Efantu 31
Jakob katey ka kiteyoo ápuful lati Laban
31
Hikee hinoom,
Jakob náasi nii epuuk Laban kasoke nii:
“Jakob acoopaa waah óo waah ewwa paapaa atoonii naataake,
ekina ewune náayenoonii usaanum.”
2 Jakob naacuk nii Laban acokutoo pinap samat nii kúcook kuu.
3 Fiye,
Ateeteyo naasok Jakob:
“Ñoho pati mah ma miti símaamayi niŋ ti miin ma mitii,
inci fayeno niŋ awe.”
4 Jakob naakooŋan kápiyonkalii Rasel niŋ Leya kati katoopoo pati kaakit ka pa naayem pa ti efaas pukoolee pa piteyoo.
5 Ta nkacole ta,
naasokii:
“Inci cukaacuk nii paapaa ataaluu acokutam pinap samat nii fa naacokaam fa kúcook kuu,
pale Pútuun pa piti paapaa atoom piyenaayeno niŋ inci.
6 Aluu nímeyimeyi fa inci iyyeniye fa páhin ti paapaa ataaluu niŋ sempeyam púlooŋ.
7 Háati fo,
naakooñam ápifaliŋ cooy ya etoom fo ñiyema ŋaasuwan.
Pale Pútuun pa pikatanutoo apukuumam.
8 Tan óo tan naasoke:
'Púlukuleen pa peesocutooliye pa piyem cooy ya etii,
' uyaan wa púlooŋ nuupuk mufuun meesocutooliye.
Tan óo tan naasoke:
'Púlukuleen pa peenakane pa ñinkaac piyem cooy ya etii,
' uyaan wa púlooŋ nuupuk mufuun meenakane ñinkaac.
9 Fiyuu Pútuun pa mpúfulane pukoolee pa piti paapaa ataaluu mpuwufanam po.
10 “Ta púlukuleen pa mpiyeniye ta casil,
inci íyyawut incuk kíceken keesocutooliye,
keetaake ufaal niŋ keenakane ñinkaac ti casil uyaan wa.
11 Maleekoo ya eti Pútuun pa neesokam ti éyawut ya:
'Jakob!
' Iññahan yo:
'Eheeyam.'
12 Neesokam:
'Háafin,
sincan kíceken ka púlooŋ keeyeniye ka casil niŋ uyaan wa:
keesocutooliye,
keetaake ufaal niŋ fotom keenakane ñinkaac.
Kaatuko inci cukaacuk eeha púlooŋ Laban naayeniyuu ha íhinu.
13 Inci yem Pútuun pa péeyisanooliye pa ti awe Petel la ansiiŋane la énankiin innuc yo niŋ miyoomeen,
insintoolo toko.
Fiye,
lito fúl ti mah emme iññoho ti mah emma ampukee ma temmo.'”
14 Rasel niŋ Leya nkañahan Jakob:
“Fo utaakaataak hitoonu ti hisaanumate ha hiti paapaa atoonii?
15 Acokaacok unii samat nii ekaawoola:
anoomanaa-nooman unii púful toko naali mañ ma mutoonii.
16 Ooto hitaaku ha púlooŋ hiti paapaa atoonii eeha Pútuun pa mpisaye ha teyoo,
hitoonii niŋ epuuk unii.
Hín eeha púlooŋ Pútuun pa mpusokuu ha.”
17 Fiye,
Jakob naalito naalapan epuukoo niŋ pakaaloo ti puñonkomoo,
18 naaŋal pukoolee pa piteyoo hátikinoo naacoopool lompo waah óo waah ewwa naataake ti mah ma miti Mesopotami,
naañak apuñoho pati paapaa ateyoo Isaak ti mah ma miti Kanaan.
19 Ta nkayeniye ta hiñaku,
loho Laban akaayaa pállaaŋe kaayiinu písaacii pa piteyoo,
Rasel náalip pínaati pa piti paapaa ateyoo.
20 Jakob naakaay peesokut Laban ati Alam waah.
Fiyuu naacaakooloo.
