Efantu 20
Kaakaawool ka kiti Póol ti mah ma miti Masetoni niŋ Kiles
20
Pakati Efes kapitempan,
Póol naapoñ kápiyonkalii pinapana pa naasokii nii kacok piliit.
Púful toko nkákatinool,
naakaay ti mah ma miti Masetoni.
2 Naafiitanool pisaatee pa piti po,
náakup niŋ kéeyinane ka fo kamp ti hisokuyii kacok piliit.
Púful toko,
naakaay ti mah ma miti Kiles
3 naataak po kiim káhaaciil.
Kiim ka káhaaciil ka kupumuus,
naakaay kati áyuuko ti piteen penfakat apikaay ti mah ma miti Siriya,
pale náasi nii Pusuwif pa kacenkaacenk heenaput teyoo,
naasok fiye apuñoho apinap ti mah ma miti Masetoni.
4 Akina ti puñoho pa,
pakakee pakan nkátiŋanoo,
poko kayem:
Sopatel ati saatee ya eti Peloy (akina ayem Pilus añiinoo),
Alistaak niŋ Sekuntus pakati Tesalonik,
Kayus ati Teep,
Tikik niŋ Tolofim pakati Asii,
niŋ lompo Timote.
5 Payenkuu nkanow unii hátikin nkátuul unii ti saatee ya eti Tolowas.
6 Ta pahaaño pa piti kúmpuul ka keetaakut ka leweño mpumuuse ta,
núuyuuko ti piteen penfakat ti saatee ya eti Filipoy.
Kunoom isak kupumuus,
nuutookii Tolowas,
nuuyeno po fo lóokuŋ.
Kalitanee ka kiti Atík ti eket ya
7-8 Sipiti ya nkániim,
nuuconcoolo ti ékaap eeyem patiila ekumpaan kati úpaacinool hímpuul.a
Toko,
intaak hícump pilampi peecaaŋanee.
Póol naayeno káakup hátikin kéeyinane ka.
Páawoo eti kacom eteyyo añaŋaa pikaayu,
naatowo ti káakup fo pisit.
9 Akee akampaani caacawoo Atík,
naayeno ti epalloolu.
Fa Póol naatowiye fa ti káakup púlay,
Atík naaŋot,
hiŋotu ha nihihaŋoo sempe.
Ti hiŋotu eehuu,
náanowii ápufulii ti etaas ya éhaaciyenu ya.
Ta nkáseepinoo ta nkacuk nii aketaaket.
10 Fiye,
Póol naawano,
naañeeho teyoo naafenfiyoo naasokii:
“Timpi niliim,
oopa kaloŋa!”
11 Púful toko,
naañoho patiila náapaacinool hímpuul ha nkali.
Nene ayeno káakup neyii fo cilap,
naakaay.
12 Eehuu hipimuus,
nkácoopii akampaani ya kaloŋayoo,
pakan paka púlooŋ nkapuuñanoolee meemak.
Póol naafenfo akampaani ya naasokii timpi nife oopa kaloŋa!
Póol ti káakup ka ti etaas éhaaciyenu,
akampaani naayeno hiŋotu náanowii naaket.
Póol naafenfo akampaani ya naasokii timpi nife oopa kaloŋa!
Eehuu nihimuus,
nkácoopii akampaani ya kaloŋa,
pakan paka púlooŋ nkapuuñanoolee.
Póol naafenfo akampaani ya naasokii timpi nife oopa kaloŋa!
Póol niŋ ñíhampaatiin ña pakati kéeyinane ka pakati Efes
13 Unii keeyeniye ka pinapool niŋ Póol,
nuunow hátikin núuyuuko ti piteen penfakat nuukaay ti saatee ya eti Asos,
pa nuuyeniye pa pikaayu hicoopuyoo.
Asokaasok úhin eehuu kamma náalafiye kasapal.
14 Ta náatookii ta unii Asos,
náayuuko ti piteen pa putoonii nuukaay ti saatee ya eti Mitilen.
15 Eti kacom eteyyo nuulohan econ ya eti Kiyo.
Eti tanta eteyyo nuuciŋ ti econ ya eti Samos,
eti tílapooli eteyyo nuucol ti saatee ya eti Milet.
16 Fiyuu nuumuuse úpulaaŋ saatee ya eti Efes niŋ piteen pa,
kamma Póol náalafiit kaakampan ti mah ma miti Asii.
Kaatuko oopa ahiliikane hicolu Jerusalem,
niŋ áfaayini,
le niŋ hinoom ha hiti Pentekos ya.
