तीतुस 1

THE EPISTLE OF PAUL THE APOSTLE TO

TITUS

तीतुस लगड पवलुस ओल केडा चिठा

तीतुस लगड पवलुस ओल केडा चिठा

¹ इंञ पवलुस, एसु मसीह रेनिय पेरेरित हवे, अवुर भगवान रेनिय सेवेखिया हवे। इंञ नआँ चिठा, तीतुस, अम लगाडिंञ ओलयाडा भगवान चुनो केडकुः हेंकू बिसवास रे मजबूत कू लगड अवुर एसु मसीह राः सत बढ़ियाँ ते चेडकू लगड, नआँ चिठांञ ओलयाडा ताकि सत कू चेडको:ते भगवान रा: मन घयते कू जियो सकोऊ। ² नआँ सत चेडुः रे बिसवासी कू भगवान सुदा हमेसा दोहोन हेना जिवन राः असरा रेकू दोहोना, कभी मेने जलिया: हेनी भगवान धरतीय बनो तेड वरि पहिल ते अनेज सुदा दोहोन हेना जिवन एमेय लगाडीय जबान केडा। ³ भगवान अनेज रा: सही समय रे अनेज रा: बढ़ियाँ खभेर इञाँ: परचार रा: दोवारा तेय देखर तेडा। अवुर हेना खभेर परचारे लगड अबु रेनिय उऊबाराय भगवान रा: हुकूम रा: अनुसार ते इंञींय जिमा वडा। ⁴ नआँ चिठा तीतुस अम लगाडींञ ओलयाडा अलँग बना होड़ परभू एसु मसीह थरे लँग बिसवास यडा , हेना ते अम इंञाँअय अपन कोड़ा होपोन घयतेंञ मनो यड मिआँ। तीतुस इंञ भगवान अपा अवुर अबु रेनिय उऊबाराय थरे इञाँ: बिनती हवे, अम लगड दया अवुर मन रे सान्ति तेम दोहोनू।

⁵ बंचो केना काम मी पुरा लगड, अवुर सहर सहर रा: कलिसिया ते, जेयसे इंञ लाय वड मिआँ, हेनेन घयते मुखिया कू चुनो लगड केरेत सहर रेंञ अटूड मिआँ। ⁶ चुनो कु: हेंकू मुखिया कू कनय अलो बदि सको: घिया: कू दोहोनु, कन्याँत कुहो मिनयेड होड़कू दोहोनु, अवुर चोंडीज कू तकू हो एसु थरे बिसवासे: कू दोहोनु, इंग अप रा: टेबो: मनो कू दोहोनु, अवुर हेंकू लुचा - लफाँगा अलो कू दोहोनु । ⁷ अवुर कलिसिया रा: देख - रेख हेनी भगवान रा: सेवा लगड जिमेदार इदाना, हेना ते हेंय थरे कनर बदि अलो दोहोनु। अपन मन - मनी ते कामेअयु, हलीते धकोअयु, मतवाड़ीअयु, ञेंञेडय, अवुर गलती काम केते पेयसा कामय लगड लोभियाअय अलोय दोहोनु । ⁸ हेंय पर - पोहना कू आदर इजेतयू अवुर बढ़ियाँ: काम लगड खुसी ते दोहोनायू, अवुर समझदारायू, निनीयोवायू, अवुर हेंय पवितरय दोहोनु अवुर अपन हाथ गोड़ सकुर ते दोहो नयू। ⁹ हेंय एसु मसीह रा: बारे ते लाय वडीया हेना बढ़ियाँ: खभेर रे बढ़ियाँ ते बिसवासे: हेनी दोहोनु, ताकि हेंय एटा: कुहो सही सिकछाय एमके कुतेय लाय बहालिकू, गलत सिकछा एम हेंकू रा: गलती लाय केते टेबो: जपनो कु: हेनी दोहोनु ।

¹⁰ कहेकि अखीर होड़कू सही सिकछा रा: बिरोध हेंकू इदान कुआ, नेकू मुखिया कू रा: टेबो: मेने कू मनोआ, अवुर नेकू बे मतलोब रा: टेबो: कू टेबोआ, अवुर एटा: कुकू लाय बहकोआ। नेकू यहूदी कू वरि मसीह रेकू मेजकेना। अवुर एटा: होड़कू मसीह रे मेजू: लगड खतना करेक जरूरी इदाना मेनते कू चेडकुआ। इंञ हेन कुरा: बारे तेंञ लाय यडा । ¹¹ नेकू घिया: कू गलत सिकछा चेचेड अलो पे इकावाकू । कहेकि नेकू सिरिफ पेयसा कमाय लगड गलत सिकछा लाय केकुते , सींड़ ओड़ा: ओड़ा: भर रेनकू बिसवास वरि कू बहको गोत्ते कुआ । ¹² केरेत रे दोहोएनय हेंकू रेनिय मियाँ होड़ कनहुनाय हेंडे दोहोएन कू होड़कू रा: बारे तेय लाय तेडा, किदो “ नआँ रेनकू हरदाम जलया तेकू टेबोआ, अवुर नेकू बवुड़ केनकू जानवर कू घयते कनारा सही - गलत मेने कू बुझोआ, कोढ़ियाअकू अवुर नेकू हरहाअकू ।” ¹³ अवुर नआँ टेबो: सही मेते सीरित गिआ। हेना ते हेंकू घिया: कू कड़ाई ते दबेट कू महल रेम दोहोनु, ताकि हेंकू सही बिसवास वरि अलो कू बहकोः लगाडू ¹⁴ नेकू यहूदी कुरा: रोका बनोताः कतह रे धियान अलो कू लगोवे। अवुर एसु मसीह रा: सत वरि बहको केनकू राः टेबोः रेहो अलो कू धियाने। ¹⁵ भगवान रा: नजेर रे सोच - बिचार तकू सुद्ध गिआ हेंकू लगड कनारा चीज असुद्ध कोवाआ। जे जे बढ़ियाँ: खभेर रे मेने बिसवासे: कू अवुर खराब होड़कू लगड सींड़ असुद्ध गिआ। कहेकि नेकू रा: सोच - बिचार पाप ते भरो केना, अवुर सही काम अवुर गलत काम मेने कू चिन्हो सकोआ। ¹⁶ नेकू कहनियाँ भगवान दोले पपाड़ीआ, लेकिन हेंकू रा: चाले बेवहर तेकू पता जोमा। नेकू भगवान मेने कू पपाड़ीआ। अवुर हेंकू एटा: कू मेने बेसवा: घिया: काम कू कामा, अवुर नेकू भगवान रा: टेबो: मेने चेड कू हवे, नेकू कनारा बढ़ियाँ काम कारे लयीक कोवा कुआ ।