11
Wonto gisha zeere lam'i gerita
1 Ye e geede galala shomboqo bishe makke kalloy taase e ingutto. "Handi Wonto Hayla Zawaara kaasha e gara kaashushooshaara makkuwa! Wonto kuxeesita taakuwa. 2 Wonto Hayla Zawa googe qeyshushe zawa bademay Ayhuda maaquwasituse e inguttese gisha ye godo dhagguwa, mattofuna. Ye usiti hayla maaqe katamaaka oyddi tamma lam'i agunna aalloko be tokena u dheqe. 3 Ato maaddhi zeere lam'i ta geruse osako ta inge. Usini higilsa maa'o maadhiko ye agunniti giddaa bidzi kuma lam'i xhiixe izzuppi tammi wonta aallo kaayo u zeere" yeydi e hido. 4 Ye usini ha sahase maaqe laaxi buro ee'e lam'i gultaara faqey e gara gadutte lam'i abakowarako. 5 Ooneni uso miidhese wordako tamay u asshaafa kessiko u iilaxe e muune. Uso miidhese worgeesiti uddi hay'e e worgusesi ye e bishanako. 6 Ye usitini kaayo be zeere agunniti giddaaka iray bukkuwannike afa tuceshe yeydiwo waaxe suuxukaaka arxeseni maaqqe be worge woggaaka uddi saha garani be bishana bishana yese deexho maddha oowese adeto keemako u keenge.
7 Wonto woosso zeerdi u alsosi geede biixi bookowafa kese bo'oy usaara wolko e dargutte. Usoni e iiche, usoni e wodhe. 8 U ahani u Laaxi essa suxhuttecho malla katama giddaaka ogiyaka undi e atte. Ye katamay Sodomiyara Gibxhiyara bisshushiko e zeerutte. 9 Be biyyana biyyana yeseesitaafay, be ommana ommana yeseesitaafay, be nuunana nuunana zeereesitaafay, be wude wude yese axitaafay u aha haydzi wontaa badeysiko u beene. U mooguttuwannikeni u tucutte. 10 Ye lam'i kaayaxiti ha saha gara yese axita waayye beysiya yechashe u maaqicho gisha axi uddi u gara ella basuna maggako u magge, massalani naddhi woluseni ingo u inge.
11 Haydzi wontaa badeydi itto geedema yeso inge kaxi Wontokofa yoodi usuka e gello. Usini dendi be tokena u eedho. Uso beya yecha axiti orjena u jhassho. 12 Ye e geede afaafa "Wokke hana kesuwayte!" yeydi hine malla kato u siido. U iilaxiti beesune dhumaanna dhaddi afaa u kesso. 13 Yenniyani orjena sahay en'o, katamase e tanxo kuchey baado, laappi kuma axi haydho. Attaasitini iitana jhashe u ayto. Afaase Wonto kedda kedda u hisso. 14 Lakkunxo deexho maddhay gardiko yese, hay, haysso deexho maddhako ukke yoonesa.
Laappunxo marachi uwwutto
15 Laappunxo woosaxi maracho uydo. Afaakani "Saha kaatetey nu Laaxi Wontosaara e Mesihesaara maaddhiko e yese. Esini koolo koolo makkinako e kaate" yeydi keddaydi zeereesiti kato ta siido. 16 Wonto buro kaati uttuxiti gara uttecha lam'i tamma oyddi cimiti be deemona undi Wontose u disso. 17 Usini
"Buroni yechayo, yeseyo, uddi base danda'e Laaxe maaqe Wonto! Keddaydese ne adetona go'utti ne kaatto gisha nemba galatako nu galate.
18 Ayhuda maaquwa axiti huullo, ne huula woggani ello. Haydhi yeseesiti gara ne yaa'e woggani ello. Ne maalita maaqe kaayaxitusaara haylaxitusaara ne sunxe kuxeesitusaara,
baraxhitusaara anguzaxhitusaara u moore ne inge wontay e ello. Saha baysechaashita ne bayse woggay ello" yeydi u hido.
19 Afaaka yese Wonto Hayla Zaway e do'utto. E caaqo taabootey ye Wonto Hayla Zawaa beyutto. Zeelunxi zeelundo, didunxi didundo, googunxi googundo, sahay en'o, iitana malla malla maaqe shachi butto.