4
ख़ज्ज ही संजगी नू खुर्जी
1 धर्मेसी सोग्गे एम्है मइय्याँ मंजा ती एमा ई सुसर'अना ही नलख चीतारा, औंगे ऎम कहियों मल हदियारदम। 2 अरा ऎम लज्जे ही नुड़ना लेक्खा नलख गुट्ठी मल नन्दम, अरा ऎम कसरहा मल नन्दम, अरा ऎम धर्मेसी कत्थन मल बदल'अदम। अन्ति मानिमन दहदहर'आ तेंगा कुद्दम ती धर्मेसी मुन्दहारे ओर्त ओर्त आलासी लखना नू ऎम उजगो आलम एन्ने ऎद्ददम चि'अदम। 3 अन्ति एम्है दौ कत्था नू इन्द्रिइम ओदहा र'ई होले, आद नॆ नठारनर कानर आर गे अन्ने र'ई। 4 ई सौंसार ही देंवता मल पत्त'ऊ आलर ही जियन अन्धहा नंजकी चिच्चकी र'ई। औंगेम आर मसीस नॆ धर्मेसी रूप हिकदस आसी महबा ही दौ कत्था ही बिल्चिनन ऎरा गे पोलनर। 5 एन्देरगेका ऎम एमानिम तेंगा मल कुद्दम, लिकिन येसु मसीसिन उर्बस अरा एमन गा येसुस चड्डे निम्है जॊंख़ एन्ने तेंगा कुद्दम। 6 “ऊख़ा ती बिल्ली बिल्चन नेकअन” एन्ने बाचका धर्मेस तंग्है बिल्लिन एम्है जिया नू बिल्चताचस चिच्चस। येसु मसीस नू र'ई आ धर्मेसी महबा ही लूर ही बिल्लिन एमा चि'आ गे धर्मेस इदन नंजस।†
7 लिकिन ई खुर्जिन ख़ज्ज ही संजगी लेक्खा र'उर ऎम ख़क्खकादम। इत्रु अख़तार'ओ का ई कोहाँ सवंग एम्है ती मला धर्मेस ती हवे। 8 ऎम ओनबेंड़र'आ ती ख़ॊसरदम, लिकिन हार मल मन्दम। अकबक गा मन्दम, लिकिन मल हेन्दो मन्दम। 9 पेदख़तारदम, लिकिन धर्मेस ती मल मॊधतारदम, लौतारदम, लिकिन मल नठारदम। 10 ऎम उर्मी बेड़ा दुक्खे सारना ती येसुसी खे'अनन एम्है मॆद नू चॊददम, ईगेका येसुसी उज्जना एम्है मॆद नू दहदर मंज ख़च्ची नेक'आ। 11 एन्देरगेका ऎम नॆ उज्जालदम येसुस चड्डे सगर घड़ी खे'अना ही अपलोक नू र'अदम, ईगेका येसुसी उज्जना एम्है खि'ऊ कालू मॆद नू दहदर मनी क'ई नेकअन। 12 ई खोदहा एम्है नू खे'अना नलख ननाली, लिकिन उज्जना निमा गे ख़क्ख्र'ई।
13 नेम्हा पुथी नू एन्ने लिख्रकी र'ई का, “ऎन पत्ताचकन, औंगे बाचकन।” आ पत्त'अना ही ओन्टे बॊलता तिम ऎम पत्त'अदम, औंगे ब'अदम।† 14 ऎम अख़दम का धर्मेस नॆ उर्बा येसुसिन केचका ती उज्जा चॊदस, आस एमन हूँ येसुस लेक्खा उज्जत'ओस, अरा निम्है गने एमन हो'ओस ती तंग्है मुन्दहारे इजत'ओस। 15 इबड़ा उर्मी निमा दौ गे दिम र'ई। अरा एकासे धर्मेसी मया बग्गे ती बग्गे आलर नू अंड़सत'ई, अन्नेम धर्मेसी महबा गे धन्यवाद ही गोहरारना हूँ बग्गे मन्नुम क'ओ।
16 औंगे ऎम पछली मल किर्दम। बहरी ता एम्है मॆद गा खे'आली, लिकिन भितरी ता एम्है बॊलता उल्लन ती पत्ती पुना मन्नुम क'ई। 17 बग्गे उल्ला मल र'अना अक्कु ता एम्है कट्टी गुसर खिलपत गा एमा गे अकय कोहाँ अरा कोड़हे जनमजुग महबन कुन्द्रत'ई। 18 औंगे ऎम ऎथ्रना आलॊ गुट्ठी नू मला, लिकिन मल ऎथ्रना आलॊ गुट्ठिन ऎरते र'अदम। एन्देरगेका ऎथ्रना आलॊ गुट्ठी जुक्की उल्ला गे र'ई, लिकिन मल ऎरना आलॊ गुट्ठी जनमजुग गे र'ई।