10
Wonto woosaxaara oddhe fissharowara
1 Ye e geede osaxe maaqe fede Wonto woosaxi dhumay e googe yesesi afaafa hodhusune ta beedo. E qino googiya iraxhi maashay e yecha. E aafushani hade qoossuke faqesaara e tokeni hade tamake yese biddo bisheshaara e maaqicha. 2 Do'utti yese oddhe fissharo be kuchiya aykiya e yecha. Oshichi be tokena bagade gara hadursi be tokenani saha gara e eedho. 3 Hade garmay ga'enike yese be katona keddaysi e zeerdo. Ye e zeerdo woggaaka laappi googunxi be kato kato u siisso. 4 Laappi googunxiti zeerdo wogga ye u zeerdosa diizese ta hido. Tani hiyese baaka afaafa katoy "Laappi googunxiti zeerdosa aachiyaanna dhagguwa, diizzofuna!" yeydi hinesa ta siido.
5 Ye e geede bagade garani saha garani e ee'usune ta beedecho Wonto woosaxi be oshichi kuche afaaka e denso. 6-7 Esini "Maaqese hine abakoy ha e geede decuwassho. 7 Laappunxo woosaxi marache uwwe woggaaka Wontoy beese hantaxe maaqe be kaayaxituse addusesenike aasshi be gaddecho be maxoko e ituse" yeydi e maaqenike koolo makki aallo yesesuna afaara afa gara yesesaara sahaara saha gara yesesaara bagadiyaara bagadiyaaka yesesaara meddha Wontonako ta caaqe" yeydi e hido.
8 Afaafa ta siido katoy "Bagade garaara saha garaara eedhese woosaxi be kuchiya aytese do'uttese fissharo handi ekkuwa" yeydi assi taako e oto. 9 Hinne ye woosaxuko handi "Oddhe fissharo taase inguwa!" yeydi ta hido. Esini "Etti muuwa! Ne asshaa hade shidakeko e loo'e, ne gawwaarama wola ekkuwasso" yeydi e hido. 10 Tanini ye woosaxi kuchiyafa fissharo etti ta muudo. Ta asshaani hade shidake e loodho. Ta gawwaarama wola etto baasso. 11 Ye e geede "Be biyyana biyyana yese, be wude wude yese, be nuunana nuunana zeere laga axiti gishaara laga kaataxhe gishaara assi kaayo zeereko nemba e worguse" yeydi taako e ohutto.