21 Naatey niŋ waah óo waah ewwa naataake.
Naafiitan han ha hiti Efalat naahiiŋ ti pítintiŋ pa empa nkasok pa Kileyat.
Laban kawantantan ka kiteyoo Jakob
22 Eti tílapooli eteyyo,
an naasok Laban nii Jakob ateyaatey.
23 Laban naaconcoolan pakakee ti pakanoo nkawantantan Jakob.
Kunoom isak niŋ kúsupak nkatoopanoo ti pítintiŋ pa empa nkasok pa Kileyat.
24 Pale hánant ha Pútuun pa mpíyisanoolo ti Laban ati Alam ti éyawut,
mpusokoo:
“Tah kunuu,
timpi háañi aasoke waah Jakob.”
25 Laban naatoopan Jakob loho asiiŋanaa púkuut pa piteyoo ti pítintiŋ pa piti Kileyat.
Laban lompo niŋ pakanoo nkasiiŋan púkuut pa piteyii toko.
26 Laban naasok Jakob:
“Weyme ánhine?
Aacaakoolaam-caakool incoopool epuukam púmaacul samat nii keecokee ti hikam.
27 Weyme uwune mpuus aapitey incaakoolam aasokutam waah?
Inci anti ñooti niŋ pásuuma niŋ kícimu,
pankalaŋ niŋ púkontiŋ.
28 Aakatanutam fala pusumpool niŋ púmaacul pa pakatoom niŋ keesokaam maamaa le niŋ éfuukatinool.
Pánipani aawenaawen nii awuyawuy!
29 Inci yíniyini íhinu aluu pínapaati,
pale Pútuun pa piti paapaa atii pusokaam hánant ha heemuuse ha nii:
'Tah kunuu timpi háañi aasoke waah Jakob.'
30 Fiye,
aañakaa kamma aññotane puñoho pati ekumpaan ya eti faafi,
pale weyme uwune aakati líp pínaati pa putoom?”
31 Jakob naañahanoo:
“Inci feyaafe ímmiilool nii aafalam púmaacul pa pakatii.
32 Pale naacukaa aŋa eecoope ya pínaati pa pitii,
oom an afaaket.
Hátikin pakan anii,
sincan ti wañ wa utoom,
man aafacuk waah utii incoop wo.”
Antúŋ Jakob ápannumut nii Rasel álipe pínaati pa.
33 Fiye,
Laban naanako ti ékuut ya eti Jakob,
eti Leya niŋ eti pimiikan pa pakaal paka pákasupak paka pale acukut waah.
Apúfulii ti ékuut ya eti Leya naanako ti eti Rasel ya.
34 Pale ánakumo ti ékuut ya eti Rasel,
loho Rasel acoopaa pínaati pa naawas po ti pícipa empa nanaŋ pa ti ñonkomoo ya eteyoo,
naayeno tempo.
Laban naaŋesatool,
náamaaputool ti ékuut ya púlooŋ pale acukut waah.
35 Rasel naasok paapaa ateyoo:
“Ahámpaatiin,
timpi ñíken,
inci yinaat pisiiŋo hátikini kamma inci iyyem niŋ etaam.”
Fiye,
naaŋesatool pale ayinaat hicuku pínaati pa piteyoo.
36 Jakob inseeñoo naawatan Laban:
“Weyme inci ínhine weenaput?
Enkeyme kaamuuyen inci ínhine aakati mpinapanoolam fiye?
37 Páawoo aaŋesatoolaa ímmaaputool lan óo lan ti wañ wa utoom,
weyme ancuke weeyem utii?
Yísan wo le hátikin pakanam niŋ pakani kati kayeno píhina anii kíiti.
38 Inci yenaayeno niŋ awe fo sitiil áwii.
Munow písaacii pa niŋ pifil pa pitii múpuciit,
taapala li lompo hícekeni.
39 Cóopiyooti élukuleen eyya púlukuleen elampa mpumuke,
inci himuumam incoop oom pitiyo.
