Efantu 35
Puñoho pa piti Jakob Petel
35
Hikee hinoom,
Pútuun pa mpusok Jakob:
“Lito!
Silo incaayeno Petel,
illutam po kaaciin,
inci Pútuun pa péeyisanooliye pa ti awe ta ayyeniye ta katey púnuwi Esawu.”
2 Jakob naasok miin ma miteyoo niŋ keeyeniye ka neyoo púlooŋ:
“Nífulan pínaati pa pitaaluu innikuulanoolo inniwaso ukee wañ.
3 Innimemanoolo upusiliyaa Petel.
Falut po kaaciin kiti Pútuun pa peeyiiŋiyaam pa ti hinoom ha eeha inci iyyeniye ha ti páciite.
Pikina piyeniye niŋ inci pan óo pan pa inci nkaaye.”
4 Fiye,
nkawufan Jakob pínaati pa piteyii púlooŋ niŋ pukop pa peeyeniye pa ti unuuwii.
Jakob naahokan po púlooŋ t’etaam enuun ya enfakat ya pukol Sikem.
5 Ta nkayeniye ta pikaayu,
Pútuun pa mpúwananii ewatate enfakat ti pakan paka pakati pisaatee pa péekinkoolii pa,
ancuk an timpi áhaañiyii kawantantan kati alaakiyii.
6 Jakob naacol Lus (ekina nkasok Petel) ti mah ma miti Kanaan,
niŋ keeyeniye ka neyoo púlooŋ.
7 Toko,
naalut kaaciin naalu toko caacaw ca El-Petel (ekina eyem “Pútuun pa piti Petel”) kaatuko toko Pútuun pa mpíyisanooliye teyoo ta naayeniye ta katey púnuwoo Esawu.
8 Po lompo Debora amiikan a ati Rebeka éehinoo ya pampaani naakete,
naahokee pukol Petel t’etaam enuun enfakat.
Kápiliŋ oom hinoom nkayonkal yo “Enuun ya eti Pukooŋ pa”.
9 Pútuun pa nene píyisanoolo ti Jakob ti saatee ya eti Petel,
loho áñohooniyoo ápufulii Mesopotami,
mpisampanoo.
10 Mpusokoo:
“Caacawi Jakob,
pale aatinene yonkalee Jakob.
Písik fíyooy caacawi eficiyeno Israyel.”
Fiyuu Pútuun pa mpuluwoo caacaw ca Israyel.a
11 Nene pusokoo:
“Inci yem Pútuun pa piti sempe sa púlooŋ.
Pukool immeeŋ epuuk.
Inci fáhini aapiyeno maamaa ati síi focaa kayoŋ písii.
Pumansa efikapukee ti miin ma mitii.
12 Mah emma inci uwwufane ma Abraham niŋ Isaak,
inci fawufani mo.
Po hátikin,
inci fawufan mo lompo keesokuu maamaa.”
13 Púful toko,
Pútuun pa mpikatoo la mpiyeniye la káakup neyoo mpikaay.
14 Jakob naasiiŋan toko énankiin,
naaniis teyyo elaan apisampan yo naanuc yo niŋ miyoomeen.
15 La Pútuun pa mpúkupe la neyoo,
Jakob naalu toko caacaw ca Petel (ekina eyem “ekumpaan ya eti Pútuun pa”).
Hipukuyee ha hiti Benjamin niŋ eket ya eti Rasel
16 Jakob niŋ miin ma miteyoo nkáful Petel.
Saatee ya eti Efalata neeloŋ néelaaŋe;
fiye,
Rasel íyyiŋooliyoo,
hipuku ha hiteyoo nihiseeñ.
17 Ta Rasel naayeniye ta hipuku niŋ ñíseeña,
aloŋana ya naasokoo:
“Timpi fe,
nene cikampaani.”
18 Pale Rasel naayeno ti putum eket.
Ta naayeniye ta eket,
naalu cikampaani ca caacaw ca Ben-Oni (ekina eyem “añii ati ñíseeñayam”).
Pale Jakob naalu cikampaani ca caacaw ca Benjamin (ekina eyem “añii ati epees yáali”).
19 Fiyuu Rasel naakete naahokee ti pítin pa piti Efalata (ekina nkasok fiye Betelehem).
20 Jakob naasiiŋan énankiin ti hiyaak ha hiti Rasel.
Enánkiin eyyuu uyya toko fo fíyooy.
21 Israyel nene atoosan ékuut ya eteyoo naamuusaa Mikatal-Etel.
22 Ta Israyel naayeniye ta ti oom mah,
Ruben naahinto niŋ Piluha,
akee aal a amiikan a aŋa paapaa ateyoo naasaye ya.
Israyel náasi ho.
Ehe epuuk Jakob,
kayema ŋaasuwan niŋ pákasupak:
23 Leya epuukoo kayem:
Ruben,
añii ya áyaañ a ati Jakob,
Simeyon,
Lewi,
Juda,
Isakaal niŋ Sepulun.
24 Rasel epuukoo kayem:
Josef niŋ Benjamin.
25 Piluha,
amiikan a ati Rasel,
epuukoo kayem:
Dan niŋ Nafatali.
26 Silupa,
amiikan a ati Leya,
epuukoo kayem:
Gad niŋ Asel.
Payenkuu kayem epuuk Jakob keepukee ka Mesopotami.
Eket ya eti Isaak
27 Fiye,
Jakob naañoho lati Paapaa ateyoo Isaak ti saatee ya eti Mamule pukol Kiliyat-Alepa (ekina nkasok fiye Hepolon).
Po Abraham niŋ Isaak nkakine hínum samat nii ekaawoola.
28-29 Isaak naataak eloŋ eehaane néesuum,
naasuuŋut pikelan naaket loho ataakaa sitiil keme niŋ áwii epaakiil (180) naananf pakataama.
Epuukoo Esawu niŋ Jakob kahokoo.