9
बारो तइरकर ही तइरना
1 येसुस तंग्है बारो चेलारिन मीख़ियस ती आर गे उर्मी मलदौ बॊलता गुट्ठी मइय्याँ अरा बेमार गुट्ठिन उजग'आ गे सवंग अरा आकुस चिच्चस। 2 अरा आरिन धर्मेसी राजी ही पत्त नू तेंगा कुद्दा गे अरा बेमार गुट्ठिन उजग'आ गे तइय्यस। 3 आस आरिन बाचस, “डहरे ऎका गे एन्द्रा हूँ अमके हो'आ, सोट्टा मला, झोला मला, मंडी मला, ढिबा मला, अरा दुई गोटंग किचरी मला।† 4 एका एड़पा नू नीम कोर'ओर आ एड़पा नुम र'अके एका गूटी आ नगरे ती नीम किर्रोर। 5 अरा आलर निमन मल परघ'अनर होले नीम आ नगरे ती उरखो बारिम निम्है ख़ेड्डे ता रीड़ोन ख़ेत्तके चि'अके। ईद आर गे निम्है चेताब'अना मनो।”† 6 अरा चेलर उरखर ती पद्दा पद्दा दौ कत्था मेन्त'आनुम अरा उर्मी अड्डा आलारिन उजग'आ नुम केरस।
हॆरॊदॆसी दोभिदिया
7 राजी ख़ापुस हॆरॊदॆस अंटिपस इबड़ा मंजका ओर्मा हलन मेंजस ती दोभिदिया मंजस केरस। एन्देरगेका जोक्क आलर बाचर का यॊहन नूड़रत'उस केचका ती उज्जा चॊचकादस।† 8 अरा जोक्कोर बाचर का धर्मेसी कत्था तिंगू एलियस किर्रियस बरचस, अरा नन्नर बाचर चीरान ता ओन्टा धर्मेसी कत्था तिंगुस केचका ती उज्जा चॊचकादस। 9 लिकिन हॆरॊदॆस बाचस, “ऎन गा यॊहनसी कुक्कुन एड़बताचकन, अक्कु ईस नॆ तंग्है अकबक नलख ननालदस? नॆखा पत्त नू एन्ने कत्था मेन्दन?” अरा आस येसुसिन ऎरा बिद्दियस।
पाँच हजार आलारिन ओन्त'अना
10 फिन बारा तइरकर किर्रियर ती ताम एन्देर एन्देर नंजकाचर अदिन येसुसिन तिंगियर। अरा येसुस आरिन बॆतसैदा नामे नगरे नू तंग्है गने होच्चस केरस असन आर तामलेका र'आ ओंगोर। 11 लिकिन आलर इदन अक्खर ती आसी ख़ॊख़ा चॊंख़्रर। अरा येसुस आरिन परघाचस, अरा आर ही गने धर्मेसी राजी ही पत्त नू तिंगियस, अरा नॆ कोड़े मना बिद्दियर आरिन कोड़े नंजस।
12 अक्कुन बीड़ीपुता लगिया ख़ने बारो चेलर येसुसिन बरचर ती बाचर, “गोंहड़ा आबोन तइय्या का आर हेद्दे ता पद्दा गुट्ठी नू कालरकी ओना गे अरा र'आ गे अड्डा बेद्दोर, एन्देरगेका नाम इसन उछिन्द अड्डा नू र'अदत।” 13 लिकिन येसुस आरिन बाचस, “नीमिम ईर गे ओना मॊख़ा गे इन्द्रिइम चि'आ।” आर बाचर, “एम्है गुसन पाँच गोटंग असमा अरा ऎनोटा इंजोन अम्बरकी एन्द्रा हूँ मल्ला। ऎम क'ओम ती ओर्मर गे मंडी ख़ेन्दोम होलेम मना ओंगो।” 14 आर पाँच हजार केम मॆतर रहचर। ख़ने आस तंग्है चेलारिन बाचस, “आलारिन पचास पचास नना ती पाती पाती ओक्त'आ चि'आ।” 15 आर अन्नेम नंजर अरा ओर्मारिन ओकताचर चिच्चर। 16 ख़ने येसुस अबड़ा पांच गोटंग असमन अरा ऎनोटा इंजोन होच्चस, अरा मेर्ख़ा तरा ऎररकी आद गे धर्मेसिन धन्यवाद नंजस, अरा अबड़न किच्चियस ती अदिन ख़ट्टा गे चेलर गे चिच्चस। चेलर गोंहड़ा गे अबड़न ख़ट्टियर। 17 ख़ने ओर्मर मोक्खर ती उड़चर केरर अरा एंगरका कुटकन बारा डउड़ा निन्दर।
