22
Yeso waaxi gisha
1 Ye e geede woosaxi Wonto uttuxowara dori uttuxowara maaqe godofa kessiyaka yese hade daw'atake laci lacidi faqe shoorena hange yeso waaxe tamba e beyso. 2 Waaxini ye katama aako oge giddaanna e hangicha. Ye waaxuse e hadursi badeni e oshichi badeni yeso inge mixi e yecha. Agunnana agunnana kaxhisine bidzi bera tamma lam'i wogga aafe e kaxhicha. Ye mixi washeni be wude wude yese axita e loolusicha.
3 Ha e geede sekke Wontoy aaceshi ye katamaa baasso. Wontowara doraaray utti kaatesi ye katamaani e maaqe. E maalitini esa yaha u kuxe. 4 E aafushani u beene, e sunxini u deemowa e diizutte. 5 Ye e geede sekke qamay baasso. Laaxe maaqe Wontoy ususe faqe gisha faqey beyse fo'iyara qoossi inge fo'iyara worgusuwasso. Koolo makki aalloko u kaate.
Yesuusay yootako e yoone
6 Ye e geedeni woosaxi taako "Ha ohuttasi eezo keenguwasaara aadiyarako. Kaayaxiti kaayo beedi zeeroronike mahe be Ayaana kaayaxituse inge Laaxe maaqe Wontoy ukke maaqe abako be maalita be beysenike be woosaxe ansiko e yese" yeydi e hido. 7 Yesuusani "Yey, tani ukkeko yoone. Ha fissharowa ohuttese kaayo kakkesi suuzuttesesako" hidi e hido.
8 Haanxhi zeere siidasaara beedasaaray tambako Yohanise. Ye esa ta siidoniyakaara ta beedoniyakaara haanxho tamba beysa woosaxuse dissese e buro ta undo. 9 Ye woosaxini "Dhagguwa, yeysi matofuna! Tanini neerani maaqqe neyndo na'axhita maaqe kaayaxitaara yeydiwo ha fissharowa ohuttase kakkeesitaara uddi e maalako. Wontosewo dissuwa" hidi e hido.
10 Sekkeni taako ohisine "Woggay ellese gisha ha fissharowa ohuttese kato eruttese e danda'uwannike ha fissharo tuccofuna. 11 Ha e geede yoona iita hante axiti iita hantisine yesuwaye, tunaxi tuna hantisine yesuwaye, gizo axi gizo hantisine yesuwaye, haylaxini hayla maaqisine yesuwaye!" yeydi e hido. 12 "Yey, tani ukkeko ta yoone. Axuse e bidzi bidzina e hanto hantakeysi ingese e wooma ettiko ta yoone. 13 Achaara aalliciraaraya, burosaara geedesaaray, denxowara alsowaray tambako. 14 Katama sumaanna gelesaara yeso inge mixi aafe miyesaara 'Ha axuse bishako e bishe' yeydi be hiyuttoronike be maa'o shotaasiti suuzutteseesitako. 15 Tunaxiti, qayaxiti, laggeteesiti, axe wodheesiti, Wonto maaquwasa wonto mati kuxeesiti, zaade eeheesitaara be hantanaara be zeerenaara zaaddeesitaaray uddi katamame wudeko u atte.
16 Tani Yesuusay be godowa godowa yese Wonto zawaxita maaqe hinuse ha esita e ohoronike afaase ta woosaxe ansiko ta yese. Tani Dawite xhabhowafa mudhasaara e fira fiixhaafa yeluttasaarako. Laci lacidi faqe wontaso bakkalchay tambako."
17 Ayaana Geeshaara gelenniyaray "Yoowwa!" hidiko u hine. Siinesini "Yoowwa!" hidi hiwwaye! Waaxe sazzasini yoowaye! Worgesini wooma shando badi yeso inge waaxe mikke etti ushuwaye!
18-19 Hay, ha fissharowa kaayaxuna ohutta kato siine axituse uddi "Ooneni ha kato gara bidzoni e kosa'ayko ha fissharowa diizutti yese deexho waayyeko Wontoy e gara e oone. Ooneni ha kaayo fissharowa diizutti yese katowafa bidzoni e facusha'ayko ha fissharowa diizutti yese yeso inge missaafaara hayla maaqe katamaafaarako Wontoy e tago e facushe" hidiko ususe minsi ta ohe.
20 Ha esa yeydi ato maaddhi ohiya yesesi "Eewa! Ukkeko ta yoone" hidiko e hine.
Ameen, Laaxi Yesuusa yoowwa!
21 Laaxi Yesuusay axuse keenge maxo modhetey aadexeesitaara uddi wolko maaquwaye. Ameen.