8
Dori laappunxo goosse e birshosha
1 Dori goozutti yecha laappunxo goosse birshoniya saatese e bade makko afaaka uddi abakoy mikku hido. 2 Ye e geede Wonto buro ee'iya yese Wonto woosaxita laappe ta beedo. Laappi marachi usuko e ingutto. 3 Fede woosaxi ixhaane essaa cuwwushusho worqiyafa hantuttese miijhe etti yoodi kaati uttuxo buro yese worqiyafa hantuttese e gara cuwwushusho abako da'aa e eedho. Ye e gara cuwwushushooshi gara haylaxiti uddi Wonto shidhechoshaara wor'i e uqusoronike laga ixhaaney e ingutto. 4 Ye ixhaane cuwwaara haylaxiti Wonto shidhechoshaaray woosaxi kuchiyafa cuwwisine Wonto buro wokke e hando. 5 Ye e geede woosaxi essa cuwwushusho miijhe etti e gara cuwwushusho godowafa tama kunsi afaafa saha gara e datto. Googunxi googundo, didunxi didundo, zeelunxini zeelundo, sahani en'o.
Oyddi marachi gisha
6 Ye e geedeni laappi woosaxiti laappi maracho uwwese u naqutto. 7 Burona woosaxi marache e uydo. Suuxaara worquttese tamaara shachaaray yekke saha gara e dafutto. Sahaafa haysso kuchey meggutto, missaafa haysso kuchiyara maata jhiletaara tamay uddi maxxhi muudo.
8 Lakkunxo woosaxi maracho e uydo. Hade tamana megguttiya yese malla bakka bisheshi bagadiya e dafutto. Bagadiyafa haysso kuchey suuxe maaddho. 9 Bagadiya yecha meddhowafa haysso kuchey haydhi itto. Markabiyafa haysso kuchey iitti baado.
10 Haysso woosaxi marache e uydo. Hade tompeke eexhiya yese malla xhoolintey afaafa e undo. Shoorena hange waassaafa haysso kuche garaara waaxi tultiti garaara e undo. 11 Ye xhoolinte sunxini "Camo" hidi e sungicha. Waassaafa haysso kuche camo e mato. Ye waaxi cange iita e maaqicho gisha ye esa ussha laga axiti haydhi u aallo.
12 Oysso woosaxi maracho e uydo. Fo'e ingichashiti ingicho fo'iyafa haysso kuchey e ceendo. Qoossukafa haysso kuchey agunnaafa haysso kuchey xhoolintiyafa haysso kuchey e oxhutto. Wontaseni qamaseni haysso kuchey fo'e keeguwasa e maaddho. 13 Ye e geedeni kooki afaanna hangusune ta beedo. Ye kookini be kato keddaysi "Attese haydzi woosaxiti maracho uwwese u hine gisha saha gara yeseesito, baduffu hinumba, baduffu hinumba, baduffu hinumba!" hidi e hisune ta siido.