Efantu 11
Babel, ekumpaan ya eehaane ya
11
Ti oom caanak pakan paka púlooŋ kaŋ yoonool nkákup niŋ paluwal poonool.
2 Nkayeno hitoosu kápufulii pa caanak ca íncifulii pa.
Ti oom pikaayu nkacuk hítaapanu etaam eetaakut pítintiŋ ti mah ma miti Sinaal nkakin toko.
3 Nkasokool:
“Níkey!
Umemanoolaa pípilikoo empa efuusowaa ti seemak kati piyank.”
Fiyuu nkataake pípilikoo piti kulut nkacoop manoo kapucokoolan po.
4 Fiye nkasokool:
“Níkey!
Ulutaa faŋ unaa saatee niŋ ekumpaan eehaane fo élik útiŋu wa.
Ancuk utaakaa caacaw apan etuuhancooliyaa pan óo pan ti etaam ya.”
Pútuun pa mpiliil áyiin niŋ aal mpisampanii mpusokii - Nipukool nimeeŋan etaam ya.
Ti oom caanak pakan paka púlooŋ kaŋ yoonool nkákup niŋ paluwal poonool.
Taakut kuloonaay,
kumandiŋaay niŋ kufuluwaay.
Pútuun pa mpiliil áyiin niŋ aal mpisampanii mpusokii - Nipukool nimeeŋan etaam ya.
Pakan paka nkasokool:
Níkey ulutaa faŋ unaa saatee niŋ ekumpaan eehaane fo élik útiŋu wa.
Pútuun pa mpiliil áyiin niŋ aal mpisampanii mpusokii - Nipukool nimeeŋan etaam ya.
Ancuk utaakaa caacaw apan etuuhancooliyaa pan óo pan ti etaam ya.
Pútuun pa mpiliil áyiin niŋ aal mpisampanii mpusokii - Nipukool nimeeŋan etaam ya.
Ti oom caanak pakan paka púlooŋ kaŋ yoonool nkákup niŋ paluwal poonool.
Taakut kuloonaay,
kumandiŋaay niŋ kufuluwaay.
Pútuun pa mpiliil áyiin niŋ aal mpisampanii mpusokii - Nipukool nimeeŋan etaam ya.
Pakan paka nkasokool:
Níkey ulutaa faŋ unaa saatee niŋ ekumpaan eehaane fo élik útiŋu wa.
Pútuun pa mpiliil áyiin niŋ aal mpisampanii mpusokii - Nipukool nimeeŋan etaam ya.
Ancuk utaakaa caacaw apan etuuhancooliyaa pan óo pan ti etaam ya.
Pútuun pa mpiliil áyiin niŋ aal mpisampanii mpusokii - Nipukool nimeeŋan etaam ya.
5 Fiye,
Ateeteyo náawanoonii apisincan saatee ya niŋ ekumpaan ya eehaane ya eyya pakan paka nkayeniye ya kulut.
6 Púful toko Ateeteyo naasok:
“Nisincan!
Payenke síi yoonool niŋ kaŋ yoonool.
Niŋ kácookaa íhinu eehe,
weyme efuukitii íhinu eeha púlooŋ nkálafiye ha íhinu?
7 Níkey!
Uwaniyaa nuunakanoolaa kaŋ ya eteyii ancuk étikasiyool.”
8 Fiye,
Ateeteyo naahancaloolii pan óo pan ti etaam ya,
nkáyekuno kulut saatee ya.
9 Ekina ewune nkalu saatee ya caacaw ca Babel (ekina eyem “enakanoolo”) kaatuko toko Ateeteyo naanakanoole kaŋ ya eti pakan paka naahancaloolii pan óo pan ti etaam ya.
Pútuun pa mpúwanoonii mpinakanool kaŋ ya eteyii.
Allah gíitanaŋ ayeela kaŋoo dúndiñookono.
Boroom bi wacc na jaxase seen lakk bi.
Níkey uwaniyaa nuunakanoolaa kaŋ ya eteyii.
Ateeteyo naahancaloolii pan óo pan ti etaam ya.
Pútuun pa mpúwanoonii mpinakanool kaŋ ya eteyii.
Allah gíitanaŋ ayeela kaŋoo dúndiñookono.
Boroom bi wacc na jaxase seen lakk bi.
Ekina ewune nkalu saatee ya caacaw ca Babel
(ekina eyem enakanoolo enakanoolo).
Pútuun pa mpúwanoonii mpinakanool kaŋ ya eteyii.
Allah gíitanaŋ ayeela kaŋoo dúndiñookono.
