लूकस 4

येसुसी बिढ़्रना

(मत्ता 4:1-11; मर 1:12, 13)

¹ फिन येसुस नेम्हा बॊलतासी सवंग नू मनरकी यरदन ख़ाड़ ती किर्रियस। बॊलता आसिन टोड़ंग नू काला गे कड़हाबाचा। ² अइय्या चालीस उल्‍ला गूटी नाद आसिन बिढ़'आलिया। अबड़ा उल्‍ला नू आस नीदी कूल रहचस। अरा अबड़ा उल्‍ला पूरचा ख़ने आस गे कीड़ा लग्‍गिया।

³ ख़ने नाद येसुसिन बाचा, “नीन धर्मेसी ख़द्दय होले, ई पखनन ब'आ का ईद ओन्ना-मॊख़ना मनो क'ओ।” ⁴ येसुस आनाकिर्ताचस, “मला, एन्‍देरगेका नेम्हा पुथी नू लिख्रकी र'ई, ‘आलस ओन्ना-मॊख़ना ती लेका मल उज्‍जोस।’”

⁵ तहाँ नाद आसिन मेच्‍छा अड्डा नू कड़हाबाचा अरा आसिन इकिम घड़ी नू ख़ॆख़ेल ता सौंसे राजी गुट्ठिन ऎदा, ⁶ अरा आसिन बाचा, “ऎन इबड़ा ही उर्मी आकुस अरा इबड़ा ही ओहमा निंगा गे चि'ओन। इबड़ा गा एंगा गे सोंपरकी किरकी र'ई, अरा ऎन इदन नॆका चि'आ तुक्‍की आस गे चि'आ ओंग्‍दन। ⁷ औंगे नीन एंगन ऒड़ लग्‍गोय होले, इबड़ा जम्मा निंगा चि'ओन।” ⁸ येसुस किर्त'अर बाचस, “मला, एन्‍देरगेका नेम्हा पुथी नू लिख्रकी र'ई

‘नीन निंग्‍है धर्मे उर्बासिन ऒड़ लग्‍गा,

अरा आसी लेका महबा नना।’”

⁹ तहाँ नाद आसिन येरुसलॆम नगरे कड़हाबाचा ती धर्मेसी मन्दिर ही अग्‍गी नू इजताचा, अरा बाचा, “नीन धर्मेसी ख़द्दय होले, नीन डेग'आ चि'आ। ¹⁰ नेम्हा पुथी नू गा लिख्रकी र'ई,

‘आस निंग्‍है पत्त नू तंग्‍है पैकारिन आनोस का

आर निंगन ख़ापोर अरा बछाब'ओर।

¹¹ अरा आर निंगन ख़ेक्खच ख़ेक्खा हथल'ओर हो'ओर,

होले एन्ने अम्‍बो मना का निंग्‍है ख़ेड्डेन पखना लग्‍गो।’”

¹² येसुस अदिन किर्त'अर बाचस, “मला, एन्‍देरगेका नेम्हा पुथी नू एन्ने हूँ लिख्रकी र'ई, ‘नीन निंग्‍है धर्मे उर्बासिन अमा बिढ़'आ।’” ¹³ एकाबारी नाद तंग्है उर्मी बिढ़नन मुंजिया ती नन्ना मोका ख़क्‍खना गूटी आसी गुसते किर्रिम बिच्चिया।

येसुसी तेतर-सुसर नन्ना ही ऒड़

(मत्ता 4:12-17, 13:53-58; मर 1:14, 15, 6:1-6)

¹⁴ फिन येसुस नेम्‍हा बॊलतासी सवंग ख़क्‍ख्रकी गलिलेया जिला नू किर्रयस। आसी पत्त ता कत्‍था अड्डे-बेड्डे ता उर्मी चकभार नू बींड़रा केरा। ¹⁵ आस यहूदीर ही गोड़हा एड़पा गुट्ठी नू सिखाब'आ हेलरस, अरा ओर्मर आसी ओहमा ननालियर।

