13
Bagadiyafa kese bo'o gisha
1 Ye e geede bidzi bo'oy bagadiyafa kesusune ta beedo. Tammi ushumiyara laappi qinowarako e keengicha. E ushumiti gara kuxase gadutte tammi gulley e yecha. E bidzi bidzi qino garani Wonto cashe sunxi diizutti yecha. 2 Ye ta beedo bo'oni worbako e bishicha. Worba bishuwaye baaka e tokeni hade dibe sunge malla bo'o toke e asshani hade garma assha e bishicha. Dobessi kaati uttuxi gara utti e kaatoronike mati be osaara orje be adetowara esuse e indo. 3 Ye bo'o qinittaafa bidzi haybose aandi elluse madake iitana madeydesesa e bishicha. Madewaye baaka ye haybose aandi ellusecha maday loolli e yecha. Saha gara yese axi uddina dhonxhidi micci bo'o geede u hando. 4 Axitini dobessi adeto bo'ose indese gisha dobessi buro u disso. Assini "Ha bo'o ellesi oonena? Ooni esaara wolko darguttese danda'esa?" yeydi hissine ye bo'o buro u disso.
5 Ye bo'oseni e nashuttoronikiyara Wonto gara nuuna e garoronikiyara esuse e maaddho. Oyddi tamma lam'i agunna e hantoronike adetoy esuse ingutto. 6 Esini Wonto casheshe dendi Wonto sunxaara essaa e yese godowara afaa yeseesitani cashe e ayto. 7 Haylaxitaara e darguttoronikiyara uso e iichoronikiyara osay esuse ingutto. Be ommana ommana yeseesituse, be biyyana biyyana yeseesituse, be nuunana nuunana zeereesituse, be wude wude yeseesituse u uddi gara adetoy esuse ingutto. 8 Ha sahay meddhuttosafa aytia u sunxi shufutta doruse maaqe yeso fissharowa diizutto baasiti saha gara yese axiti uddi bo'ose u disse.
9 E siyorosa washey yesesi siwwaye. 10 "U di'uttoronike e maaddheseesiti u di'utte, satatana u hay'oronike e maaddheseesiti satatana u hay'e" yeydi e hido. Yoonase, haylaxituse u danda'uwara aadexowara e eruttesi ye woggaakako.
Sahaafa kese bo'o gisha
11 Fede bo'oy sahaafa kesusune ta beedo. Dori ushume bishe lam'i ushume e keengicha. E zeerichoshini hade dobessukeko e maaqicha. 12 Buro bo'o garafa kume adeto etti e sunxuna hantiya e yecha. Haybose aandi ellusicha madaafa loollecha buro bo'ose sahaara saha gara yese axitaara uddi u dissoronike e mato. 13 Axiti buro afaafa tama be hoxoro aallo keddaydese micushe hanta e hanticha. 14 Buro bo'o sunxuna micushe hanta e hantoronike adetoy ye bo'ose inguttese gisha ha saha gara yese axita e halusso. "Satatana madeydi loollecha bo'o kuxese e bisha naquwayte!" hidi axituko e oto. 15 Ye lakkunxo bo'oy buro bo'o bisha maaddhi naquttesesi en'a maaqoronike e mahorosa adetoy esuse ingutto. Ye naqutta bishay en'a e maaddhosi zeereseni be danda'oronikiyara be buro dissuwasiti ooneni hay'oronike mahese be danda'oronikiyarako.
16 Ye lakkunxo bo'oy baraxhitani maaqqe anguzaxhita, jhi'itani maaqqe wodumita, maala maaquwasitani maaqqe maalita uddina u oshichi kuchiyani oo'oyne u deemowaka yeragoy maaqoronike be osana e mato. 17 Ye ogena ye bo'o yerago keenguwasi ye esini ye bo'o sunxe oo'oyne e sunxi taafo be gara keenguwasi woomesaara zal'esaara e danda'uwannikeko. 18 Lakkunxo bo'oy gaddese yerago birshi erese gaxaara eraarako e worguse. Ye taafoy bidzi axi esuna erutte taafo e maaqe gisha gaxaara eraara keenge axi e birche arsi beedi erese beese danda'uwaye. Buro bo'oy esuna erutte taafoy izzuppi xhiixe izzuppi tamma izzuppuko.