पतरस येसुसिन मसीस ब'अदस
18 उन्दुल येसुस उछिन्द अड्डा नू बिन्ती नना लगियस अरा तंग्है चेलर आसी गने रहचर। ख़ने आस आरिन मेंजस, “आलर एंगन नॆ तंग्है ब'अनर?” 19 आर किर्त'अर बाचर, “जोक्क आलर ब'अनर यॊहन नूड़रत'उस केचका ती उज्जा चॊचस अरा जोक्कोर ब'अनर धर्मेसी कत्था तिंगू एलियस मेर्ख़ा ती किर्रियस बरचस, अरा नन्नर ब'अनर चीरान ता धर्मेसी कत्था तिंगुस ओर्तोस उज्जा चॊचकादस।”† 20 अरा आस आरिन मेंजस, “लिकिन नीम एंगन नॆ तंग्है ब'अदर?” पतरस किर्त'अर बाचस, “नीन धर्मेस ती तइरका मसी हिकदय।”† 21 ख़ने आस आरिन चेताबाचस अरा आनियस का, “इदिन नॆकन हूँ अमके तेंगा।”
येसुस तंग्है खे'अना ही पत्त नू तेंगदस
22 तहाँ येसुस आरिन बाचस, “मनवा ख़द्दन एंगा गे अजम खिलपत मन्ना मनो, अरा यहूदी सेयान आलर अरा मुध नैगर अरा नॆग सिखाब'उर एंगन दुस'ओर अरा पिटोर। लिकिन ऎन तिसर उल्ला उज्जा चॊर'ओन।”
23 फिन आस ओर्मारिन बाचस, “नीकईम एंग्है ख़ॊख़ा चॊंख़्र'आ बेद्दोस होले, आस गे तान तंग्है नना बेद्दना लेका अम्बोर नना अरा उर्मी उल्ला तंग्है मने ती खिलपत सहना अरा क्रुसa नू खे'अना ती एंग्है गने चॊंख़्रना र'ई।† 24 नीकईम तंग्है उज्जनन तंग्गा गे उज्जा बेद्ददस होले आस धर्मेस गने जनमजुग ही उज्जनन एबस'ओस, लिकिन आस एंग्है चड्डे तंग्है उज्जनन चि'अदस होले आस धर्मेस गने जनमजुग ही उज्जनन ख़क्खोस।† 25 ओन्टा आलस ई ख़ॆख़ेल ता उर्मी जिनिसन अर्ज'अदस, लिकिन तंग्है जियन नठाब'अदस महले एबसदस होले, आस गे एन्देर नाफा मनो? 26 नीकईम एंग्है कत्थन इंझ्र'आ गे अरा ‘ऎन येसुसी चेला हिकदन’ एन्ने आलर मुन्दहारे तेंगा गे लजर'ओस होले, आसिन ऎन हूँ ‘ईस एंग्है चेलस हिकदस’ एन्ने ब'आ गे लजर'ओन, इकला ऎन नेम्हा मेर्ख़ा पैकर गने एंग्है महबा अरा एम्बासी महबा नू किर्रोन। 27 ऎन ओन्टा मुदे कत्थन निमन ब'अदन, अक्कुन इसन इज्जका आलर ती जोक्को आलर, धर्मेसी राजी नन्नन बिगर ईरका मल खे'ओर।”
येसुसी रूप बदलारना
