Efantu 30
30
Ta Rasel náapannume ta nii ayinaat hitaaku epuuk,
naataak paheeka ti púnuwoo.
Naasok Jakob:
“Puk ti inci epuuk niŋ ekina tom faket!”
2 Jakob inseeñoo teyoo meemak naasokoo:
“Fo inci yem Pútuun pa peekituu pa hitaaku añii?”
3 Rasel naañahanoo:
“Ehe Piluha amiikan a atoom,
hinto neyoo kati apukam epuuk.
Pínapii teyoo inci lompo fataak epuuk.”
4 Fiye,
naawufan Jakob amiikan a ateyoo Piluha apiyeno aaloo,
naahinto neyoo.
5 Piluha naasa munow naapuk Jakob cikampaani.
6 Rasel naasok:
“Pútuun pa pisiiŋiyaam,
písiyaasi kaluum ka kutoom.
Mpúwuniyam cikampaani.”
Naalu co caacaw ca Dan (ekina eyem “pisiiŋo an”).
7 Piluha amiikan a ati Rasel nene asa munow,
naapuk Jakob cikampaani císupiyenu.
8 Rasel naasok:
“Inci suumaasuum fanfaŋ niŋ púnuwam inheekoo.”
Naalu co caacaw ca Nafatali (ekina eyem “esuum”).
9 Ta Leya naacuke ta nii asiiŋaasiiŋo hitaaku añii,
naawufan Jakob amiikan a ateyoo Silupa apiyeno aaloo.
10 Silupa naapuk Jakob cikampaani.
11 Leya naasok:
“Inci ati halacee!”
Naalu co caacaw ca Gad (ekina eyem “halacee”).
12 Silupa nene apuk Jakob cikampaani císupiyenu.
13 Fiye Leya naasok:
“Súumaam!
Pakaal paka efikasokam ati pásuuma.”
Naalu co caacaw ca Asel (ekina eyem “pásuuma”).
14 Hikee hinoom,
ti caanak ca citi kaamaañ ka,
Ruben naakaay ti hoos naacuk pimantalakool,a
náalucinii po íññaa ateyoo Leya.
Fiye,
Rasel naasok Leya:
“Káluma,
wunam ti pimantalakool pa piti añiini.”
15 Leya naañahanoo:
“Fomuti fa allame fa áyiinam?
Fo áalafilafi hilamu lompo pimantalakool pa piti añiinam?”
Rasel naasokoo:
“Naawunaam ti pimantalakool pa piti añiini,
inci fakatan Jakob apihinto niŋ awe hánant ha hiti fíyooy.”
16 Kániim enkuu,
Jakob naayeno éfulii t’elampa Leya naakaay kaapaakoolanoo naasokoo:
“Hánant ha hiti fíyooy lati inci aafaŋot.
Cooyaacooy hánant ha niŋ pimantalakool pa piti añiinam.”
Fiye,
naahinto neyoo oom hánant.
17 Pútuun pa mpisayan kaluum ka kiti Leya naasa munow,
naapuk Jakob cikampaani císakiyenu.
18 Naasok:
“Pútuun pa pucooyaamcooy kamma inci uwwufane amiikan a atoom áyiinam.”
Naalu co caacaw ca Isakaal (ekina eyem “cooy”).
19 Leya nene asa munow naapuk Jakob cikampaani ceewase isak niŋ coonool.
20 Naasok:
“Pútuun pa píhinaam heewalla.
Tempe áyiinam afaanimpanam kaatuko inci pukoopuk mikampaani miyema isak niŋ coonool.”
Naalu co caacaw ca Sepulun (ekina eyem “kaanimpan”).
21 Po hátikin naapuk címaacul naalu co caacaw ca Dina.
22 Ti pikelan,
Pútuun pa mpítahii kunuu etempo ti Rasel.
Mpisayan kaluum ka kiteyoo mpíhinoo apiyeso.
23 Naasa munow naapuk cikampaani,
naasok:
“Pútuun pa púfulanaam ti ñusuu.”
24 Naalu co caacaw ca Josef (ekina eyem “kapenan”).
Naaluum:
“Alímaati Ateeteyo ápenaniyam cikampaani.”
