Efantu 15
Pucukool pa piti Jerusalem
15
Pakakee Pákayiin nkáfulii ti mah ma miti Judaay kápuwanoonii ti saatee ya eti Antiyok nkayeno kakalaŋan kéeyinane ka nii:
“Niñaŋee kanakan ti písiyool empa Pútuun pa mpiliile pa niŋ maamaa atoonii Abraham,
samat nii fa nuunakan fa epuuk unii niŋ kataakaa kunoom isak niŋ kíhaaciil.
Niŋ ninakanutee,
samat nii fa hilim ha heesiiŋanee ha hiti Móyiis nihisoke fa unii,
étiniyiniyee kafakan.”
2 Póol niŋ Barnabas kacoonut eeha pákayiin paka nkasoke ha,
nkálaacinool neyii meemak.
Ti oom pílaacinool,
nkasiiŋo ti eehe:
Póol,
Barnabas niŋ pakakee efikakaay Jerusalem kápukup hilim eehe niŋ pupoñapoñ pa niŋ ñíhampaatiin ña.
3 Fiye,
kéeyinane ka nkawufanii aŋa nkasoolahe ya ti kaakaawool ka.
Nkanap ti mah ma miti Fenisi niŋ Samali nkakamanii puume keeneetaat ka Pusuwif nkáyesoonii ti Pítin pa piti Yéesu.
Eehuu níhisuum meemak kéeyinane ka púlooŋ.
4 Kapucol Jerusalem,
kéeyinane ka,
pupoñapoñ pa niŋ ñíhampaatiin ña nkawananii.
Póol,
Barnabas niŋ pinapoolii nkakamanii eeha púlooŋ Pútuun pa mpíhine ha neyii.
5 Pale pakakee ti kéeyinane ka keeyem ka ti kayoŋ ka kiti Pufalisaay pa nkasiiŋo nkasok:
“Keeneetaat ka Pusuwif,
fo kanakanee ti písiyool empa Pútuun pa mpiliile pa niŋ maamaa atuunaa Abraham,
samat nii fa nuunakanaa fa epuuk unaa niŋ kataakaa kunoom isak niŋ kíhaaciil,
fo kasokee lompo nii kañaŋaa hítuulu hilim ha heesiiŋanee ha hiti Móyiis.”
6 Pupoñapoñ pa niŋ ñíhampaatiin ña nkaconcool kati kákup ti hilim ha.
7 Nkákupat meemak.
Fiye,
Piyeer naasiiŋo naasok:
“Aluu pakanam ti káyinan,
nímeyimeyi nii Pútuun pa pimamalaam-mamal ti aluu ta infiyye,
pútuunan ekooŋan ya éesuume ya keeneetaat ka Pusuwif kati kási ho nkáyinan.
8 Pútuun pa pímeyimeyi saan pakan paka mpíyisan nii pisayanaasayan keeneetaat ka Pusuwif ta mpuwufanii ta Kunuu ka keenape ka,
samat nii fa mpuwufane ko fa unaa.
9 Pifisakanoolutii niŋ unaa,
káyinan ka kiteyii kuwune Pútuun pa mpukuulan saanii.
10 Fiye,
weyme uwune ínniyemi ti puwinko Pútuun pa?
Innílafi katiyan pinapana pa pitiyo empa símaama unaa niŋ unaa nuuyinaataa pitiyo.
11 Pale úyinanaayinan nii kamma panap pa piti Ateeteyo Yéesu nuufakanee samat nii poko.”
12 Fiye,
keepaakoole ka toko púlooŋ nkafatan kati kásiitan Póol niŋ Barnabas kapikamanii píyisan pa peemeeŋe pa niŋ weecukantee wa ewwa Pútuun pa mpíhine wa ti keeneetaat ka Pusuwif pínapii teyii.
13 Ta nkapaye ta káakup,
Saak naasokii:
“Aluu pakanam ti káyinan,
nísiitanam!
14 Simon akamanaakaman unaa fa Pútuun pa mpíyaañe fa pipikaay hiyoop keeneetaat ka Pusuwif mpimamal pakakee teyii kápiyenoonii pakan etempo.
15 Eehuu nihinapool niŋ kilim ka kiti piyaamakoola pa samat nii fa nkiicee fa ti hilim ha hiti Pútuun pa:
16 'Ateeteyo asok:
Hikee hinoom,
inci fáñohoonii
pineneñahan cáwii ca citi Dawid céepucaloolee ca incihancaloolee.
Fanenesiiŋan co
íññahanii sempe etenco.
17 Ancuk pikee písii pa efipiŋesam,
inci Ateeteyo Pútuun pa,
poko kayem keeneetaat ka púlooŋ Pusuwif
payenka inci iyyonkale ka kati káyenoonii pakanam.
Inci pusok ho aluu,
inci Ateeteyo Pútuun pa,a
18 yísanaayisan ho ta infiyye.'”
