Winbʋɩ a klɛ‑hɩhɩalɛ
A>1 | B>2 | C>3 | D>4 | E,Ɛ>5 | F,G,Gb>6 | H>7 | J,K>8 | L>9 | M>10 | N,Ny>11 | O,P,R,S>12 | T>13 | W>14 | Y>15
1
A, a
Abɛlɩ (Abel)
Mat 23.35; Luk 11.51; Heb 11.4; 12.24. Abɛlɩ, nɔ‑ mɔ la Kaɛn a 'dɩayɩ gbe. Adamʋ, nɔ‑ mɔ 'waa 'baɩ, Ɛfʋ 'ɛ mɔ 'waa 'dii. ‑Hre Kaɛn a ‑tɩ a klɛ‑hɩhɩalɛ.
Abrahamʋ (Abraham)
Nɔ‑ mɔ Yisraɛkʋɛ a 'baɩ gbagbʋ. See la a ti 'yri, Nyɩsʋa 'ɛ pʋ la 'lɩ꞊ɩ, ‑ɛ mɔ, ɛ di ‑nyi la Abrahamʋ 'blʋgba yrayrʋ, ‑ɛ di꞊e nu, ɛ kɔ 'a 'yonʋ a 'yonʋ a ꞊hrɩn 'hʋɛn‑, ʋ 'mʋ la 'lɩ 'ti. Dɛ a 'mʋ a ‑tɩ, Nyɩsʋa lee la꞊a nɩ, ‑ɛ mɔ, bʋ ‑hɔn la 'lɩ 'a 'blʋgba 'kwli, bʋ mu la 'blʋgba yrayrʋ a 'mʋ lɛ ꞊mʋɔ. Abrahamʋ a 'mʋ, ɛ ꞊tuu la 'ʋ Nyɩsʋa a win nɩ, 'ɛ bi la 'hru wlɔn, 'ɛ na ‑nana, 'kɩ 'lɩ 'yrɩ ‑hʋɔhʋɩ 'kwli, 'ɛ nyre 'lɩ 'blʋgba a 'mʋ 'kwli. 'Blʋgba a 'mʋ, ʋ dɛɛ ꞊nɛ Yisraɛ*.
Ti ‑mʋ' ‑kɔ 'yri Nyɩsʋa lee 'ʋ Abrahamʋ, 'kɩ bʋ ‑hɔn la 'lɩ 'a 'blʋgba 'kwli, ɛ ꞊tu 'yrɩ*, ɛ kɔ Abrahamʋ 'hʋɛn‑, 'ɛ lee la꞊a, ‑ɛ mɔ, ɛ kɔ 'a 'yonʋ 'hʋɛn‑, ʋ di mɔ Nyɩsʋa a dakɔ, Nyɩsʋa 'mʋ ꞊nʋ 'yie ꞊tu, 'bʋ mɔ 'bʋ yɩ 'ʋ 'a win nɩ ꞊tui ‑nɩ.
Abrahamʋ kɔ la nʋgba. Nʋgba a 'mʋ, 'a 'nyrɛ mɔ Sara. Ʋ 'yɩ 'yu ‑kɔ, 'ɛ gba꞊a ‑gbagba, 'ʋ ‑wɛ 'yi. ‑Tɛ ʋ ‑wɛ 'kɩ 'yi, 'tɩ‑ Nyɩsʋa 'ɛ nu ꞊wlɩlɛkɛɛdɛ, Sara 'ɛ kɔ 'yu, 'ʋ ꞊tue꞊e Yisakɩnyrɛ.
Yisakɩ, ‑mu ‑mumu, ꞊nɩ kɔ ‑nɛ nʋgba, 'a 'nyrɛ 'ɛ mɔ Rebeka, 'a nʋgba Rebeka a 'mʋ, ɛ kɔ꞊ɔ 'hʋɛn‑, 'ʋ kɔ ꞊yrupʋyonʋ. 'Waa 'nyrɛ mɔ Esau kɔ Sakɔbʋ 'hʋɛn‑. Kɛɛ, ‑tɛ ɛ gba ti, ‑ɛ ‑bɩ Nyɩsʋa ꞊tue Sakɔbʋ Yisraɛnyrɛ. Ɛ nɔ‑ nu꞊o, 'ʋ dɛɛ ‑Juukʋɛ* Yisraɛkʋɛ.
Sakɔbʋ a 'mʋ, 'a nʋgbɩ, ɛ kɔ la, 'a 'yɛ ‑bɩ a 'nyrɛ mɔ Lea, 'a 'yɛ ‑bɩ a 'nyrɛ 'ɛ mɔ Rasɛlɩ. Lea kɔ Rasɛlɩ 'hʋɛn‑, ʋ mɔ 'dɩayɩnʋ ꞊nɩɔ; Sakɔbʋ, 'ɛ kɔ nʋgbɩ nɩ 'hʋɛn ‑bɩ ‑wɛ. Ɛ kɔ 'a nʋgbɩ nɩ ‑hɛn a 'mʋ 'hʋɛn‑, ʋ kɔ 'yonʋ nyɩbɛpʋ nɩ ‑pu ꞊tu 'ʋ 'hʋɛn. 'Yonʋ nyɩbɛpʋ nɩ ‑pu ꞊tu 'ʋ 'hʋɛn a 'mʋ, ʋ nʋ‑ mɔ Yisraɛkʋɛ a ꞊tugbi nɩ ‑pu ꞊tu 'ʋ 'hʋɛn ‑mʋ' a 'baɩnʋ. 'Kɩ 'lɩ 'Lɩlɛ'yeecrɩɛn 'kwli, 'Lɩlɛ 7.4-8, 'kɩ ꞊tugbi a 'mʋ, 'waa 'nyrɛ 'crɩɩ 'lɩ.
