12
Bidzi indowara dobessaara
1 Ye e geede afaaka keddaydesesaara micusheshaara maaqe yeragoy e bento. Ye esini bidzi indoy qoosse maa'oke maadhesenni, agunnay i toke oomo yesenni, tamma lam'i xhoolinte be gara keenge kuxase gadutte gulle be qinowa keengenni i bento. 2 Isini gawwaara i yecha. Yelese i hine zersoy iso aytine maddhundi i uydo. 3 Ye e geede fede yeragoy afaaka e bento. Laappi qinowara tammi ushumiyara keenge ye e qiniti garani laappi kuxase gaduttese gulley yesesi malla zo'o dobessi e bento. 4 Be naxenani xhoolintiyafa haysso kuche afaafa yekke goosshi sahaa e datto. I yeloroniyaka i yele oodhese wordi yelese uddhese indo buro e eedho.
5 Be wude wude yese axita e uddina qanga kallona ahese hine asanxe i yello. Ye yeleni Wontokowara e gara e utte uttuxukowara wokke shodutti e efutto. 6 Ye indoni bidzi kuma lam'i xhiixe izzuppi tammi wonta i kaaluttoronike Wontoy isuse naddhese godo saha melaa dhaddi i badho.
7 Afaaka tooray dendo. Mika'eeliyara e woosaxitaaray dobessi garaara e woosaxiti garaara toora u denso. Usini sekke mati dargutto. 8 Darguttuwaye baaka Mika'eeley uso iissho. Afaa be keengicho godo u dheeddo. 9 Ye malla dobessi ye olo shooshi yekke e dafutto. Esini saha gara yese axe e uddina qaaruse "Dabiloose" oo'oyne "Humbaye" yeydi xheyguttesako. Yekke sahaa e dafutto. E woosaxitini esaara wolko u dafutto. 10 Ye e geedeni afaaka be kato keddaysi zeeresa ta siido. Zeerisineni "Nuundo nayshita wonta qama ni Wonto buro luufiya yechashi afaafa saha dafutti e yese gisha Wontoy be axita loolussiko e yese, be osanani hantiko e yese, be axiti garani kaattiko e yese! Adetoni e Kristosase maaddhiko yese! 11 Nuundo nayshiti dori suuxunaara Wonto gisha be oto katonaarako u iissho. Aadexo gisha hayboy u gara yoodakoni be lubbo maarese worgutto baasso. 12 Ye e gisha afaara afaaka yeseesitaaray magguwaye! Humbayey be baaneesuse oddhe woggay attosa erdi keddaydese huulana yekke e hodhese gisha sahaara bagadiyaara baduffu!" yeydi e hido.
13 Dobessi yekke sahaaka be dafuttosa be beedo woggaaka na'e yellecha indo e gooddo. 14 Indoni shooshi garafa handi zardi haydzi beraa badeysi kaaluttese saha melaaka beese naquttese godowaka fangena dendi i hamoronike malla kooki fange bishe lam'i fangey isuse e ingutto. 15 Ye indo wulqay eforosa shooshi shoorena hange waaxe elle waaxe be asshaafa i geede e coossho. 16 E coosshakoni sahay ye indo e mardo. Be assha dodhini dobessi asshaafa kessecha waaxe wona e ussho. 17 Dobessini indo gara huulli i nayshaafa atti yechashitaara wolko darguttese e hando. Usini Wonto woga kakkeesitaara Yesuusa gisha be siidosa minsi ayti oheesitaarako u maaqicha. 18 Dobessini bagade da'aa mancha gara e eedho.