19 Saak nene asok:
“Ehe eeha inci ímmiiloole ha:
uñaŋutaa kayokan keeneetaat ka Pusuwif keeyem ka ti éyesoonii ti Pútuun pa.
20 Pale ukiicii upusokii timpi kali efoofa eewaaseenee ti énaati kaatuko ekuulut.
Nuusokii lompo timpi kayeno ñusupoolata,
timpi kali efoofa eti élukuleen eetaaŋutee,
timpi kali efoofa eetaake hísim.
21 Kaatuko kápiliŋ ti caanak ca citi símaama unaa,
intaako ti saatee óo saatee pakan payenka nkátuunan hilim ha heesiiŋanee ha hiti Móyiis.
Lóokuŋ óo lóokuŋ nkakalaŋ ho,
ti hinoom ha hiti kayeno ka,
ti púluumuma pa.”
Leetal ya eepoñee ya ti kéeyinane ka keeneetaat ka Pusuwif
22 Fiye,
pupoñapoñ pa niŋ ñíhampaatiin ña poko niŋ kéeyinane ka púlooŋ keeyem ka Jerusalem nkásiyool kati kamamal pakakee teyii payenka nkakaakaay hipoñu ti saatee ya eti Antiyok kapinapool niŋ Póol niŋ Barnabas.
Nkamamal Silas niŋ Yutas aŋa nkasok ya Paasapas,
poko t’ésupakii keemaka ti kéeyinane ka.
23 Nkawufanii leetal eyye:
“Unii pakan aluu ti káyinan,
pupoñapoñ pa niŋ ñíhampaatiin ña,
unka nuukican aluu,
aluu kéeyinane ka keeneetaat ka Pusuwif keekine ka ti saatee ya eti Antiyok niŋ ti mah ma miti Siriya niŋ Silisi.
24 Usíyaasi nii pakakee káfulii petoonii nkákey puutaaluu kapiliimanool aluu nkawas aluu káamiilool niŋ eeha nkasoke ha,
unii úpoñiyootii.
25 Ekina ewune unii púlooŋ cew núusiyool upumamal pakakee núupoñiyii kápinapoolii niŋ pákawi unaa Barnabas niŋ Póol,
26 pákayiin keenoomane síinuyii kamma caacaw ca citi Ateeteyo Yéesu Krista.
27 Fiye,
núupoñii Yutas niŋ Silas kati kakaman aluu niŋ ñutumii kilim ka kutoonii enke.
28 Héesuume ha Kunuu ka keenape ka níhisuum lompo unii hiyem,
timpi utiyan aluu pitiyo peenapa niŋ neetaat peeyinaatee pa kakatan empe:
29 Timpi nili efoofa eewaaseenee ti énaati,
timpi nili efoofa eetaake hísim,
timpi nili efoofa eti élukuleen eetaaŋutee,
timpi niyeno ñusupoolata.
Niŋ níhinut fo efitempo naaluu.
Fo ti pikee.”
30 Fiye,
keeñaŋe ka hicoopu leetal ya nkawano Antiyok.
Ta nkacole ta,
nkaconcenool kéeyinane ka púlooŋ nkawufanii leetal ya.
31 Nkakalaŋ yo ínsuumii meemak kamma eeha nkásiye ha nihiyankananii kapucok piliit.
32 Páawoo Yutas niŋ Silas piyaamakoola,
nkafiyo ti káakup niŋ kéeyinane ka kati kapenanii káyinan,
nkasokii kacok piliit.
33 Nkakampan po,
púful toko kéeyinane ka nkakatanii kapikaay ti kásuumaay kati kañoho pati kéepoñiyii ka.
35 Pale Póol niŋ Barnabas nkayeno Antiyok.
Poko niŋ hícump pakakee,
nkayeno kakalaŋan niŋ káatuunan hilim ha hiti Ateeteyo.
Píkatinool pa piti Póol niŋ Barnabas
36 Piyeno cikee caanak,
Póol naasok Barnabas:
“Maañohiyaa hiyoop kéeyinane ka ti pisaatee pa púlooŋ empa máatuunanaa pa hilim ha hiti Ateeteyo kati máameyiyaa ti eeha nkayem.”
37 Barnabas náalafi kapucoopool Saŋ aŋa nkasok ya Mark,
38 pale Póol naasokoo nii kañaŋutoo kaacoopool kaatuko ti mah ma miti Panfili náatahiyii,
nene anapoolut neyii ti páhin pa piteyii.
39 Nkáñakalool teeho meemak fo nkákatinoole.
Barnabas naacoopool Mark,
nkáyuuko ti piteen penfakat kapikaay ti econ ya eti Siip.
40 Pale Póol naamamal Silas naañak,
kéeyinane ka nkañomanoo ti sipees Ateeteyo.
41 Naakaay ti pisaatee pa piti mah ma miti Siriya niŋ Silisi naayeno kapenan káyinan kéeyinane ka.