15
Muse zingaliyara dori zingaliyara
1 Fede yerago assi afaaka keddaydesesaara micusheshaara ta beedo. Aallicirase maaqe laappi deexho waayye aytese laappi woosaxita ta beedo. Aallicira hidi u hiyuttosi ye esuna Wonto huulay ee'e gishako. 2 Tamaara worqutti hade daw'atake maaddhese bagadeke yesesa ta beedo. Bo'oni, ye bo'o bisha naddhi gaddesoosani, ye bo'oy esuna erutte sunxi taafoni iishaashiti Wontoy ususe indo zimbeke yesesa ayti hade daw'atake maaddhese bagade da'aa ee'iyaka u yecha. 3 Wonto maala maaqe Musesaara dorusaara maaqe zingale zingalisine
"Uddi base danda'e Laaxe maaqe Wonto!
Ne hantay mallaara micusheshaarako.
Be wude wude yese axiti kaato!
Ne ogey gizowara aadiyarako.
4 Laaxo! Niya jhashuwassaara
niya kuxuwasaaray oonewa?
Ye esini haylay nembawoko,
aade maaqe ne yaa'ay addeydo gisha
be wude wude yese axiti uddi yoodiko ne buro u disse"
yeydi u zingallo.
Laappi woosaxitaara laappi deexho waayyiyara
5 Ye e geedeni assi ta beedo. Hay, afaaka yese Wonto Hayla Zaway ye esini ato maaqe maa'o zaway do'utti e yecha. 6 Laappi deexho waayye aytese laappi afaase woosaxiti Wonto Hayla Zawaafa u kesso. Usini geejjhi laci lacidi faqe maa'o maadhi worqiyafa hantuttese hade sabbatake yesesa be fenga gara xhaaxhesesa u maaqicha.
7 Ye e geedeni oyddi en'a meddhitaafa bidzi koolo makki aallo yese Wontoy huullo huulay essaaka kundi yese worqiyafa hantuttese essaa ushusho laappi quule laappi woosaxituse e indo. 8 Wonto Hayla Zawani Wonto kuxa fuulafaara e osafaara kessa cuwwana e kundo. Laappi woosaxiti oodo laappi deexho waayyey aalloro aallo ooneni Wonto Hayla Zawa gelese dandadho baasso.