5
नमा मेर्ख़ा एड़पा
1 नाम अख़दत का नम्है मॆद एकदा इसन ई ख़ॆख़ेल नू नाम उज्जना एड़पा धस्तार'ओ कालो, लिकिन नमा गे धर्मेस तरती मेर्ख़ा नू आलर ती मल कम्रका ओन्टा एड़पा र'ई, आद जनमजुग र'ओ। 2 नाम अक्कु ता ई मॆद नू रेकदत, अरा नाम पुना किचरी लेक्खा ता नम्है मेर्ख़ा मॆदन अत्ता गे चीबाख़ारदत। 3 एन्देरगेका नाम अन्ने मेर्ख़ा मॆदन अत्तदत ख़ने, नाम लंगड़ा अम्बोत ख़क्ख्र'ओत। 4 नाम मॆद ही ई कुम्बा नू र'अना बेड़ा गूटी ओत्था ती कज्रका रेक'अत र'अदत। ईद एन्ने मल्ला का नाम केचकत ती ई ख़ॆख़ेल ता मॆदन अम्बना कानन पत्तारदत। लिकिन नाम गा मेर्ख़ा मॆदन अत्ता गे दिम पत्तारदत। ख़ने ई खि'ऊ मॆद जनमजुग उज्जना ती नुलख़र'ओ क'ओ। 5 इदगे नमन सपड़'उस धर्मेस दिम हिकदस, अरा बयाना लेक्खा आस तंग्है नेम्हा बॊलतासिन नमा गे चिच्कादस।
6 औंगे नाम सगर घड़ी डिढ गने र'अदत, अन्नु हूँ नाम अख़दम का एका गूटी ई मॆद नू र'अदत आ गूटी उर्बस ती गेच्छा र'अदत। 7 एन्देरगेका नाम ईरका कत्था ती मला पत्त'अना ती ऎकदत। 8 नाम गा डिढ गने र'अदत, अरा ई ख़ॆख़ेल ता मॆदन अम्बोत ती उर्बस गने उज्जा गे दिम कोड़हे पत्तारदत। 9 औंगे नाम ई मॆद नू र'अदत मलता ई मॆद ती अम्बदत कालदत, उर्बासिन रिझ्रत'अना दिम नम्है मने र'ई। 10 एन्देरगेका नाम ओर्मत मसीसी नेंवई बॆल-गद्दी ही मुन्दहारे इज्जना मनो। ख़ने नाम ओर्त ओर्त कया नू र'अना बेड़ा नंजका दौ मलता मलदौ ही ऊजिन ख़क्खोत।†
मेसाब'अना ही सुसर'अना
11 औंगे उर्बासिन एल्चना ही मनेन अख़ना ती ऎम आलारिन धर्मेस तरा किर्रा गे रिझ्रत'अदम। ऎम एका लेक्खा आलम एन्ने धर्मेस दौलेम अख़दस। ऎन असरा नन्दन का अन्नेम नीम हूँ इदन अख़दर। 12 ऎम गा निम्है मुन्दहारे एम्हा ओहमा अउरिम मल नन्दम, लिकिन नीम एम्है पत्त नू फुलई नना गे मोका चि'अदम। औंगे नीम आर गे किर्त'अर ब'आ ओंग्दर का एकार जिया ही कत्था नू मला बहरी ऎदना ही कत्था नू फुलई नन्नर। 13 ऎम पूरू र'अदम होले आद धर्मेस गे अन्ने र'अदम, अरा ऎम बॆस लूर नू र'अदम होले आद निम्हा दौ गे अन्ने र'अदम। 14 मसीसी चोन्हा गा एमन तंग्है तबे ननी, एन्देरगेका ऎम इदन बुझुरकम का ओर्तोस ओर्मर गे केचकादस, ख़ने ईद एन्ने लेक्खा ईद'ई का, ओर्मर केचकानर। 15 मसीस नाम ओर्मर ही बदली नू केच्चस, ई चड्डे अक्कु उज्जालनर आर तमा गे मल उज्जना र'ई। नॆ तमा बदली नू केच्चस ती फिन उज्जा चॊचस आस गे दिम आर उज्जना र'ई।
16 औंगे ऎम अक्कु ती नॆकन हूँ कया ही सुबहा ती मल लेखदम जोक्खदम, ऎम मुन्द मसीसिन एन्ने कया सुबहा ती लेखकम जोक्खकम, लिकिन अक्कु ती इकला हूँ आसिन अन्नेम मल नन्दम। 17 औंगे नीकईम मसी नू र'अदस होले, आस पुना गढ़्रना हिकदस। पच्चा कत्था गुट्ठी किर्रिम बिच्चिया, पुना उज्जना ऒर मंजकी र'ई। 18 अरा इबड़ा उर्मी धर्मेस ती मंजकी र'ई। आस दिम मसीस ती नमन तंग्है गने मेसाबाचस, अरा ई मेसेर नख्रत'अना ही नलखन एमा सोंपचकादस। 19 ईद एन्ने हिके का धर्मेस ख़ॆख़ेल ता ओर्मा आल जातियर ही अक्का-बलका गुट्ठिन मल गन'अरकी आरिन मसीस नू तंग्है गने मेसाबाचस ती ई मेसाब'अना ही कत्थन एमा सोंपचकादस। 20 औंगे धर्मेस एम्है तरती दिम तंग्है ने'अनन नन्ना लेक्खा ऎम मसीसी पैकम हिकदम। ई चड्डे नीम धर्मेस गने मेसाब'आ ब'अरकी मसीसी ऊजी नू ऎम निमन ने'अदम। 21 धर्मेस नमा गे इकला हूँ पाप मल नंजका येसुसिन पाप ही दाँड़े कमचस। नाम मसीस नू धर्मेसी उजगो मना गे दिम आस एन्ने नंजस।