7
Xhiixe oyddi tamma oyddi kuma Isra'eelaxiti gisha
1 Ye e geede Wonto woosaxiti oyddi ha sahase oyddi bade eedhi yesune ta beedo. Ye usitini ha saha garani maaqqe bagade gara oo'oyne mixi gara abani agexi agetuwannike oyddi badena yoocha agexe u tucco. 2 En'a maaqe Wontoy axi beese maaqenike axi gara esuna e mahe yerago miijhe aytese Wonto woosaxi feday qoossi kese badena kesusune ta beedo. Ha sahaara bagadiyaara u miidhoronike ususe adetoy inguttese oyddi woosaxituko be kato keddaysi 3 "Nu Wonto maaliti deemowa Wontose u maaqenike beyse yerago nu mahe aallo sahani maaqqe bagadeni yeydiwo mixeni dollofita" hidi e oto. 4 Hinne yeragoy u gara mahutto axi taafo ta siido. Uddi be ommana ommana yese Isra'eelaxitaafa yeragoy u gara mahuttoositi xhiixe oyddi tamma oyddi kuma u maaqicha. 5 Yeragoy u gara mahuttoositi
Yuudaafa tamma lam'i kuma,
Roobeliyafa tamma lam'i kuma,
Gaadiyafa tamma lam'i kuma,
6 Aaseriyafa tamma lam'i kuma,
Naftaleemiyafa tamma lam'i kuma,
Minaasiyafa tamma lam'i kuma,
7 Simooniyafa tamma lam'i kuma,
Lewiyafa tamma lam'i kuma,
Yisakooriyafa tamma lam'i kuma,
8 Zabilooniyafa tamma lam'i kuma,
Yoosefiyafa tamma lam'i kuma,
yeydiwo Biiniyamiyafa yeragoy u gara mahuttoositi taafoy tamma lam'i kuma e maaqicha.
Booxi maa'o maadhese laga axiti gisha
9 Ye e geede hay ooneni taatti alsese danda'uwa iitana laga axita ta beedo. Usini be wude wude yese axitaafa uddi, be ommana ommana yese axitaafa uddi, be biyyana biyyana yese axitaafa uddi, be nuunana nuunana zeere axitaafa uddi kessasitako u maaqicha. Booxi maa'o maadhi be kuchiyakani iille washe ayti uttiya yese kaati burowara dori burowara ee'iya u yecha. 10 Be kato keddaysi
"Loolusey kaate maaddhi uttiya yese
nu Wontokofaara dorukofaarako e maaqe" yeydi u hicha.
11 Wonto woosaxitini be uddina kaati uttuxosaara cimitusaara yeydiwo oyddi en'a meddho googe ee'iya u yecha. Kaati uttuxi buro be deemona undi Wontose u disso. 12 Usini
"Ameen, nashoy, kuxa fuulay,
gaxi, galatay, kuxay, osay, boheyey
nu Wontose koolo makki aallo maaquwaye, ameen!"
yeydi u hido.
13 Cimitaafa bidzi hanke taako maaddhi "Ha booxi maa'o maadhese axiti ooniyaxhituni? Ayafani u yoodo?" hidi tamba e oycco. 14 Tanini "Laaxo! Nenko eresa" yeydi ta hido. Esini "Ha usiti iita maddhaanna gardi yoodasitako. Be maa'itani dori suuxunako shoti u bootusso. 15 Ye e gishako kaate maaddhi uttiya yesesi buro wonta qama Wonto Hayla Zawaaka u hante, kaati uttuxi gara uttesi u gidda yesine uso e kakke. 16 Ha e geede sekke naayuttuwasso, sazzuttuwasso, awway uso dheequwasso, suuley uso suulunguwasso. 17 Ye esini kaati uttuxi giddaa yese dori uso yeengesako e maaqe, u buro aadhini etti yeso inge waaxi tultowa e aange, Wontoni u aafushaafa aafunxe uddi e uce" yeydi e hido.