¹⁶ फिन आस नासरेत नू बरचस, एसन आस पॊसरका परदका रहचस। अरा तंग्‍है चाल ही लेक्‍खा यहूदी ख़न्न ऎख़ना उल्‍ला नू यहूदीर ही गोड़हा एड़पा केरस। असन आस धर्मेसी पुथिन पढ़'आ गे इज्‍जस। ¹⁷ आस गे धर्मेसी कत्‍था तिंगुस यसायासी पुथी चितारा, अरा आस पुथिन चलख़'अरकी आ अड्डन ख़क्‍खियस ती पढ़चस एसन एन्ने लिख्रकी रहचा:

¹⁸ “उर्बासी बॊलता एंग्‍है म‍इय्याँ र'ई,

इदगे का आस एंगन कीड़र गे दौ कत्‍था मेन्‍त'आ गे चज्जिकादस।

अरा आस एंगन हॆंरकारिन बछरनन तेंगा गे,

अरा अन्‍धारिन ऎरत'आ गे,

अरा ओर्मा तिरख़रकारिन छोड़ाब'आ गे,

¹⁹ अरा उर्बासी मया आर ही म‍इय्याँ र'ऊ चान ही पत्त नू तेंगा गे त‍इय्‍का र'अदस।”

²⁰ तहाँ आस पुथिन डबचस ती जॊंख़ासी ख़ेक्खा नू चिच्‍चस अरा आलारिन सिखाब'आ गे उक्‍कियस। अरा गोड़हा एड़पा ता ओर्मा आलर आसिन ऎरते रहिकेरर। ²¹ तहाँ आस आरिन ब'आ हेलरस, “नीम अक्‍कु एंग्‍है ती पढ़चकन मेंजकर, आद एंग्‍है ती इन्नम पुरचकी र'ई।”

²² ओर्मर आसिन सहरारर, अरा एका मया ही कत्‍था गुट्ठी आसी ब‍ई ती उरखालिया, अत्रु ती अकबक मंजर। लिकिन फिन ब'आ हेलरर, “ईस यॊसॆफसी तंग्‍दस मलदस का?” ²³ तहाँ आस आरिन बाचस, “नीम एंग्‍है म‍इय्याँ ई हना ब'ओर दिम का ‘बैधायो, नीन निंगन कोड़े नना,’ ई कत्‍था ही मने नीम एन्ने मन'ओर का, ‘एन्‍देर एन्‍देर ऎम मेंजकादम का हैकट नलख कफरनहूम नू नीन नंजकय, अदिन इसन हूँ नना।’” ²⁴ अउरिम आस बाचस, “ऎन निमन ओन्‍टा मानिम कत्‍थन ब'अदन का ‘एकअम धर्मेसी कत्‍था तिंगुस तंग्‍है पॊसरका परदका अड्डा नू मान मरजात मल ख़क्‍खदस।’ ²⁵ लिकिन ऎन अउरिम ओन्‍टा मानिम कत्‍था ब'अदन का धर्मेसी कत्‍था तिंगू एलियसी बेड़ा नू इस्राऎल नू बग्‍गे रड़ियाहीर रहचर, इकला साढ़े तीन बछर गूटी चॆप मल पुंईयाँ, ख़ने गोट्टा राजी नू कोहाँ अकाल मंजा। ²⁶ लिकिन एलियस संगरा ख़क्‍खा गे अबड़र ती नॆखा गुसन हूँ मल त‍इय्‍रस। सीदॊन राजी नू सारेपत नगरे ता ओन्‍टा नन-यहूदी रड़ियाही गुसन लेका त‍इय्‍रस। ²⁷ अरा धर्मेसी कत्‍था तिंगू एलिसासी बेड़ा नू इस्राऎल नू नगदे खसरा रोगियर रहचर, लिकिन सीरिया राजी ता ओन्‍टा नन-यहूदी नामानसिन अम्‍बर नॆ हूँ कोड़े मल मन्‍तारर।”

²⁸ गोड़हा एड़पा नू रहचर अबड़ा ओर्मर येसुसी ई कत्थन मेंजर ख़ने, आर खींस मंजर केरर। ²⁹ अरा आर चॊच उक्‍कियर ती आसिन नगरे ती बहरी ओथ्रर। अरा आसिन तम्‍है ओक्‍करका नगरे ता परता ही टुंगरी म‍इय्याँ अरगाचर। एन्‍देरगेका आसिन आर म‍इतले किइय्या तुक्‍का गे सोच्‍चर। ³⁰ लिकिन आस आर ही मझी ती बुचड़ारस ती किर्रिम बिच्चियस।

