Páhin 21

Efantu 21

Pikaayu pa piti Póol ti saatee ya eti Jerusalem

Ta núukatinoole ta neyii nuucoonool ciit niŋ piteen penfakat fo ti econ ya eti Kos. Eti kacom eteyyo nuucol ti econ ya eti Lot, núuful toko nuukaay ti saatee ya eti Patala. 2 Nuucuk piteen penfakat peeyeniye pikaayu ti mah ma miti Fenisi, núuyuuko tempo nuuñak. 3 Nuukaay fo uŋantan econ ya eti Siip, nuukat yo epees yaamay nuukaay ti mah ma miti . Nuuciŋ ti saatee ya eti Til la piteen pa mpiñaŋe la káayuukin aŋa mpúyuuke ya. 4 Nuutook toko pinapana pa pakati saatee ya, nuuyeno neyii fo kunoom isak niŋ kúsupak. Kunuu ka keenape ka nkútunkii kapusok Póol timpi akaay . 5 Pale ta nuuñaŋe ta hiñaku, nuukaay upuhankan pítin pa putoonii. Kéeyinane ka púlooŋ niŋ pakaalii niŋ epuukii nkátiŋan unii fo úful saatee ya. Púful toko, núukilipo ti kantant ka nuuluum. 6 Upupa kaluum, núukatinool neyii núuyuuko ti piteen pa, nkañoho pateyii.

7 Núuful Til niŋ piteen pa nuukaay ti saatee ya eti Patolemayis. Nuukican kéeyinane ka pakati toko, nuuyeno neyii hinoom hoonool. 8 Eti kacom eteyyo nuukaay ti saatee ya eti Sesaale. Upucol po nuunako ti ekumpaan ya eti átuunana ya ekooŋan ya éesuume ya, nuuwanan toko. Filip aŋuu akee ti isak ya niŋ pákasupak paka keemamalee ka Jerusalem kati kápaacinool paliyal pa. 9 Naataak púmaacul pakapaakiil kéemiit áyiin payenka nkayaamakool kilim enka Pútuun pa mpuwufanii. 10 Ta nuutaake ta toko kunoom keemeeŋe, akee aŋa nkasok Akapus náacolii ápufulii ti mah ma miti . 11 Náakey la nuuyeniye la, naacoop peletoo ya eti Póol, naacenkoolo neyyo sipeesoo niŋ wootoo, naasok: “ kusok: 'Ayíin a ati peletoo eyye, fiye pa pakati Jerusalem efikacenkoo, nkawufanoo .'”

12 Ta núusiye ta eehuu, unii niŋ kéeyinane ka pakati Sesaale, nuuŋiino Póol timpi akaay Jerusalem. 13 Pale naasok unii: “Weyme uwune ínniyemi ti pukooŋ nipiwasam kúnuul? Inci siiŋaasiiŋo neetaat kati kacenkam lamma pale focaa eket Jerusalem kamma caacaw ca citi Yéesu.” 14 Ta nuucuke ta nii uyinaat waah teyoo, nuukatan piŋiino pa nuusokoo: “Alímaati eeha Ateeteyo náalafiye ha hitaako!”

Ayaamakoola ya Akapus ti sempe sa siti Kunuu ka Keenape ka náayisan fa efikacenk Póol Jerusalem.

Kamma eehuu, nkaŋiino Póol timpi akaay po, nkayeno pukooŋ.

Ayaamakoola ya Akapus ti sempe sa siti Kunuu ka Keenape ka náayisan fa efikacenk Póol Jerusalem.

Póol naasokii: Inci coonaacoon neetaat kapicenkam lamma, pale focaa eket ti caacaw Yéesu Krista.

Ayaamakoola ya Akapus ti sempe sa siti Kunuu ka Keenape ka náayisan fa efikacenk Póol Jerusalem.

Kamma eehuu, nkaŋiino Póol timpi akaay po, nkayeno pukooŋ.

Ayaamakoola ya Akapus ti sempe sa siti Kunuu ka Keenape ka náayisan fa efikacenk Póol Jerusalem.

Póol naasokii: Inci coonaacoon neetaat kapicenkam lamma, pale focaa eket ti caacaw Yéesu Krista.

Ayaamakoola ya Akapus ti sempe sa siti Kunuu ka Keenape ka náayisan fa efikacenk Póol Jerusalem.

15 Nuutaak toko kunoom, nuumemanoolo nuucok pítin pa piti Jerusalem. 16 Pakakee ti kéeyinane ka pakati Sesaale nkátiŋan unii. Nkacoop unii upuwanan lati akee áyiin aŋa nkasok Manason ati econ ya eti Siip, naafiyo naayeniye anapana.

