2 कोरिन्‍थ 6

¹ धर्मेस गने नलख ननू आलम ऎम निमन ने'अदम का धर्मेस ती नीम ख़क्ख्रका मया आबोन अनभनियाँ मना अमा चि'आ। ² एन्‍देरगेका धर्मेस बाचकादस का,

“एंग्है सोग्गे ऎरना ही बेड़ा नू ऎन निमन मेंजकन,

नाड़रना ही उल्ला नू ऎन निमन सहाड़ा नंजकन।”

ऎन निमन ब'अदन का, “ऎरा, अक्‍कुन दिम धर्मेसी सोग्गे ऎरना ही बेड़ा, अरा अक्‍कुन दिम नाड़रना ही उल्‍ला र'ई।”

सुसर ननू जॊंख़ासी खिलपत

³ ऎम नॆख'आ डहरे नू हूँ छेंका मना मल बेद्ददम का, एम्‍हा सुसर'अना नलख नू बदी अम्बो मना। ⁴ लिकिन ऎम धर्मेसी मानिम जॊंख़म एन्ने उर्मी मदहे नू एम्है उज्‍जना ओक्‍कना ती ऎद्ददम। कोड़हे खतीर नन्ना नू, कलपारना नू, कीड़ा नू, सस्ती नू, ⁵ कोर्रा लौरना नू, जेहेल काना नू, हुलहुली गुट्ठी नू बझ्रना नू, कोड़हे अर्जाना नू, बिगर ख़न्द्रका नू, उबसना नू, ⁶ नेम्हा र'अना नू, लूर नू, सहना नू, सोग्गे ऎरना नू, नेम्‍हा बॊलतस एम्है नू र'अना नू, मानी चोन्‍हा नू, ⁷ मानी कत्थन तेंगा कुद्दना नू, धर्मेसी सवंग नू, अरा उजगो ही कमहड़न तीना अरा डेब्‍बा ख़ेक्खा नू धरना नू ऎम एम्है गोवाह आबोन ऎद्ददम। ⁸ मईन ख़क्‍ख्रकी अरा लज्‍जे मॊख़रकी, ओहमा ख़क्‍ख्रकी अरा हींड़रकी, बहक'ऊ एन्ने सोचना ती हूँ ऎम मानिम जॊगे जॊंख़म र'अदम। ⁹ ऎम चिन्‍हार मल्‍कम एन्ने सोचना ती हूँ बॆस चिन्हार आलम र'अदम। ऎम खे'आ बेद्दालदम एन्ने सोचना ती हूँ उज्‍जू आलम र'अदम। ऎम पस्‍का कोड़रका र'अदम, लिकिन मल पिटरदम। ¹⁰ ऎम दुक्खे सार'ऊ एन्ने सोचना ती हूँ उर्मी बेड़ा रिझ्र'ऊ आलम हिकदम। ऎम कीड़र लेख्रदम अन्नु हूँ बग्‍गेरिन उर्ब कमदम। एम्‍है गुसन एन्दरा हूँ मलकी अन्नु हूँ उर्मी जिनिसन अर्ज'अदम।

¹¹ कोरिन्‍थ नगरे ता आलारो! निम्‍है गुसन ऎम फरीफरी कछनख्रकम, एम्‍है जिया निम्है गुसन चोन्हा गने चल्‍ख़िरकी र'ई। ¹² ऎम निम्‍है मइय्‍याँ गोट्टा जिया ती चोन्हा नन्दम, लिकिन नीम गा एम्है मइय्याँ गोट्टा जिया ती चोन्हा मल नन्दर। ¹³ इदही ऊजी नू नीम हूँ एमा गे निम्‍हा जियन चल्‍ख़'आ ती चोन्हा नना एन्ने ऎन निमन एंग्है ख़द्द-ख़र्रा अक्‍कन ती ब'अदन।

मल पत्त'उर गने अमा मेस्र'आ

¹⁴ मल पत्त'उर गने अमा पुन्दर'आ। उजगो अरा नॆग मलका ही एन्‍देर मेसर-नखरना? बिल्‍ली ही ऊख़ा गने एन्‍देर संगे-लोंगे? ¹⁵ मसीस अरा सैतान ही संगेर ही गने एन्‍देर मॆल? पत्त'उर अरा मल पत्त'उर ही एन्‍देर मेस्रना? ¹⁶ धर्मेसी मन्दिर गे मूर्ति गुट्ठी गने एन्‍देर नता? नाम गा उज्‍जना धर्मेसी मन्दिर हिकदत। एकासे का, धर्मेस बाचकादस,

“ऎन आर नू ओक्र'ओन,

अरा आर ही मझी नू कुद्दोन नुंगोन,

अरा ऎन आर ही धर्मे र'ओन,

अरा आर एंग्है आलर र'ओर।”

¹⁷ औंगे उर्बस एन्ने ब'अदस,

“मलदौ आलर ही मझी ती उरखा ती तरकूटी र'आ,

अरा सोतबोड़'आ आलॊन अमा एवंसड़'आ,

ख़ने ऎन निमन इंझ्र'ओन।

¹⁸ ऎन निमा बंग र'ओन,

अरा नीम एंगा ख़द्दर अरा ख़द्दो र'ओर,

उर्मी ती सवंगिय उर्बन ब'अदन।”