28 इबड़ा कत्था तेंगना ही आठ उल्ला ख़ॊख़ा येसुस पतरस अरा यॊहन अरा याकॊबसिन तंग्है गने होच्चस ती परता मइय्याँ बिन्ती नना गे केरस।† 29 अरा आस बिन्ती ननो बारी आसी मुही ही ऎथ्रना बदलारा केरा, अरा आसी किचरी फुर्फुर'आ पंडरू मंजा ती बिल्चा हेलरा। 30 अरा ऎरा! आचका ऎंड़ आलर मूसस अरा एलियस आसी गने कछनख्र'आ लगियर। 31 ईर मेर्ख़ा ता महबा गने ऎथ्रर अरा आसी खे'अना ही पत्त नू कछनख्र'आ लगियर, एकाद येरुसलॆम नू मन्ना रहचा। 32 पतरस अरा आसी संगेर ख़न्द्रना ती मथलारका रहचर, अरा निजड़ियर ख़ने, आर येसुसिन महबा गने ईरयर अरा आसी गने ऎंड़ आलारिन इजका ईरयर। 33 आ आलर येसुस गुसले गुछर'आ दिम लगियर ख़ने, पतरस येसुस ती बाचस, “अना उर्बायो! नमा इसन र'अना बॆस र'ई, नाम तीन गोटंग कुम्बा कमदत नेकअन, ओन्टा निंगा गे अरा ओन्टा मूसस गे अरा ओन्टा एलियस गे।” आस बल्लालियस का एन्देर ब'आ लगदस। 34 आस ब'अम लगियस का बदाली बरचा ती आरिन कुल्लिया चिच्चा। अरा आर आ बदाली नू मंडर'आ हेलरर ख़ने इल्चियर केरर। 35 धर्मेस बदाली ती बाचस, “ईस एंग्है ख़द्दस, अरा एंग्है चज्जिका हिकदस, औंगे ईसहीन मेना।”† 36 ई ब'अना मेन्द्रना मुंज्रना गनेम येसुस ओर्ते लेका ऎथ्रस। अरा आर कलेकसे रहचर, अरा आर एन्द्रा ईरकाचर अदही पत्त नू इन्द्रिइम कत्था अबड़ा उल्ला नू नॆकन हूँ मल तिंगियर।
येसुस मलदौ बॊलता धरचका ख़द्दासिन कोड़े नन्दस
37 दोसर उल्ला आर परता ती एत्ता लगियर ख़ने, ओन्टा कोहाँ गोंहड़ा येसुसिन भेंटारा। 38 अरा गोंहड़ा ती ओर्तोस चिच्चियारस ती बाचस, “अना गुरु, ऎन निंगन गोहरारदन का एंग्है ख़द्दासिन सोग्गे ऎरा, ईस एंग्हा ओन्टे लेका ख़द्दस र'अदस। 39 आसिन ओन्टा मलदौ बॊलता धर'ई, अरा आस आचका चिच्चियारदस, अरा आद आसिन एन्ने मुर्कुट'ई का आसी बई ती बोट्टो उरखी, अरा आसिन पखड़'ई पिदख़'ई ती नगदे ढेवाँ ती अम्बी। 40 ऎन निंग्है चेलर ती अदिन ओथ्र'आ गे गोहरारकन, लिकिन आर ओथ्र'आ पोल्लर।” 41 येसुस किर्त'अर बाचस, “अना मल पत्त'ऊ आलारो, ऎन इकला गूटी निम्है गने र'ओन? ऎन इकला गूटी निम्है गने निम्है मल पत्त'अनन सह'ओन? निंग्दासिन इसन ओन्द्र'आ।” 42 आ कुक्कोस बर'आ लगियस आ बारी नाद आसिन पखड़ाचा ती मुरकुटचा, लिकिन येसुस आ मलदौ बॊलतन केप्पस, अरा ख़द्दासिन कोड़े नंजस ती आसिन तम्बस गे सोंपचस चिच्चस। 43 ख़ने ओर्मा आलर धर्मेसी कोहाँ सवंगन ऎररकी अकबकरर केरर।
येसुस तंग्है खे'अना पत्त नू अउरिम तेंगदस
ओर्मर येसुसी हैकट नलख ती अकबक मंजर, आ बारी आस तंग्है चेलारिन बाचस, 44 “नीम इबड़ा कत्थन मेना, आलर मनवा ख़द्दन एंगन नन्ना आलर ही ख़ेक्खा नू सोंप'ओर।” 45 लिकिन आर ई कत्थन मल बुझ्रर अरा ईद ही माने आर गे नूख़्रकी रहचा का आर अदिन अम्बोर अख़'आ, अरा आर ई कत्था ही पत्त नू आसी ती मेना गे एल्चा लगियर।
उर्मी ती कोहाँ नॆ?
