2
1 लेकिन तीतुस अम कलिसिया तेनकू सही सिकछाम चेडकू । 2 अवुर हड़म हड़म कू होम चेडकू, हेंकू अपन हाथ गोड़ सकुर तेकू दोहोनू, अवुर एटा: कुहो जीवन तकू ञेंलकेते आदर कू लयीक अवुर समाझदार कू दोहोनु। बढ़ियाँ तेकू बिसवासे, एटा: कू परेम महल रेकू दोहोनु, अवुर संकट मेजू: रेहो बोरो कोःते बिसवास तकू अलो कू टोवीजू।
3 नेन घयते बुढ बुढी कुहोम चेडकू, भगवान रा: मन मरजाद होया: घयते हेंकु रा: चाल-बेवहर दोहोनु । अवुर हेंकू मतवाड़ी: कू अवुर उपता: कू अलो कू दोहोनु । बलकी हेंकू छपवाड़ी हपामोन कुहो बढ़ियाँ बढ़ियाँ: टेबो: चेचेड कू दोहोनु । 4 ताकि हेंकू छपवाड़ी हपामोन कू दबेट कू महल रेकू दोहोनु, हेंकू अपत कू सुदा अवुर चोंडीज कू तकू सुदा परेम कू रखोवू । 5 अवुर अपन हाथ गोड़ सकुर तेकू दोहोनू, अवुर अपत कू अलो कू ठको, ओड़ा: अवुर ओड़ा: रेनकू रा: देख - रेखय दोहोनु। दयाअयु अवुर अपन अपत कुरा: टेबो: चेडय दोहोनु। ताकि अबु बिसवास यडा हेना बढ़ियाँ: खभेर रा: बारे ते गलती गिआ मेनते कनय अलो कहनी सकोऊ ।
6 नेन घयते चोंडीज कुवन कू कोड़ा कुहो चेडकू, अपन हाथ गोड़ सकुर तेकू दोहोनू । 7 तीतुस अम हो सींड़ टेबो: रे बढ़िया: काम मी कामू । ताकि चोंडीज वनकू कोड़ाकू हो ञेंलकेम ते बढ़ियाँ: काम कू कामा । जो कुछ मी चेडकुआ, हेनारे ईमानदारी अवुर अँजोम केते होड़कू अपनोवे लायीक दोहोनु । 8 एक दम बढ़ियाँ सिकछा चेडकू महल रेम दोहोनु । हेंडे बिरोधी कू गलती उडूंग रा: मोका एरो कू ञँमतेडा, अवुर कू लजियोआ ।
9 अपन - अपन मालिक कुरा: टेबो: मनो लगड नोकर कुम चेडू । सींड़ टेबो: रे मालिक तकुकू खुसू अवुर उलटीया:ते अलो कू टेबो: मिड़ा: वकू । 10 अवुर हेंकू अनाकू लगड कनर अलो कू दोहो चोरायू, हेंकू सींड़ काम रे ईमानदार कू दोहोनु, अवुर हेंकू भरोसा वकु: लायीक कू दोहोनु । ताकि हेंकू कू ञेंलकेते एटा: कुहो अबु रेनिय उऊबराय भगवान रा: सिकछा कू अपनोआँ।
11 कहेकि सींड़ होड़कू उबर कू लगड भगवान दया केनते नआँ दुनिया रे एसु मसीय कुलतेडा । 12 अवुर भगवान अनेज रा: दया तेय चेडयड बुआ । भगवान मेने बेसवा: घयते जिनगी अलो बु बितो, अवुर दुनिया रा: मवोज मस्ती बगी वते नआँ दुनियाँ रे दोहोन मेन दिन अपन हाथ गोड़ सकुर केते सही काम रेबु दोहोनु, अवुर जेयसे भगवान बेसवबु: हेन घयते बु जियोऊ। 13 अबु मिनियें टंग बढ़ियाँ: असरा इदाना। एसु मसीह अबु रेनिय भगवान अवुर उऊबराय हवे। हेंय सक्ति रा: साथ ते नआँ दुनिया रे फिरीय मेजुआ। हेना मेन दिन नेन घयते बु जियोऊ। 14 एसु मसीह अनेज रा: मरजी ते सींड़ होड़कू लगाडीय बलिदान एना । ताकि गलत होर वरि बंचो केबु ते हेंय लगड बढ़िया ते जिनगी बु बितो । अवुर हेंय अपन होड़कुय बनो केडबुआ, हेना ते अबु बढ़ियाँ - बढ़ियाँ: काम लगड तयार बु दोहोनु । 15 हेना ते तीतुस इंञ चहो: तना, अम केरेत रेनकू बिसवासी कू जो कुछींञ लाय वडमिआँ हेनाम समझो कू महल रेम दोहोनु। गलत काम हेंकू सुधरो कुमू, अवुर नआँ सींड़ ललाय लगड अम थरे हाँक इदाना। अम चेडकू महल रेम दोहोनु। अवुर अले तीतुस राः टेबोः एरो ले अँजोम तेड मेनाआँ टेबोः राः मोका कनय अलोम ओवा।