Boroom bi wacc na jaxase seen lakk bi.
Sem keesokoo maamaa fo ti Abram
10 Ehe kiti Sem niŋ keesokoo maamaa.
Sitiil súsupak pamuusal kaahootan ka,
Sem pataakal sitiil keme (100) naapuk cikampaani naalu co caacaw ca Aapakusat.
11 Pamuusal hipukuyee ha hiti Aapakusat,
Sem nene aloŋ sitiil sikeme isak (500) naapuk pakakee epuuk pikampaani niŋ púmaacul.
12 Ta Aapakusat naataake ta sitiil áwii niŋ kaat (35) naapuk cikampaani naalu co caacaw ca Selah.
13 Pamuusal hipukuyee ha hiti Selah,
Aapakusat nene aloŋ sitiil sikeme sipaakiil niŋ síhaaciil (403) naapuk pakakee epuuk pikampaani niŋ púmaacul.
14 Ta Selah naataake ta sitiil áwii niŋ ŋaasuwan (30) naapuk cikampaani naalu co caacaw ca Epel.
15 Pamuusal hipukuyee ha hiti Epel,
Selah nene aloŋ sitiil sikeme sipaakiil niŋ síhaaciil (403) naapuk pakakee epuuk pikampaani niŋ púmaacul.
16 Ta Epel naataake ta sitiil áwii niŋ ŋaasuwan niŋ sipaakiil (34) naapuk cikampaani naalu co caacaw ca Pelek.
17 Pamuusal hipukuyee ha hiti Pelek,
Epel nene aloŋ sitiil sikeme sipaakiil niŋ áwii niŋ ŋaasuwan (430) naapuk pakakee epuuk pikampaani niŋ púmaacul.
18 Ta Pelek naataake ta sitiil áwii niŋ ŋaasuwan (30) naapuk cikampaani naalu co caacaw ca Leyu.
19 Pamuusal hipukuyee ha hiti Leyu,
Pelek nene aloŋ sitiil sikeme súsupak niŋ isak niŋ sipaakiil (209) naapuk pakakee epuuk pikampaani niŋ púmaacul.
20 Ta Leyu naataake ta sitiil áwii niŋ ŋaasuwan niŋ súsupak (32) naapuk cikampaani naalu co caacaw ca Seluk.
21 Pamuusal hipukuyee ha hiti Seluk,
Leyu nene aloŋ sitiil sikeme súsupak niŋ isak niŋ súsupak (207) naapuk pakakee epuuk pikampaani niŋ púmaacul.
22 Ta Seluk naataake ta sitiil áwii niŋ ŋaasuwan (30) naapuk cikampaani naalu co caacaw ca Nahol.
23 Pamuusal hipukuyee ha hiti Nahol,
Seluk nene aloŋ sitiil sikeme súsupak (200) naapuk pakakee epuuk pikampaani niŋ púmaacul.
24 Ta Nahol naataake ta sitiil áwii niŋ isak niŋ sipaakiil (29) naapuk cikampaani naalu co caacaw ca Telah.
25 Pamuusal hipukuyee ha hiti Telah,
Nahol nene aloŋ sitiil keme niŋ kaat niŋ sipaakiil (119) naapuk pakakee epuuk pikampaani niŋ púmaacul.
26 Ta Telah naataake ta sitiil áwii éhaaciil niŋ ŋaasuwan (70) naapuk epuuk pikampaani pákahaaciil:
Abram,
Nahol niŋ Halan.
Telah keesokoo maamaa
27 Ehe kiti Telah niŋ keesokoo maamaa.
Telah naapuk pikampaani pákahaaciil:
Abram,
Nahol niŋ Halan.
Halan naapuk Lot.
28 Halan náatikin eket paapaa ateyoo Telah ti saatee ya eti Ul,
ti mah ma miti pakati Kalataay,
mah emma naapukee ma temmo.
29 Abram niŋ Nahol nkasa.
Abram aaloo caacawoo Saray,
Nahol ateyoo ya caacawoo Miluka,
Halan añiinoo.
Halan naataak lompo akee ámaacul caacawoo Yisika.
30 Saray caakonta ataakut añii.
31 Telah naacoopool añiinoo Abram niŋ Lot eesokoo ya maamaa eeyem ya Halan añiinoo.
Telah naacoopool lompo Saray,
Abram aaloo,
nkáful Ul eti Kalataay kápilafi pikaayu ti mah ma miti Kanaan.
Pale kapucol ti saatee ya eti Halan nkakin toko.
32 Telah naaloŋ sitiil sikeme súsupak niŋ isak (205) naaket toko Halan.