21
Kille afaara kille sahaara
1 Buro afaara buro sahaarani yeydiwo bagadeni baado geede kille afaara kille sahaara ta beedo. 2 Hayla maaqe katamay kille Yerusaleemey hade ade gelese naqutti waardese bushoke afaafa Wonto da'aafa yekke e hodhusune ta beedo. 3 Orje katonani kaati uttuxo googiyafa "Wonto yesoy axi giddaakako e maaqe, usaarani wolkoko e yese, usini e axitako u maaqe. Wontoni beese usaara wolko yesine u Wontoko e maaqe. 4 U aafunxeni uddi u aafiyafa e uce. Buro yecha sahaara e wogaaray gardi yese gisha axi ha e geede sekke hay'uwasso, higiluwasso, yeekuwasso, waayye beewasso" yeydi e hisune ta siido.
5 Kaati uttuxo gara uttichashini "Hay, uddi basuko kille ta mahe" yeydi e hido. Sekkeni assi "Eezo keenguwasaara aadiyara e maaqe gisha ha ta otosa diizuwa!" yeydi tamba e hido. 6 Ye e geedeni assi "Ittosso! Achaara aalliciraaraya burosaara geedesaaray tambako. Sazzi yeseesuse yeso waaxi tultowafa wooma keenguwasa mikkeko ta inge. 7 Iishashi yeenxhoko uddi e ekke, esuseni Wonto ta maaqe, esini ta yele e maaqeydiko. 8 Yeydi e maaddhakoni jhasheeshiti, aadexuwasiti, tunaxiti, axe wodheesiti, laggeteesiti, qayeesiti, Wonto maaquwasa wonto mati kuxeesiti, yeydiwo zaadaxiti be uddina u tagoy dine hidi hiyuttesaara tamaaray essaaka yese orjena megge tama bagadiyaakako e maaqe. Ye esini lakkunxo hayboko" yeydi taase e hido.
Kille Yerusaleeme gisha
9 Aallicira laappi waayyey essaaka kundese laappi miijhe ayti yecha laappi woosaxiti giddaafa bidzi taako yoodi "Yoowwa! Dore gelese bemba naddhesenniyoko nemba ta beyse" yeydi e hido. 10 Ye e geedeni Wonto Ayaanay harajena ta beyoronike taa mati yesune ye woosaxi tamba orje bakka gara etti e kesso. Hayla maaqe katama Yerusaleemey afaafa Wonto da'aafa e hodhusune tamba e beyso. 11 Ye Yerusaleemeni Wonto kuxa fuulana faqiya e yecha. Faqiya e yese faqe modhetey hade iyasphidiyafa bente keddaydi kuxuttese shuchukiyara hade modhe daw'atakiyara moddhi faqesa e maaqicha. 12 Ye katamani malla maaqe afaa galalese shuchi qeyshe e keengicha. Tamma lam'i sumani e keengicha. E sumittaani tamma lam'i woosaxiti ee'iya u yecha. Ye sumiti garani tamma lam'i Isra'eele ommiti sunxi diizutti e yecha. 13 Oshichi bade haydzi suma, hadursi bade haydzi suma, afa bade haydzi suma, oomo bade haydzi suma e keengicha. 14 Ye katama qeyshi e gara be ee'e tamma lam'i shuche e keengicha. Ye shuchiti garani doruse maaqe tamma lam'i anxuttaasiti sunxiti diizutti e yecha.
15 Taara wolko zeeriya yecha woosaxini katamaara e sumaara yeydiwo shuchi qeysheni esuna be makke worqe kallo e keengicha. 16 Katamase e galaltey e aaketey wol genniyowo maaqisine oyddi badena wol makko e maaqicha. Esini ye katama be kallona e matto. E galalteni e mattine lam'i kuma oyddi xhiixi kiilo meetire e maaddho. E aaketeni afaa e galalteni ye e genniyowo e maaddho. 17 Ye woosaxini shuchi qeyshe e matto. Esuna e makkicho eruttese makkona laappi xhiixe oyddi tamma oyddi kurmayle aallo e maaddho.
18 Ye katama qeysheni iyasphide sunge seelo shuchuna keeluttesesa e maaqicha. Katamani modhe daw'ata bishe fettona geejheshe worqewo e maaqicha. 19 Katama qeyshi e gara eedhese shuchi be bishana bishana yese e woomay keddaydese seelose maaqe shuchuna bishushuttesesa e maaqicha. Buronasi iyasphide, lakkunxoy sanfere, hayssoy kelqedoone, oyssoy maragade, 20 ichichoy sardonikise, izzunxoy sardiyoone, laappunxoy kristiloobe, hazzunxoy birille, oddunxoy waraware, tanxoy krisobhirase, tamma bidzunxoy yaakinte, tamma lakkunxoy ametestinoose yeydi e maaqicha. 21 Tamma lam'i sumay be bishana bishana yese tamma lam'i seelose maaqe shuchuko e maaqicha. Bidzi sumay bidzi seelose maaqe shushaafawo eedhesesako e maaqicha. Katama ogey hade daw'atake fo'e garxesa iitana geejheshe worqewo e maaqicha.
22 Uddi base danda'e Laaxe maaqe Wontowara doraaray ye katamaaka uddi godowa hade Wonto Hayla Zawaaka be kuxuttichonike u kuxutte gisha ye katamaaka hayla zawa tani beedo baasso. 23 Katamaseni Wonto kuxa fuulay faqicho gishaara dori ye katama faqe maaqe gishaara qoossini oo'oyne agunnay faqorosa worgusuwasso. 24 Be wude wude yese axitini ye katama fo'enako sekke hanke u hante. Saha gara yese kaataxheni kuxa fuula ingicha wodunte etti u yoone. 25 Yaha qamay baa gisha e gasay aba wonteni aykuttuwasso. 26 Be wude wude yese axiti kuxaara kuxa fuulaara beese ingicha wodunte ye katamaaka etti u oone. 27 Darrise abako hanteesitaara zaade zeereesitaaray abani tuna maaqesi be uddina ye katamaa geluwasso. Geleesitimay doruse maaqe yeso fissharowa e sunxi diizutteseesitawoko.