Pale awe,
iññaakam pucooy púlukuleen pa péelipee pa hánant niŋ fotom hanakan.
40 Aŋe eyeniye eloŋam:
hanakan ha pasowe pa mpumukam,
hánant ha pamon pa mpumukam,
yínantoo hiŋotu.
41 Fiyuu inci iyyeniye eloŋ fo sitiil áwii ti ekumpaan ya etii.
Inhíni fo sitiil ŋaasuwan niŋ sipaakiil kati yíni esa púmaacul pa pakatii pákasupak paka,
niŋ sitiil isak niŋ yoonool kati yíni hitaaku pukoolee.
Kápiliŋ emma íncolii fo fíyooy,
áafaliŋaa cooy ya etoom fo ñiyema ŋaasuwan.
42 Niŋ Pútuun pa piti maamaa atoom Abraham empa paapaa atoom Isaak naafeye pa piyankananutam,
anti katanam piyet sipeesam ñaanii.
Pale Pútuun pa pucukaacuk fa inci inkete fa ti páhin niŋ sipeesam mpucuk lompo kúnuul ka kutoom.
Hánant ha hiti hukan mpuwufanam tooñaa ya.”
Hiliilu písiyool pa piti Jakob niŋ Laban
43 Laban naañahan Jakob:
“Pakaal paka payenke,
púmaacul pa pakatoom;
epuuk ya payenke,
keesokaam maamaa;
púlukuleen empe,
púlukuleenam.
Waah óo waah ewwa ancuke le utoom.
Pale fiye inci yinaat íhinu waah ti púmaacul pa pakatoom niŋ ekina tom epuuk ya payenka nkapuke ka.
44 Kéy maaliilaa písiyool,
immaaŋesaa waah ewwa efuuyeno píyisan písiyool anii.”
45 Fiye,
Jakob naacoop énankiin naasiiŋan yo.
46 Naasok pakanoo:
“Niyesal pínankiin.”
Nkaŋes pínankiin nkácumpool po.
Púful toko nkali pukol hicuus ha.
47 Laban naalu toko caacaw ca Yekal Sahatuta,
Jakob naalu toko caacaw ca Kalet.a
48 Laban naasok:
“Fíyooy,
hicuus eehe hiyem heetantake ha ti pututayam niŋ awe.”
Ekina ewune nkalu toko caacaw ca Kalet (ekina eyem “hicuus heetantake”).
49 Nkalu lompo toko caacaw ca Misupa (ekina eyem:
“ésiiŋuma eti efaas pakan”).
Laban nene asok:
“Alímaati Ateeteyo afaas anii kati máatuulaa písiyool pa pitaanii niŋ máalaaŋoolaa.
50 Niŋ aakallanaa púmaacul pa pakatoom niŋ ekina tom insa pakakee pakaal,
háati an atantakut,
pale méyi nii Pútuun pa himuum etempo piyem eetantake ya ataanii.”
51 Laban nene asok Jakob:
“Sincan hicuus ha niŋ énankiin ya:
sílankamaasi súsupak ensa inci insiiŋane ti pututa anii.
52 Sikina siyem seetantake sa sitaanii.
Inci sintooliyaa nii etifiitan hicuus ha píkey puu taawe píhini heenaput,
awe lompo aañaŋut éfiitanii hicuus ha niŋ énankiin ya áapikey peti inci íhinuyam heenaput.
53 Alímaati Pútuun pa piti Abraham niŋ Pútuun pa piti Nahol píhin anii kíiti.”
Fiye,
Jakob naasintoolo hátikin Pútuun pa empa paapaa ateyoo Isaak naafeye pa.
54 Púful toko Jakob naawaaseen Pútuun pa ti tíntiŋ ya naayonkal pakanoo hili,
nkali nkaŋot ti tíntiŋ ya.
55 Eti kacom eteyyo mpucom mic,
Laban naasumpool keesokoo maamaa niŋ epuukoo púmaacul pa naasampanii.
Fiye,
naañak naañoho pateyoo.