19
1 Ye e geede afaaka laga axiti bidzi katona uynesa bishe kato ta siido. Usini "Haleluya! Wontoy be axita loollusiko e yese. Kuxa fuulay esuse maaddhiko e yese, be osanani hantiko e yese. 2 Ye esini e yaa'ay aadiyara gizowarako. Laggetona saha tunusecha malla maaqicha zaakoyndo gara yaadhiko e yese. E maalita i woddho gisha u suuxe matiko e yese" yeydi u hido. 3 Sekkeni "Haleluya! Cuwway issaafa koolo koolo makki aalloko wokke e kese" yeydi u hido. 4 Lam'i tamma oyddi cimitaara oyddi en'a meddhitaaray kaati uttuxo gara uttiya yese Wonto buro undi "Ameen, haleluya!" yeydi hissine u disso.
Dori kuulase maaqe qamete gisha
5 Ye e geedeni "Hinuno Wonto maalito, baraxhitaara anguzaxhitaara maaqeesito, hi uddina esa jhasheeshito! Nu Wonto keddaysuwayte!" yeydi hine katoy kaati uttuxo googiyafa e sinto. 6 Ye e geedeni hade laga axiti bidzi katona uyne katoke yesesi, hade malla waaxi tonohe ooshuke yesesi, hade iitana googunge googunxi katoke yesesi "Uddi base danda'e Laaxe maaqe ni Wontoy kaatti yese gisha haleluya! 7 Dori kuulay elli yese gisha e ekkenini bemba naddhi yese gisha nu maggoose, ililli nu hiyyeese, esani nu kuxxoose. 8 Geeshaara laci lacidiyara hinesa talbaafa meddhuttese maa'o i maa'oronikeko isuse e ingutto" yeydi e hido. Talbaafa meddhuttese maa'oy haylaxiti hanto gizo hantako.
9 Woosaxini " 'Dori kuulase maaqe qametese xheyguttaasiti suuzuttesesako' yeydi diizuwa" hidi tamba e hido. Sekkeni assi "Ye usiti Wontoy oto aade maaqe katitako" yeydi taako e hido.
10 Tanini esuse dissese e buro ta undo. Esimay "Dhagguwa! Wontosewo baaka taase dissofuna! Tanini hade neenkiyara hade Yesuusay adduso aade minsi ayti ohe fede aadexeesitukiyara yese Wonto maalako. Yesuusay adduso aadey kaayaxiti kaayo zeeroronike mahe Wonto Ayaanako" yeydi taase e hido.
Booxi faradze gara uttasi gisha
11 Ye e geedeni afay do'utti yesune ta beedo. Bidzi booxi faradzey yaaka e yecha. Ye faradze garani "Muxhuraxaara Aadaxaara" hidi hiyuttesi uttiya e yecha. Gizo ogenako e yaa'e, gizo ogenako e dargutte. 12 E aafeni hade tama looxheke faqesako e maaqicha. E qinowani kaatuse gadutte laga gullitako yecha. Esa baaka ooneni eruwa sunxuko e gara diizutti yecha. 13 Esini suussaa gellese maa'oko e maadhese, e sunxini Wonto Katoko. 14 Booxi faradziti gara utteseesiti talbaafa meddhuttese booxe maaqe geeshi maa'o maadhese afaaka yese tooraxiti e geede hamiya u yecha. 15 Be wude wude yese axita esuna e cade nuunaxe maaqe satatay e asshaafa kesso. Esini qanga kallonako axe e ahe. Uddi base danda'e Wontoy u gara be huuleesita waake e hisesa beyse weyne daanay essaa cicutte godoko weyne e dorbe. 16 E maa'o garaara e fashane garaara "Kaataxhese u kaate, laaxituse u Laaxe" yeydi hine sunxi diizutti e yecha.
17 Ye e geedeni qoossuka eedhese bidzi woosaxe ta beedo. Esini wona afaanna hange kafituko "Wonto qamete maaqe malla tato gara yoodi bhikkiluttuwayte! 18 Kaataxhe acho, toorase afana maagiti acho, osaxe maaqe tooraxiti acho, faradze achoni maaqqe faradziyaditi acho, maaliti achoni maaqqe maala maaquwasiti achoni, baraxhe achoni maaqqe anguzaxhe acho oone achoni yoodi muuwayte!" yeydi be kato keddaysi e hido.
19 Ye e geedeni bo'owara ha saha kaataxhitaaray yeydiwo u tooraxitini booxi faradze gara uttiya yesesaarani maaqqe e tooraxitaara darguttese bhikkilutti u yesune ta beedo. 20 Bo'oni aykutto, buro bo'o sunxuna laga micushe abako hanticha zaadaxe maaqe kaayaxi e aykutto. Be hanto micushe abakona bo'o yerago be gara keengeesitaara naqutti gaduttese bo'o bisha buro disseesitaara e haluxicha. Ye lam'i orjena eexhe dine hidi hiyutte abakona megge tama bagadiyaka be lubbowara yesine u dafutto. 21 Atta tooraxitini assi faradze gara uttesi asshaafa kese satatana u haydho. Kafitini uddi u acho muudi missho.