6
Dori goozutti yechashita birsho
1 Dori goozutti yecha laappi giddaafa bidzunxo goosse e birchushune ta beedo. Oyddi en'a meddhowafa bidzi hade googunxuke yese katona "Yoowwa!" hidi e hisune ta siido. 2 Hay booxi faradze ta beedo. E gara uttiya yesesini dhozze be kuchiya aykiya e yecha. Esuseni kuxase gadutticha gulley ingutto. Iichesha maaddhi iicheshe e kesso.
3 Dori goozutti yecha lakkunxo goosse birshoniyaka lakkunxo meddhoy "Yoowwa!" hidi e hisune ta siido. 4 Fede tamake zodhese faradzey e kesso. Ye faradze gara uttesesuse modhete ha saha garafa e ooxoronikiyara axiti wola alsoronikiyara mahese adetoy esuse ingutto. Yeydiwo malla satatani ingutto.
5 Dori goozutti yecha haysso goosse birshoniyaka haysso meddhoy "Yoowwa!" hidi e hisune ta siido. Hay faradze karxe ta beedo. Ye faradze gara uttesesi kaxa makkesa be kuchiya aykiya e yecha. 6 Oyddi en'a meddho giddaafa kato ta siidosa tamba e bissho. Ye ta siido katoni "Bidzi xhaasa gossay bidzi wonta hanta wooma, haydzi xhaasa bangay bidzi wonta hanta wooma maaquwaye. Zaytiyara weyniyarama dollofuna" hidi e hisune ta siido.
7 Dori goozutti yecha oysso goosse e birshoniyaka oysso meddhoy "Yoowwa!" hidi e hisune ta siido. 8 Hay bidzi caametta faradze ta beedo. Ye faradze gara uttichashini haybo e sungicha. Si'ooleni e geede geedeydi hangicha. Haybowara Si'ooliyaray ha saha gara yese assaafa oysso kuche toorana, naayena, iita hargena, saha gara yese bo'ona u wodhoronike adetoy ususe ingutto.
9 Dori goozutti yecha ichicho goosse birshoniyaka Wonto kato be oto gishaara esuse ato be maaddho gishaara wodhuttecha axiti leemoy kaasha e gara kaashushooshi oomo yesune ta beedo. 10 Usini keddaydese katona "Uddi base ne oomo ahe haylaara aadaxaara maaqe Laaxo! Ayde aalloni ha saha gara yese axiti gara ne yaa'uwaane? An wonte aalloni nu suuxi gano ne kessuwaane?" yeydi u hido. 11 Ye e geede u bidzi bidzise booxi maa'oy ingutto. Ususeni "Hinuke Wonto maalita maaqe saha gara yese fede haga wodhuttese yese hinindo nayshi hade hinuni wodhuttonike wodhutti u taafoy kumoro makko kaxe efiya hi yesenike oddhe woggase decuwayte" yeydi u hiyutto.
12 Ye e geede dori goozutti yecha izzunxo goosse birshoniyaka orjena sahay en'usune ta beedo. Qoossi hade karxi maa'oke e kar'o. Agunnani be kumena hade suuxuke e zodho. 13 Keddaydese agexi mixe sekke hanke jhiggete kaxxho baa qum'ay mixi garafa hade gukkenike afaaka yecha xhoolintey sahaa e gutto. 14 Afay hade harfa gara maa'o xhaaxhonike xhaaxhutti e gardo. Bakkitaara dhaanitaaray be bidzi bidzina be godo u datto. 15 Ye e geede ha saha gara yecha kaataxhiyara afana maagitaaray toorase durkichashitaaray, wodumitini, osaxitini, maalitaara maala maaquwasitaaray googgitaakaara bakkita yese shuchi qoosshitaakaara u aachunto. 16 Bakkitaara shuchi mallitaara "Kaatese uttesesi burowafaara dori huulaafaara nu gara undi numba aachuwayte! 17 Keddaydese u huula wontay yoodi yese gisha be qino maarese ooni danda'esa?" yeydi u hido.