20
Kuma bera aallo Kristosaara kaate gisha
1 Ye e geede biixi booko do'ese qulfiyara malla sansalatiyara be kuchiya aytese woosaxi afaafa hodhusune ta beedo. 2 Esini dobesse ayti bidzi kuma bera aallose e tutto. Ye dobessini "Dabiloose" oo'oyne "Humbaye" hidi hiyutte olo shooshuko. 3 Bidzi kuma beray aaloro aallo ha e geede sekke be wude wude yese axita e haluxuwannike woosaxi dobesse biixi bookowa datti e suma tucci e goozzo. Ye beriti itto geede oddhe woggase birchutteko esa e worguse.
4 Ye e geede kaati uttuxita ta beedo. Ye kaati uttuxiti gara uttesesiti yaa'oronike ususe adetoy e ingutto. Assini Yesuusa gisha u otosunaara Wonto kato u otosunaara u baalay burdine haydha axiti leemo ta beedo. Ye usitini bo'oseni maaqqe naqutti gaduttese bo'o bisha buro dissutto baasso. Be deemowani maaqqe be kuche gara ye bo'o yerago gadutto baasso. Usini en'a maaddhi dendi Kristosaara wolko bidzi kuma bera aallo u kaatto. 5 Ye esini acha haybowafa denxoko. Haydhecha fediti bidzi kuma beray ittoro makko haybowafa dendutto baasso.
6 Acha haybo denxose shahaxe maaqeesiti suuzutteseesitaara haylitaarako. Wontosaara Kristosasaara kahineko u maaqe. Kristosaarani wolko kuma bera aalloko u kaate. Lakkunxo hayboni u gara adeto keenguwasso.
Humbayey iichutte gisha
7 Bidzi kuma beray itto geede Humbayey tufiyafa e birchutte. 8 Saha wosula aallo be wude wude yese axiti be uddina ye usitini Gogiyara Maagogiyara halussi toorase essesuko e kese. U taafoni hade bagade nuuna yese manchake yesesako. 9 Usini ha saha aakete aallofa alsi yoodi haylaxiti yese godo eehuttese katama u gooddo. Googuttuwaye baaka tamay afaafa hodhi uso maxxhi muudo. 10 Uso halussi yecha Humbayey bo'owara zaadaxe maaqe kaayaxaaray dine hidi hiyuttesaara tamaaray essaaka yese orjena megge tama bagadiya u yese godowa e dafutto. Usini qamaara wontaara koolo makki aallo yaaka u maddhunge.
Aallicira yaa'a
11 Ye e geedeni booxaara mallaara maaqe kaati uttuxowara e gara uttesesaara ta beedo. Afaara sahaaray e burofa dhaddi badho. Godoni ususe bento baasso. 12 Haydhechaashita anguzaxhitaara baraxitaaray kaati uttuxo buro u ee'usune ta beedo. Fissharitini do'utto. Fede fissharoni do'utto. Ye esini en'a yeseesiti sunxi essaa diizuttese yeso fissharoko. Fissharowa u hantay diizuttesenike haydhechaashiti gara Wontoy e yaadho. 13 Bagadeni beeka haydhi yechaashita kessi e indo. Haybowara Si'ooliyaray beeka haydhi yechaashita kessi u indo. U bidzi bidzina u hantake hantakeysi Wontoy u gara e yaadho.