Hisaanumate ha hiti Jakob
25 Pamuusal hipukuyee ha hiti Josef,
Jakob naasok Laban:
“Katam puñoho pati mah ma mutoom.
26 Uwwufanam pakaalam niŋ epuukam keewune ka inci iyyeno áhinayi,
inci nkaay.
Aámeyimeyi fa inci ínhine fa kitii.”
27 Pale Laban naasokoo:
“Niŋ inci pitaako ho ti awe,
káluma yeno.
Pisaapu inci insilane,
mpíyisanam nii,
ti eloŋ ya etoom Ateeteyo asampanaam-sampan kamma awe.”
28 Naapenanoo ti hisoku:
“Sok soŋ ya eti páhin pa pitii,
inci facooyi.”
29 Jakob naasokoo:
“Aámeyimeyi fa inci ínhine fa kitii niŋ fa púlukuleen pa pitii mpímeeŋii fa kamma inci.
30 Caahinkiŋ aŋa antaake ya le niŋ pácolaliyam epenanaapenano meemak.
Ateeteyo naasampani emma inci nkákii ma kootam letaawe.
Fiye,
teyme lompo inci fáhin hak miin ma mutoom?”
31 Laban naacakanoo:
“Weyme inci iññaŋuu cooy?”
Jakob naañahanoo:
“Aatiwufanam waah pale inci fafaas immankool púlukuleen pa pitii niŋ aacoonaam íhinu eehe:
32 Túulam pinako ti koolee ya etii fíyooy,
ínfulanii písaacii pa niŋ pifil pa púlooŋ peesocutooliye pa niŋ fotom peetaake pa ufaal niŋ mísaacii ma púlooŋ meepaana ma.
Ekina efeeyeno cooy ya etoom.
33 Po hátikin niŋ áakeyyoo kaasincan cooy ya etoom áafameyi man inci eecoonoole.
Efil óo efil eyya ancuke ti inci eesocutooliit niŋ fotom eetaakut kaafaal,
niŋ ekina tom císaacii ceepaanaat,
ímmeyi nii inci nílipa.”
34 Laban naasokoo:
“Inci coonaa,
hitaako samat nii fa ansoke fa.”
35 Oom hinoom Laban náacaafulan kíceken pifil pa púlooŋ keesocutooliye ka niŋ keenakane ka ñinkaac,
uyaan pifil pa púlooŋ weesocutooliye wa niŋ weetaake wa ufaal niŋ mísaacii ma púlooŋ meepaana ma.
Naañoman po epuukoo pikampaani.
36 Nkaŋal po fo kunoom káhaaciil kati kálaaŋool niŋ Jakob.
Fiye,
Jakob naayeno efaas aŋa eetowiye ya ti púlukuleen pa piti Laban.
37 Jakob naacoop unaay punuun weemaaña uti lipune,
ñiin niŋ elumon,
náaheelin wo fo utaak ñinkaac ñeehiina.
38 Náapuuc unaay wa wéeheelinee wa ti púus pa la púlukuleen pa mpilaan la,
ancuk niŋ píkeyyoo pálaani,
mpisil hátikin unaay wa.
39 Ta mpisile ta hátikin unaay wa,
mpúpukii mufuun meesocutooliye,
meetaake ufaal niŋ fotom meenakane ñinkaac,
40 Jakob náafulan menkilis emmuu citeetemmo,
náahin peetowiye pa púpucoonool niŋ písaacii pa piti Laban peepaana pa niŋ peenakane pa ñinkaac mpiyeniyaa casil.
Fiyuu Jakob naataake pukoolee pa piteyoo náakatinool po niŋ piti Laban pa.
41 Tan óo tan ta peetaake pa sempe mpiyeniye casil,
Jakob náapuuc unaay wa ti púus pa,
ancuk kati pisil hátikin unaay wa.
42 Pale niŋ púlukuleen pa péekuluke pa piyeniyaa casil,
anaŋantoo wo toko.
Fiye,
púlukuleen pa péekuluke pa mpiyeno piti Laban,
peetaake pa sempe mpiyeno piti Jakob.
43 Ti páhinal empuu Jakob naataake hisaanumate henfakat,
naataak hícump púlukuleen,
pimiikan pákayiin niŋ pakaal,
puñonkomoo niŋ púfali piti faŋoo.