9
Ichicho marachi uwwutto
1 Ichicho woosaxi maracho e uydo. Afaafa sahaa unda xhoolinte ta beedo. Ye xhoolintey yedena iitana hodhese biixi booko esuna e do'e abakoy esuko ingutto. 2 Ye biixi booko e dodho woggaa hade bidzi godo bhikkilli iitana meggusso megge cuwwake yesesi ye biixi bookowafa cuydo. Ye cuwwana qoossaara afaaray ceendo.
3 Ye cuwwafani booley kessi saha gara yoodo. Saha gara yese qobhoroy keengicho adetoy ye boolese ingutto. 4 Wontose u maaqenike adduse yerago be deemowa keenguwasita baaka ha saha gara yese maatani maaqqe uddi tofutti cultese abako yeydiwo mixeni u miidhuwannike usuko e ohutto. 5 Axitani ichichi agunna u maddhunxoronike baaka u wodhoronike adetoy ususe ingutto baasso. U maddhunxe maddhay qobhoroy axe saaxhe woggaaka axi maddhungenikeko e maaqicha. 6 Ye woggaaka axiti haybeko u worge, worguttuwaye baaka fetto hay'uttuwasso. Haybeseni iitana u worge, worguttuwaye baaka hayboni u garafa dhaddiko e ba'e.
7 Ye booleni hade toorase naquttese faradzitako u bishicha. U qinowakani worqena naquttese kuxase gaduso gulleke yesesi e yecha. U aafushani axi aafushako e bishicha. 8 U qino ufuxini hade indowaxhi qino ufuxuke galala e maaqicha. U gaggoni garma gaggoko e bishicha. 9 U fenga fasshichashini toorase fenga esuna fashusho qangaafa naquttese abakoko e bishicha. U fangey siisicho katoni toorase hange faradziti gooche gaare katoke yesesako e maaqicha. 10 Hade qobhorokeko cade naxe u keengicha. U naxe gara axitani ichichi agunna aallo esuna u maddhunxicho osay e yecha. 11 Be garani kaate keemako u keengicha. Esini keddaydese biixi bookose e woosaxuko e maaqicha. E sunxini Ibrayste nuunana "Abidoone" Grike nuunana "Aphiloone" hidiko e sungicha. Ye e bircheni "Baysesa" yeydi hiyoko.
12 Burona deexho maddhay gardiko e yese, yey, hatteni ha e geede lam'i deexho maddhako assi yoonesa.
Izzunxo marachoy uwwutto
13 Izzunxo woosaxi maracho e uydo. Wonto buro yese worqena naquttese e gara cuwwushusho abako gara yese oyddi ushumiti badena kato ta siido. 14 Be kuchiya maracho ayti yese ye izzunxo woosaxuko "Hange malla waaxe maaqe Efraxhise shooriyaka tufutti yese oyddi woosaxita birchuwa!" yeydi e hido. 15 Axitaafa haysso kuche u wodhoronike ye saatesaara ye wontasaara ye agunnasaara ye berasaara naquttese oyddi woosaxiti u birchutto. 16 Faradzena dargutte tooraxiti taafo taako e oto. Ye esini lam'i xhiixi miliyoone u maaqicha.
17 Ye faradzitaara u gara uttiya yechashitaara harajena ta beedo. Be fengani toora tuce miijhe maadhi u yecha. Ye toora miijhey hade tamake yese zo'o, afa bishaara, foolettaara u bishicha. Ye faradziti qinoy garma qino e bishicha. U asshaafani tamani maaqqe cuwwaara dine hidi hiyuttesaaray e kessicha. 18 Be asshaafa be kesso tamana, cuwwana, dine hidi hiyuttesuna ha haydzi deexho waayyena assaafa haysso kuche woddhi u also. 19 Ye faradziti osay u nuunakaara u naxiyakaarako e yecha. U naxeni shooshe e bishicha, qinoni esuse yecha. Ye qinona axe u miidhicha. 20 Ye deexho waayyenani haydho badi yesine atta axiti be kuchena be hante abako Wonto mati kuxe dhaddi maaqutto baasso. Ye esini xhooze kuxiyafaara siyese oo'oyne beyese oo'oyne hamese danda'uwa worqiyafa, birriyafa, laakaafa, shushaafaara missaafaara hantuttese be wontita kuxiyafaara dhaddi maaqutto baasso. 21 Assini axe wodhe, laahexe, laggete, kayseni dhaddi maaqutto baasso.