येसुस मलदौ बॊलता धरचकासिन कोड़े नन्दस

(मर 1:21-28)

³¹ तहाँ येसुस गलिलेया जिला ही कफरनहूम नगरे नू केरस। अरा ख़न्न ऎख़ना उल्‍ला नू आलारिन सिखाब'आलियस। ³² अरा आसी सिखाब'अना ती आर अनचकरर केरर। एन्‍देरगेका आस आकुस गने ब'आ लगियस। ³³ अरा असन गोड़हा एड़पा नू मलदौ बॊलता ती धरचका ओन्टा आलस रहचस। अरा आस जॊरसरिया चिच्चि‍यारस। ³⁴ “अना नासरेत ता येसु, निंगा एम्है गने एन्‍देर नलख र'ई, अमा थोकबोकामब'आ, नीन एमन नास नना गे बरचकादय का? ऎन निंगन अख़दन नीन नॆ तंग्‍है, नीन धर्मेसी नेम्‍हा आलय।” ³⁵ येसुस अदिन केप्‍पस ती आनियस, “कलेकले र'अय, अरा ई आलस ती उरखय कलय।” ख़ने मलदौ बॊलता आसिन आर ही मझी नू कचड़'अरकी आसिन बिगर बगड़'अर आसी म‍इतले उरखा केरा।

³⁶ ख़ने इबड़ा जम्मर गे अकबक मंजा, अरा आर ताम ताम कछनख्र'आ लगियर, “ईद कोड़हे बॆस कत्‍था हिके! तंग्‍है आकुस अरा सवंग ती ईस मलदौ बॊलता गुट्ठिन पॆसदस, अरा अबड़ा हूँ उरखी क'ई।” ³⁷ अरा येसुसी पत्त ता कत्‍था आ चकभार नू ओनबेंड़र'आ उर्मी अड्डा नू मना हेलरा।

येसुस बग्‍गे आलारिन कोड़े नन्‍दस

(मत्ता 8:14-17; मर 1:29-34)

³⁸ येसुस गोड़हा एड़पा ती चॊचस ती सिमॊनसी एड़पा कोरचस। असन सिमॊनसी तंग्‍सास गे नगदे नाड़ी रहचा। अरा अबड़र अदिन कोड़े नना गे आस ती गोहरारर। ³⁹ आस अदही हेद्दे इज्‍जस ती नाड़िन केप्‍पस अरा नाड़ी तम्मिया केरा। अरा आद लॆम चॊचा ती आर ही तेतर-सुसर नना हेलरा।

⁴⁰ बीड़ी पुतबारी अबड़ा आलर नॆ नॆ कैनो मदहे बेमार ती लिंडरका रहचर आर जम्मारिन आसी गुसन ओन्‍द्रर। अरा आस ओरोत ओरोत म‍इय्याँ ख़ेक्खा उइय्यस ती कोड़े नंजस। ⁴¹ अरा नाद गुट्ठी हूँ चिच्चियारनुम नगदे आलर ती उरखा केरा अरा ब'आलिया का “नीन धर्मेसी ख़द्दय हिकदय”। लिकिन आस अबड़न केबालियस अरा तंग्‍है पत्त नू ब'आ मल चिच्‍चस। एन्‍देरगेका अबड़ा आसिन अख़'आलिया का आस मसी हिकदस।

⁴² बिज्‍जया ख़ने आस उरखस ती ओन्‍टा उछिन्‍द अड्डा नू बिन्‍ती नना गे केरस। अरा गोंहड़ा आसिन बिद्दनुम बरचा। अरा आसिन ख़क्‍खिया ख़ने अबड़र आसिन छेंकेच ईरियर का आस आर ही गुसते अम्‍बोस काला। ⁴³ लिकिन आस आरिन बाचस, “एंगा नन्ना नगरे नू हूँ धर्मेसी राजी ही दौ कत्‍था मेन्‍त'अना र'ई। एन्‍देरगेका ऎन इदगेम त‍इरकादन।” ⁴⁴ अरा आस यूदेया ही गोड़हा एड़पा गुट्ठी नू दौ कत्‍था मेन्त'आ लगियस।