Adamʋ (Adam)
Luk 3.38; Rɔm 5.14; 1Kol 15.22,45; 1Tim 2.13-14; Judɩ 14. Adamʋ, nɔ‑ mɔ la yɩ‑hɛnyiblo, Nyɩsʋa nu la. Nyɩsʋa nu ‑pla, 'ɛ nu꞊o. Adamʋ a 'mʋ, ɛ kɔ 'a nʋgba Ɛfʋ 'hʋɛn‑, nʋ‑ mɔ la yɩ‑hɛnyibli, ‑ʋ 'wla la Nyɩsʋa a tete*, ‑ɛ ꞊hɛn 'nyrɛ, ʋ nʋ‑ mɔ la yɩ‑hɛnyibli, ‑ʋ nu la dɛ 'kuku*. Kʋɛ la 'ʋ ti a 'mʋ 'yie bʋ, ‑tonyibli ni dɛ 'kuku. Ɛ mɔ ꞊han‑tɩ ꞊nɩɔ, Adamʋ, ɛ nu la dɛ 'kuku, kʋɛ 'lɩ ti a 'mʋ 'yie bʋ, ‑tonyibli 'ʋ ni dɛ 'kuku ‑wɛ. Kɛɛ, ‑Yusu 'Klɩsʋ ‑mɔ ‑bɩ, ɛ nɔ‑ wa nyibli, ‑ɛ ‑ha 'lɩ ꞊nʋ dɛ 'kuku a 'klɩ bʋ, ‑ɛ ‑nyi ꞊nʋ 'klɔ yrayrʋ, ‑ɛ 'yɛ nɩ ‑wɛ 'lɩ. 1Kol 15.45.
Aglipa (Agrippa) ‑Hre Helɔdɩ a ‑tɩ a klɛ‑hɩhɩalɛ.
Akaiblʋgba (Achaïe) 'A 'nyrɛ ‑bɩ mɔ Glɛkɩkʋɛblʋgba.
alowɛsɩ (aloès)
Saan 19.39. Ɛ mɔ ‑cɩdʋ ꞊nɩɔ, ‑ɛ pɩ hɩnhrʋn. Tugbɛdʋ a 'nie, nɔ‑ ʋ ni, 'ʋ ni ‑cɩ a 'mʋ. ‑Juukʋɛ 'bʋ yɩ la 'kʋkʋkui a 'hʋɩ ‑mɔ nɩ ‑wɛ, 'waa 'ʋ‑ha‑tɩ, ‑cɩ a 'mʋ, ɛ nɔ‑ ʋ plʋɩ ꞊nʋ lɛ.
Ayrɔ (Aaron)
Luk 1.5; Nunu 7.40; Heb 5.4; 7.11; 9.4. Ayrɔ mɔ la Lefi a 'yonʋ a 'yu ꞊nɩɔ. Lefi a 'mʋ, ɛ mɔ la Sakɔbʋ* a 'yu nyɩbɛyu ‑bɩ, 'kɩ 'lɩ 'a 'yonʋ nyɩbɛpʋ nɩ ‑pu ꞊tu 'ʋ 'hʋɛn ‑mʋ' 'nyɩ. Ayrɔ, nɔ‑ mɔ la yɩ‑hɛnyiblo, ʋ ‑ha, 'kɩ bʋ ‑hɛ Nyɩsʋa a ‑cɔhlʋnpinyɔ*. Ti a 'mʋ 'yri, kɛ‑ Nyɩsʋa pʋ la, ‑ɛ mɔ, nyibli ‑mʋ', ʋ di Yisraɛkʋɛ a ‑cɔhlʋnpinyʋ ‑mɔ' nu, ʋ blɛɛ yɩ bʋ pʋ Ayrɔ꞊tugba, ‑ʋ mɔ Lefipʋ.
Ayrɔ, nɔ‑ mɔ la Mose* a 'dɩayɩ nyɩ'ka. Ʋ nɩ 'hʋɛn a 'mʋ, ʋ yɩ la 'nɩ ‑hɩhɛ ‑nɩ, ti ‑mʋ' ‑kɔ 'yri Yisraɛkʋɛ ni la 'ʋ ꞊kodɛ, 'kɩ 'lɩ Esipʋblʋgba 'kwli. Ʋ nʋ‑ naa Yisraɛkʋɛ, 'ʋ ‑ha 'lɩ ꞊nʋ ꞊kodɛ a 'klɩ bʋ.