Póol pati Saak

17 Ta nuucole ta , kéeyinane ka nkawanan unii niŋ pásuuma. 18 Eti kacom eteyyo, Póol naanapool niŋ unii nuukaay hiyoop . Ñíhampaatiin ña púlooŋ pakati kéeyinane ka nkayeno toko. 19 Póol naakicanii naakamanii picaaŋ cataŋ eeha Pútuun pa mpíhine ha púlooŋ ti mah ma miti pínapii ti páhin pa piteyoo. 20 Ta nkásiye ta eehuu, nkámul Pútuun pa, nkasok: “Awí unii Póol, aacukaacuk fa hícump púwuli nkáyenoonii kéeyinane, apan poko púlooŋ keecoke piliit hiti . 21 Kasokeesok nii, aayenaayeno kakalaŋan Pusuwif pa púlooŋ keekine ka ti mah ma miti keeneetaat ka Pusuwif ti hisokuyii nii kakatan hilim ha heesiiŋanee ha hiti Móyiis, insokii nii timpi epuukii ti písiyool empa Pútuun pa mpiliile pa niŋ maamaa atuunaa , timpi lompo kanapan cosaan ya etuunaa. 22 Híinihiini unii nii, éfikasi nii áacoliyoocol. Fiye, eeheyme nuuñaŋaa íhinu? 23 Eehe núulafiye aakati hín: pákayiin pakapaakiil unka le keesintooliye ti Pútuun pa, 24 coopii pati ekumpaan ya enfakat ya eti Pútuun pa uwwaaseen Pútuun pa kaawaaseen ka kitii kiti ekuulanoolo ya ti coonool neyii. Niŋ fúlaa toko, incooy aŋa nkañaŋe ya cooy, ancuk nkáyini kaahankan esintoolo ya eteyii nkayiin kikawii. Ti páhinal empuu an óo an áfaameyi nii enka nkasokii ka ti awe pánipani tom, awe himuumi ánhinhin eeha hilim ha heesiiŋanee ha nihisoke ha. 25 Pale keeneetaat ka Pusuwif kéeyinane ka, unii upoñiipoñ leetal upusokii eeha nuucokaa ha nii, timpi kali efoofa eewaaseenee ti énaati, timpi kali efoofa eetaake hísim, timpi kali efoofa eti élukuleen eetaaŋutee, timpi kayeno ñusupoolata.”

Hicokuyee ha hiti Póol ti ekumpaan ya enfakat ya eti Pútuun pa

26 Eti kacom eteyyo, Póol naacoop pákayiin paka payenkuu nkáyaañ íhinu eeha nkañaŋe ha íhinu kati kakuulanoolo. Púful toko, naanako ti náatuunanii teyme ekuulanoolo ya neeñaŋe hipayu niŋ lompo teyme an óo an teyii naañaŋe kaawaaseen Pútuun pa.

27 Kunoom ka isak ya niŋ kúsupak ka kiti ekuulanoolo ya kupulohan hipayu, pakakee kéefulii ti mah ma miti Asii nkacuk Póol ti ekumpaan ya enfakat ya, nkanoŋan kayoŋ ka. Nkacok Póol, 28 nkayeno kaaceeceekool kapusok: “Aluu pakati , níteyii! Ayíin a aŋe akaaye pan óo pan kakalaŋan an óo an kati apook unaa pakati Israyel, hiti niŋ lompo ekumpaan ya enfakat ya eyye. Naanakan fala ti ekumpaan ya enfakat ya apilecatan le sampanee le.” 29 (Kasokaasok eehe kaatuko kacukaacuk Póol ti pinapool niŋ Tolofim ati Efes, incukii nii Póol anakanoonakan ti ekumpaan ya enfakat ya.)

30 Saatee ya fiye púlooŋ neeliiñool, pakan paka nkáteyii kápufulii pan óo pan, nkacok Póol nkáhuunoo nkáfulanoo ti ekumpaan ya enfakat ya. Tokotoko, kunkut ka nkipankee. 31 Nkayeno hiŋes himuku Póol. Ti oom páciite, áhampaatiin a ati pusoocaali pa pakati keeyem ka Jerusalem náasi nii Jerusalem púlooŋ yoopiya eliiñoole. 32 Naahiliikan apuconcoolan pusoocaali niŋ ñíhampaatiin ña pakateyii nkatey poko púlooŋ pati kayoŋ ka. Ta pakan paka nkacuke ta áhampaatiin a niŋ pusoocaali pa nkáyekuno hisapu Póol. 33 Fiye, áhampaatiin a ati pusoocaali pa naaloh Póol, naawufan hilim kapucokoo nkacenkoo niŋ ñiseel ñúsupak. Púful toko naacakanii: “Ayíin a aŋe ayem ayme? Weyme náahine?” 34 Pakakee ti kayoŋ ka nkaceek kapusok eehe, pakakee paka lompo nkaceek kapusok hikee. Ahámpaatiin a ati pusoocaali pa ayinaat kameye heetaakiye ha fanfaŋ kamma pahampanane pa. Naawufan hilim kapucoop Póol pati ékinuma ya eti pusoocaali pa. 35 Ta Póol naalohane ta ésiluma ya eti ékinuma ya, pusoocaali pa nkáseepinoo kamma pakan paka nkahiñe. 36 Poko púlooŋ nkayeniyoo kanapan niŋ hiceeku: “Nimukoo! Nimukoo!”

Káakup ka kiti Póol hátikin Pusuwif pa

37 Ta nkayeniye ta kanakan Póol ti ékinuma ya eti pusoocaali pa, naasok áhampaatiin a ateyii: “Yíniyuuyini hisoku waah?” Ahámpaatiin a naañahanoo: “Aásiyaasi kaŋ ya eti Kilek? 38 Ooto aaneetaat ati a éeluuŋe ya ta infiyiit pilepel síwuli sipaakiil (4,000) toonii, naacoopii pati ?” 39 Póol naañahanoo: “Inci eepukee ti saatee ya eti Taas ti mah ma miti Silisi, inci an ati saatee eemaka. Katampo, inci luumuu, púkup niŋ kayoŋ ka!”

40 Ahámpaatiin a naacoon. Póol naasiiŋo ti ésiluma ya, naaŋunt epeesoo, kayoŋ ka nkifatan. Fiye, náakup neyii ti kaŋ ya eteyii, Alam.