तीतुस 3

¹ विसवासी कू उहयारे लगड लाय वकुमू अधिकारी कुरा: सीमा कू रखो, अवुर हेंकू रा: टेबो: कू अँजोमे अवुर हरदम बढ़ियाँ: काम लगड तयार कू दोहोनू। ² कनय हो एटा: कू थरे जलिया ते अलो कू टेबोऊ । लड़हाँक अलो कू दोहोनू, एटा: कुरा: गलती होकू सहोवे, अवुर सींड़ होड़कू सुदा बढ़िया तेकू चाल बेहवारुऊ ।

³ कहेकि पहील अबु हो भगवान रा: बारे ते मेने बु बुझहो दोहो एनु, अवुर भगवान रा: टेबो: मेने बु चेडे दोहो एनु, अवुर भरम रे फसो केनते जे निरीता ललसा अवुर मवोज मस्ती रा: बंधन रेबु दोहो एना । अवुर एटा: कू सुदा एठेड ओड़ेंञ ते जिनगी बु बितो दोहो एनु । एटा: कू अबु कू मेरंगवाँ दोहो एनु, अवुर अबु हो हेंकू बु मेरंगवाँ दोहो एनु । ⁴ लेकिन अबु रेनिय उऊबराय भगवान अबु थरे दया केनते अनेज रा: परेमिय देखर केडा । ⁵ हेनी अबु उबर केडबुआ। अबु रा: बढ़ियाँ: काम अवुर बढ़ियाँ: चाल बेवहार ते मेने, बलकी हेंय दया केनते पवितर आत्मा रा: दोवारा ते अबुय साफ केडबुआ, अवुर अबु नवाँ जनम अवुर नवाँ जिनगीय ओवड बुआ । ⁶ भगवान अबु रेनिय उऊबराय एसु मसीह रा: दोवारा ते, हियाखोल ते पवितर आत्माय ओवड बुआ । ⁷ हेंय अनेज रा: दया ते धरमीय बनो केडबुआ, ताकि भगवान सुदा हमेसा दोहोन हेना जिवन राः हाँकीय ओवड बुआ, हेना बु असरा वताना। ⁸ नआँ टेबो: सिरीत गिआ अवुर सींड़ होड़कू लगड बढ़ियाँ गिआ अवुर फयदा गिआ । हेना ते इंञ चहो: तना, भगवान थरे बिसवास केडकू नआँ अम धियान सेते चेडकू महल रेम दोहोनु । ताकि बढ़ियाँ - बढ़ियाँ: काम रा: धियान रेकू दोहोना ।

⁹ लेकिन खुटी खनधान रा: बारे ते अवुर बे मतलोब रा: टेबो: वरि सगींञ रेम दोहोनु । अवुर यहूदी नियम रा: बारे ते होड़बादुऊ, अवुर लड़ाई - झगड़ा वरि बच - बच तेम दोहोनु , अवुर नआँ कनर फयदा कोवाआ । ¹⁰ कलिसिया रे होड़कुय अलग - तलग हेनी होड़ मिया बार एस मी समझो सोयू, हेना वरि मेनेय समझो रेदो हेंय वरि अलगे रेम दोहोनु, अवुर एटाः बिसवासी कू हेंय राः चलते ते अलो कू उजाड़ुऊ। ¹¹ नआँ घियाअय अम पपाड़ीआ किदो सत वरिय बहको यना, अवुर पापे महल रेय दोहोना, सींड़ कुकू पपाड़ीआ कि नेय बदनामी होड़ हवे।

¹² जब अरतिमास चाहे तुखिकुस इंञ अम थरेंञ कुल कींञ रेदो, दिकापुलीस सहर रे इंञ थरे मेजु: लगड मी कोसिसे, कहेकि इंञ लेयेड़ भर हेंडेंञ दोहोना । ¹³ जेनास उकील अवुर अप्पोलोस हेंकींञ रा: डगर खरचा रे कनर अलो घटो: लगड तयर केकींञ ते कुलकींञ मी । ¹⁴ तीतुस, अम सींड़ मसीही होड़कू चेडकुमू, बढ़ियाँ: काम कू कामू अवुर एटा: कुहो जरुरत पड़ो: रे सहेता कू ओवाकू। ताकि हेंकू रा: काम रा: दोवारा ते एटा: कू फयदा कू ञाँमू।

¹⁵ इंञ सुदा इदान कुआ, हेंकू हनवरि अम लगड जोहार ! अवुर बिसवास रा: चलते ते अले सुदा परेम रखो कुहो अले हनवरि जोहार मेनतेम कहनी वकू। इंञा: बिनती हवे।

अपे सींड़ कू थरे भगवान रा: दया दोहोनु।