16
1 Ye e geede laappi woosaxituko "Wonto huulay essaaka yese quulita etti handi ye huula yekke sahaaka gussuwayte!" yeydi hine keddaydese kato Wonto Hayla Zawaafa ta siido. 2 Acha woosaxi be quule etti handi essaa yechashe yekke saha gara e gusso. Bo'o yerago be gara keenge axiti garaara naqutti gaduttese bo'o bisha buro disse axiti garaara iitanaara orjenaara maddhunxe maday e bento.
3 Lakkunxo woosaxi be quule etti essaa yechashe bagade gara e gusso. Bagadeni haydhese axi suuxe bishe suuxe e maaddho. Bagadiya yecha en'ay uddina haydho.
4 Haysso woosaxi be quule etti essaa yechache shoorena hange waassakaara tultowakaara e gusso. Ye usitini suuxe maaddho. 5 Waaxi gara adeto keenge woosaxi "Yeseyo, yechayo, hayla maaqeyo! Ha esukeydi ne yaadho gisha neni gizoko. 6 Haylaxitusaara kaayaxitusaara u suuxe u gusso gisha woddhasiti suuxe uso usshiko ne yese. Ha esini ususe bisheshako" yeydi e hisune ta siido. 7 Ye e geede kaasha e gara kaashushooshaafa "Eewa, uddi base danda'e Laaxe maaqe Wonto! Ne yaa'ay aadiyara gizowarako" yeydi hine kato ta siido.
8 Oysso woosaxi be quule etti essaa yechashe qoossi gara e gusso. Qoossi axe be tamana meggoronike osay ingutto. 9 Axitini orje tama michana u meggutto. Yeenxhi deexho waayye gara adeto keenge Wonto sunxe u casshosha baaka be cubbo dhaddi maaqutto baasso, Wontoni kuxutto baasso.
10 Ichicho woosaxi be quule etti essaa yechashe bo'oy e gara utti kaatichoshi gara e gusso. Bo'o kaatetoy iitana ceendo. Axitini maddha iitetiyafa densi gaggo u qiicco. 11 Assi be maddha gishaara be mada gishaara afaaka yese Wonto u cashichosha baaka be hanto iita hanta dhaddi maaqutto baasso.
12 Izzunxo woosaxi be quule etti essaa yechashe malla maaqe Efraxhise sunge waaxi gara e gusso. Qoossi kese badefa yoone kaataxhese ogey naquttesesa maaqorosa ye shoore waaxi mello. 13 Dobessi asshaafaara bo'o asshaafaara zaadaxe maaqe kaayaxi asshaafaara koppe bishe haydzi tuna ayaaniti kesusune ta beedo. 14 Ye usitini micushe abako hante xhoozitako. Ye haydzi xhooziti uddi base danda'e Wontose maaqe keddaydese yaa'a wontaa toorase u bhikkilorosa ha saha gara uddi yese kaataxheko u hando.
15 "Yebo, tani hade kaysokeko dedha ta yoone. Gunduse be maaquwanikiyara e gunduse axi beenesumiyara birti be maa'o maa'ese naddhi kakke axi suuzuttesesako."
16 Ye xhoozaxhitini kaataxhe Ibrayste nuunana "Armagedoone" hidi sunge godo u bhikkillo.
17 Laappunxo woosaxi be quule etti essaa yechashe agexi gara e gusso. Wonto Hayla Zawaaka yese kaati uttuxo godowafa "Ittose!" yeydi hine keddaydese katoy sinto. 18 Ye e geedeni zeelunxi zeelundo, didunxi didundo, googunxi googundo, orjena sahay en'o. Axi ha saha gara meddhuttowafa ayti ye e bisha orje saha en'oy maaddhi eruwasso. 19 Malla katamay haydze shahutto. Axiti essa yecho katamitini koolona baado. Wontoni malla maaqicha Babiloonese woggay isuse ellosa e masso. Hade weyne daanake yese keddaydese be huulay essa kundese miijhiyafa i ushoronike e mato. 20 Dhaaniti be uddina baado. Bakkitini be yecho godo dheeddo. 21 Be bidzi bidzina oyddi tammi kiilo maaqe shachi axiti gara afaafa gutto. Ye deexho waayyey iitana maddhunxesa e maaqicho gisha axiti be gara unda shachi oodo deexho waayye gisha Wonto u cassho.