14
Doraara xhiixe oyddi tamma oyddi kuma axitaara
1 Ye e geedeni hay dori Xhiyoone bakka gara ee'usune ta beedo. Esaara wolko e sunxaara esade sunxaaray u deemowa diizutti yese xhiixe oyddi tamma oyddi kuma axiti u yecha. 2 Afaafani bidzi malla kato ta siido. Ye katoni hade malla waaxi tonohe ooshuke hade orje googunxi katoke hade zimbe bishesha kaa'e axiti kaa'isine siisicho katoke yesesa e maaqicha. 3 Usini uttiya yese kaati buroni, oyddi en'a meddho buroni, cimiti buroni kille zingale u zingallo. Saha gara yeseesitaafa wozutta xhiixe oyddi tamma oyddi kuma axita baaka ye zingale ooneni erese dandadho baasso. 4 Ye usitini indowaxhaara muti be eruwa gisha indowaxhaara muhena tuneydo baasitako. Dori hange oge uddi esaara wolkoko u hange. Wontosaara dorusaara burona bentase u maaqorosa axiti giddaafa wozutti yeseesitako. 5 Be nuunana abani zaade zeerdi eruttuwasso, haasseni keemuttuwasso.
Wonto yaa'a ohe haydzi afaase woosaxiti gisha
6 Ye e geede uddi be wude wude yeseesituse, be ommana ommana yeseesituse, be nuuna nuuna zeereesituse, be biyyana biyyana yeseesituse uddi koolo makkinase maaqe modhe odo ha saha gara yese axuse uddi ohese afaase woosaxi afaanna fangena hangusune ta beedo. 7 Be kato keddaysi "Wontoy yaa'e woggay ellese gisha esa jhashuwayte, kuxuwayte! Sahaara afaaraysi yeydiwo bagadiyaara waaxi tultowaraysi meddha Wontose dissuwayte!" yeydi e hido.
8 Feday afaase woosaxi lakkunxoy "Weyne daanay gooshenike iitana eexxhi i worge laggetona be wude wude yese axi uddi u goojhoronike mahicha malla maaqicha Babiloonni undonniko, undonniko!" yeydi hissine burona hangicha woosaxi geede e aadho.
9 Fede haysso woosaxini buro handa woosaxiti geede hangisine be kato keddaysi "Ooneni bo'o burowara e bishana naqutti eedhesesi burowara dissesi e yeragoni be deemowa oo'oyne be kuchiya gadesi yesa'ayko 10 Wonto huulako weyne daanake mati beese e ushe. Ye e ushe weyne daanani fedaara worqutto badi yesine essaa ushusho huula miijhiyaka naquttesesako. Yeydiwo hayla maaqe afaase woosaxiti burowara dori burowara tamanaara iitana eexhe dine hidi hiyutteesunaarako maddha u beene. 11 Uso maddha beysiya yese tamaafa kese cuwway koolo makki aalloko wokke e kese. Bo'osaara naqutti gaduttese e bishashaara disseesiti e sunxe be gara gaddi yerago mati yeseesiti uddi qamani wontani kaxe efe baakako u maddhunge" yeydi e hido.
12 Wonto woosso kakkeesitusaara Yesuusa aadessi miindi yese haylaxitusaara u danda'oy eruttesi ye woggaakako. 13 Ye e geedeni " 'Hattiyafa ayti Laaxuna yesine hay'eesiti suuzutteseesitako' yeydi diizuwa!" yeydi hine kato afaafa ta siido. Ayaana Geeshini "Eewwa, modhe u hanto hantay u gara erutte gisha be gafetiyafako kaxe u ekke" yeydi e hido.
Saha gara yese axiti bhikkilutte wogga gisha
14 Ye e geedeni hay booxi dhuma ta beedo. Ye dhuma gara axi yele bisheshi uttiya e yecha. E qinowa kuxase gaduso worqe gulley e yecha. Be kuchiyani nuunaxi baaca e aytecha. 15 Wonto woosaxi feday Wonto Hayla Zawaafa kessi ye dhuma gara uttichashuko be kato keddaysi "Ha saha gara kaxa bhikkilo woggay elliko e yese. Ace woggay yoodese gisha ne baaca etti aci bhikkiluwa!" yeydi e hido. 16 Ye dhuma gara uttichashi be baacani saha gara esuna go'uttese e etto. Saha gara yechashitini ye baacana acutto.
17 Wonto woosaxi feday afaaka yese Wonto Hayla Zawaafa e kesso. Esini assi baaca nuunaxe ayti e yecha. 18 Fede woosaxi tama gara adeto keengesi kaasha e gara kaashushooshi da'aafa kessi ye nuunaxi baaca ayti yese woosaxuko "Weyne aafey kaxxhi yese gisha ne baaca nuunaxe etti saha gara yese weyne kaxha uddi bursi bhikkiluwa" yeydi be kato keddaysi e oto. 19 Woosaxini saha gara esuna go'uttese baaca e etto. Saha gara yese weyne kaxha bursi bhikkilli weyney essaa cicutte godowa e datto. Weyne cicey beysesi Wontoy u gara be huuleesita waake e hisesako. 20 Katamame wude yese weyne essaa cicusho godowa weyne aafe tokena u dordo. Suuxini ye godowafa kese e ayto. Wokke afaa kedda e hidosi haydzi kurmayle maaqusune be buro gara e galaltey haydzi xhiixi kiilo meetire zardesesako e maaqicha.