46 फेन आसी चेलर नू एन्ने आनानख्रना मना हेलरा का नम्है नू नॆ कोहाँ मनोत।† 47 तहाँ येसुस आर ही जिया ता कत्थन अक्खस ती ओन्टा ख़द्दासिन ओन्द्रस ती आर ही मझी नू इजताचस, 48 अरा आरिन बाचस, “एका ओर्तोस ई बेसे ओन्टा ख़द्दासिन एंग्है बदलीb नू इंझ्रदस आस एंगन इंझ्रदस। अरा एका ओर्तोस एंगन इंझ्रदस आस एंगन तइय्का एंग्है बबासिन हूँ इंझ्रदस।† अरा नॆ निम्है नू तंगन सन्नी ती सन्नी अख़दस आसिम धर्मेसी ऎरना नू कोहाँ र'अदस।”
नॆ नम्है गने अरा नॆ नम्है बिड़दो नू र'ई
(मर 9:38-40)
49 ख़ने यॊहनस बाचस, “अना गुरु! ऎम ओन्टा आलासिन नीन आस गे आकुसc चिच्चकय ब'अरकी नाद गुट्ठिन ओथ्रनन ईरकम, अरा ऎम आसिन छेकचकम, एन्देरगेका आस ऎम चेलर नू ती मलदस।” 50 येसुस आसिन बाचस, “नीन आसिन अमा छेक'आ, एका ओर्तोस निंग्है बिड़दो मलकस आस निंग्है सहाड़ा ननुस हिकदस।”†
येसुसी बिड़दो नू सामरी आलर
51 तहाँ आसी मेर्ख़ा चॊदतारना ही उल्ला पूरना रहचा ख़ने येसुस येरुसलॆम काना ही मने नंजस। 52 आस पैकारिन तंग्है मुन्द तइय्यस। आर समारिया ता आलर ही ओन्टा पद्दा नू आसी अंड़सना ही सपड़'आ गे केरर। 53 लिकिन अबड़र येसुसिन मल परघाचर, एन्देरगेका आस येरुसलॆम काला गे मुहरारका रहचस। 54 अरा आसी चेलर याकॊब अरा यॊहनस इदिन ईरियर ती बाचर, “अना उर्बायो! नीन बेद्ददय का एलियस नंजस आ लेक्खा ऎम पॆस'ओम का मेर्ख़ा ती चिच्ची खत्र'ओ ती ई आलारिन बस्सो चि'ओ?”† 55 लिकिन येसुस किर्रा बिड़दस ती आरिन केप्पस [ती बाचस, “नीम बलदर का नीम एका बॊलता ही आलर हिकदर? 56 मनवा ख़द्दन ऎन गा आलर ही जियन नटाब'आ गे मला लिकिन बछाब'आ गे बरचकादन।”]d अरा आर नन्ना पद्दा नू किर्रिम बिच्चियर।
येसुसी चेला मन्ना ही जॊगे
(मत्ता 8:19-22)
57 आर डहरे नू कालियर ख़ने ओन्टा आलस येसुसिन बाचस, “नीन एसन एसन क'ओय ऎन निंग्है गने चॊंख़्र'ओन।” 58 लिकिन येसुस आसिन बाचस, “सिकटा गुट्ठी ही लाता र'ई, अरा ऒड़ा गुट्ठी ही खोता र'ई, लिकिन मनवा ख़द्दन एंगा गे कुक्कन हूँ बेड़त'आ ती ख़न्न ऎख़ा गे अड्डा मलकी।” 59 येसुस नन्नासिन बाचस, “एंग्है गने चॊंख़्र'आ।” आस आसिन बाचस, “अना उर्बायो! एंगन मुन्द एम्बासिन माड़ा गे काला चि'आ।” 60 लिकिन येसुस आसिन बाचस, “केचकारिन तम्है बॊलता नू केचका आलर माड़नर नेकअन। लिकिन नीन कला ती धर्मेस आलर ही उज्जना नू राजी नन्ना ही पत्त नू मेन्त'आ।” 61 अरा अउर ओर्तोस बाचस, “अना उर्बायो! ऎन निंग्है गने चॊंख़्र'ओन, लिकिन मुन्द एंगन एंग्है एड़पा ता आलर गुसते बिदा मना गे काला चि'आ।”† 62 येसुस आसिन चेता बाचस, “एका ओर्तस गोहला मुठिया नू ख़ेक्खा उइय्दस ती ख़ॊख़ा किर्रे ऎरदस, आसी उज्जना नू धर्मेस राजी नना गे आस जॊगे मलदस।”