17 Ta nuucole ta Milet,
Póol naapoñ kápiyonkalii ñíhampaatiin ña pakati kéeyinane ka pakati Efes.
18 Ta nkácolii ta naasokii:
“Emma inci íncolii Asii fo fíyooy,
nímeyimeyi fa inci iyyeniye fa niŋ aluu.
19 Inhín páhin pa piti Ateeteyo péemakiyanooliit háati poonool,
ínhin po niŋ mukun.
Nkallo pale immukut ta Pusuwif pa nkayeniye ta hicenku heenaput ti inci.
20 Nímeyimeyi nii yolut aluu waah weeyina aluu kayankanan:
íntuunan nkalaŋan aluu ti kíliŋ ka niŋ ti pukumpaan pa pitaaluu.
21 Ŋiinaaŋiino Pusuwif pa niŋ keeneetaat ka Pusuwif kati káwunko umuuyen wa uteyii,
nkátuul Pútuun pa,
nkáyinan ti Ateeteyo atuunaa Yéesu.
22 “Fiye,
Kunuu ka keenape ka unka ti hícoopiyam Jerusalem samat nii asoocaali fa nacenk an eekulee naacoopooloo.
Inci míit heekaakaayam po pitaako.
23 Eeha inci immeya ha hiyem:
ti saatee óo saatee Kunuu ka keenape ka nkusokamsok nii fakulee nkallo.
24 Pale ti inci,
eloŋam waah tom.
Láfilafi lamma pikaayu fo ti pikelan,
íllafi lompo hipayu páhin empa Ateeteyo Yéesu naawufanaam pa.
Pikina piyem káatuunan ekooŋan ya éesuume ya eti panap pa piti Pútuun pa.
25 “Fiye nísiitan,
inci méyimeyi nii etinene nicukam,
aluu púlooŋ payenka inci íntuunane ka cáwii ca citi Pútuun pa.
26 Ekina ewune inci pusok ho aluu fíyooy:
niŋ oonool taaluu alinciyaa,
inci tom Pútuun pa efipuwatan.
27 Kaatuko inci kamanaakaman aluu eeha púlooŋ Pútuun pa mpílafiye ha nípimeyi,
yolut aluu waah.
28 Nitah kunuu ti aluu himuum aluu,
nitah kunuu lompo ti koolee eyya Kunuu ka keenape ka nkuñomane ka aluu kati nifaas.
Nimankool kéeyinane ka pakati Pútuun pa,
payenka mpunoome ka niŋ hísim añii etempo.
29 Méyimeyi nii emma inci nkaay ma,
pakan keecuke nii piyen elampa empa peep mpucoke éfikanakoonii aluu etikataak paket hikaw ti koolee ya.
30 Háati pakakee ti aluu himuum aluu efinkasiiŋo nkacaam kati nkalincan pakakee pinapana kapinapanii.
31 Ooto nitah kunuu!
Innínawuno nii,
fo sitiil síhaaciil,
hánant hanakan inci yékuniit kákupanan an óo an ti aluu fo inci nkooŋ.
32 “Fiye,
inci ñomanaa aluu ti Pútuun pa,
iññoman aluu lompo ti hilim ha hiti panap etempo.
Hikina hiyina aluu kapenan káyinan,
innitoon hisaanumate ha eeha mpimanke ha pakan etempo keesampanee ka.
33 Ta inci iyyeniye ta naaluu,
láfiit waah uti an:
mañ tom,
sanoo tom,
wañ tom.
34 Aluu púlooŋ nicukaacuk niŋ ñíkin aluu nii inci híne niŋ sipeesam ense,
intaak waah óo waah ewwa inci insoolahe niŋ pákawiyam.
35 Ti waah óo waah ewwa inci ínhine,
yísanaayisan aluu nii,
niŋ páhin penfakat efuuyankananaa keetaakut ka.
Nínawuno hilim ha hiti Ateeteyo Yéesu faŋoo eeha naasoke ha:
'Haŋa pásuuma aapuwun pihaŋ hisayu.'”
Yéesu asok - Haŋa pásuuma aapuwun pihaŋ hisayu.
Fiye unaa púlooŋ úsikaa niŋ sipees unaa kati uyankananaa keetaakut ka.
Yéesu asok - Haŋa pásuuma aapuwun pihaŋ hisayu.
Fiye unaa púlooŋ úsikaa niŋ sipees unaa kati uyankananaa keetaakut ka.
Yéesu asok - Haŋa pásuuma aapuwun pihaŋ hisayu.
Fiye unaa púlooŋ úsikaa niŋ sipees unaa kati uyankananaa keetaakut ka.