlɔn lɛ a ‑ta'.
‑cɔhlʋnpiilɛ (autel)
‑Juukʋɛ* 'cibi la 'ʋ, 'ʋ 'lɛ la 'wlugba‑tɛblɩ, blablɩ bi 'lɩ yɩ, wlo, kɔ blo 'hʋɛn‑, 'kɩ 'ʋ Nyɩsʋa a ‑cɔhlɩn* a pielɛ a ‑ta'. ‑Cɔhlʋnpiilɛ a 'mʋ, ɛ mɔ la 'hɩdu ꞊nɩɔ. Ɛ nɔ‑ kɔ kɩ, ʋ yɩ la 'ʋ ‑cɔhlʋn 'ʋ ‑pii ‑nɩ.
‑Tɛ ʋ pʋ la Nyɩsʋa a 'kagbaʋ*, 'kɩ 'lɩ Jrusrɛ, ‑cɔhlʋnpiilɛ a 'mʋ, ɛ nɔ‑ mɔ 'teble gbagbʋ, 'kɩ 'ʋ Nyɩsʋa a 'kagbaʋ ye'. ‑Cɔhlʋnpiilɛ a 'mʋ, ‑gʋlʋdʋ, ɛ nɔ‑, ʋ nu la, 'ʋ pʋ la꞊a. 'Kɩ 'lɩ Nyɩsʋa a 'kagbaʋ bʋ, ɛ kɔ la ‑cɔhlʋnpiilɛ ‑wɛ, ʋ 'wlaa la ‑gʋlʋ 'lu lɛ pɛpɛ. 'Kɩ 'lɩ ‑tɩtɛ a 'mʋ, 'kɩ Nyɩsʋa a ‑cɔhlʋnpinyʋ pɩɩ 'lɩ hɩnhrʋnpʋ‑tɛblɩ 'tɔ lɛ, 'kɩ 'ʋ Nyɩsʋa a ‑cɔhlʋn a ‑ta'.
‑cɔhlʋnpinyɔ; Nyɩsʋa a ‑cɔhlʋnpinyɔ (prêtre)
Nyɩsʋa a ‑cɔhlʋnpinyʋ, ʋ mɔ la nyibli ꞊nɩɔ, ʋ ‑nyi la ‑cɔhlʋnpi‑kʋan, ‑ɛ di꞊e nu, ʋ 'mʋ la Nyɩsʋa ‑cɔhlɩn* ‑pi꞊e ‑nɩ, 'kɩ 'ʋ Yisraɛkʋɛ* a ‑ta'. ‑Yusu a ti 'yri, ‑cɔhlʋnpi‑kʋan a 'mʋ, 'kɩ 'ʋ Nyɩsʋa a 'kagbaʋ* ye', 'kɩ ʋ ni la 'ʋ꞊ʋ 'ʋ, 'kɩ 'lɩ Jrusrɛdɩɔ 'kwli. Nyɩsʋa a ‑cɔhlʋnpinyʋ a 'mʋ, 'kɩ 'lɩ nyiblo ‑bʋ, ‑ɛ mɔ Ayrɔ a ꞊tugba, ‑ɛ mɔ Lefi a 'yonʋ a ꞊tugba 'kwli, 'kɩ ʋ ‑ha la 'lɩ ꞊nʋ. ‑Hre Ayrɔ kɔ Lefi 'hʋɛn‑ a ‑tɩ a klɛ‑hɩhɩalɛ ‑wɛ.
'Kɩ 'lɩ nyibli a 'mʋ 'nyɩ, ʋ ‑hɛ la 'lɩ nyiblo, ‑ɛ di꞊e nu , ɛ 'mʋ Nyɩsʋa a ‑cɔhlʋnpinyʋ a nyiblo gbagbʋdɛ nu, 'kɩ 'lɩ 'yrʋ nɩ ‑do 'kwli. Nyiblo a 'mʋ, 'a ‑nɛ ti 'bʋ ‑wɛ 'ʋ yrɛ, ʋ ‑hɛ la 'lɩ nyiblo ‑bɩ. Nyɩsʋa a ‑cɔhlʋnpinyʋ a nyiblo gbagbʋ a 'mʋ, ɛ nɩ ‑do, ɛ nɔ‑ kɔ la 'hru, bʋ pa la 'lɩ Nyɩsʋa a 'kagbaʋ* a ꞊ŋanɩ‑gblo gbagbʋ 'kwli, ‑ɛ di꞊e nu, ɛ 'mʋ 'lɩ ‑cɔhlʋn a ‑hlʋ gba, 'kɩ 'ʋ Nyɩsʋa ye', 'a 'mumu a dɛ 'kuku* kɔ ‑tonyibli a pɛpɛ a dɛ 'kuku, ʋ ‑nu a ‑tɩ.
Ɛ kɔ la ‑cɔhlʋnpinyʋ ‑bɩ, 'ʋ dɛɛ la ꞊nʋ ‑cɔhlʋnpinyʋ gbagbɩ. Ʋ nʋ‑ mɔ la ‑Juukʋɛ* a 'blʋ a nyibli, ʋ kɔ 'yrʋ 'kwli a ‑cɔhlʋnpinyʋ a nyiblo gbagbʋ, kɔ nyibli ‑bɩ ‑mʋ', ‑ʋ nu la ‑cɔhlʋnpinyʋ a nyiblo gbagbʋdɛ, 'kɩ 'lɩ 'yrɩ ‑bɩ ‑hi la 'kwli, kɔ nyibli gbagbɩ ‑bɩ bi 'lɩ yɩ, ‑ʋ pɩ la ‑cɔhlʋnpinyʋ a ꞊tugba.
'cʋɛ; ‑Yusu 'Klɩsʋ a 'cʋɛ (église de Jésus Christ)
Mat 16.13-20; Nunu 2.42; 1Kol 12.12-30; Ef 1.22-23; 2.19-22; 4.1-16; 5.21-33; Kolɔ 1.15-20; 'Lɩlɛ 19.5-10.
'Cʋɛ a naanyʋ (pasteurs, anciens); 'cʋɛ a 'yie꞊tunyʋ (dirigeants d'église, épiscope), 'cʋɛ a ‑hɛɛnyʋ (diacres).
Tɔɔlɛ ‑mʋ', ‑ɛ kɔ 'lɩ 'waa 'ʋblɛ꞊tutuo, kɔ ‑tɛ 'waa 'yrinaabʋɩ kɔ bʋ nɩ 'mʋ a ‑ta', ɛ nɔ‑ ‑bʋ: Nunu 14.23; 1Tim 3.1-13; 5.17-22; Tit 1.5-9; Nunu 15.1-35.
꞊Tɔwin, 'kɩ 'ʋ 'cʋɛ a naanyʋ ‑mɔ: 1Tim 4.1-16; 6.11-21; 2Tim 2.1-26; 3.10-17; 4.1-5; 1Pi 5.1-6.