5
Fissharo do'ese bisheshi doruko
1 Kaati uttuxo gara utti yesesi wudenani maaqqe zawana diizuttesesa laappi wogga goozesoosa xhaaxhuttese fissharo be oshichi kuchena ayti e yesune ta beedo. 2 Bidzi osaxe maaqe Wonto woosaxe ta beedo. Esini keddaydese katona "Goozuttese goossita birchesheni maaqqe fissharo do'ese bisshesheshi oonena?" yeydi e hido. 3 Afaakani maaqqe sahaaka sahase e oomona fissharo do'ese oo'oyne dodhi beyese bisshesheshi ooneni badiko yecha. 4 Tanini fissharo do'ese oo'oyne dodhi beyese esuse e bisheshi ooneni badi yecho gisha iitana ta yeetto. 5 Ye cimitaafa bidzi taako "Yeetofuna! Hay, e ommay Yuuda maaqe garmay Dawite xhabhoy iisshiko e yese. Esi fissharo do'esaara laappi wogga goozesoosa bircheshaara danda'ako e danda'e" yeydi e hido.
6 Ye e geede ye kaati uttuxosaara ye oyddi meddhitusaara u giddaa cimituseni u feeqaa shufuttase bishe dori ee'usune ta beedo. Ye dori laappi ushumiyara laappi aafiyarako e keengicha. Ye usini ha saha gara uddi anxutta laappi Wonto Ayaanitako. 7 Dori yoodi kaati uttuxo gara uttiya yechashi oshichi kuchiyafa xhaaxhuttese fissharo e etto. 8 Ye fissharo e ettoniyaka oyddi meddhitaara lam'i tamma oyddi cimitaaray dori buro be deemona u undo. Be bidzi bidzina zimbe bishaara haylaxiti shi'e maaqe ixhaanena kundi yese worqe sanqiyara be kuchiya ayti u yecha.
9 Usini kille zingale zingalisine
"Ne shufutto gishaara ne suuxuna
axi be ommana ommana yesesaafa uddi,
be nuunana nuunana zeeresaafa uddi,
be biyyana biyyana yesesaafa uddi,
be wude wude yese assaafa uddi,
axita Wontose ne wozese gishaara
fissharo etti laappi godowa goozuttesesa
etti birchey neese bishako e bishe.
10 Nu Wonto kaatetowaka gelli
kahinita maaddhi u hantoronike matiko ne yese.
Usini ha saha garako u kaate" yeydi u zingallo.
11 Ye e geede assi ta beesune laga kumanaara aaca boocokeydi taabuttese danda'uttuwa Wonto woosaxiti kato ta siido. Usini kaati uttuxusaara oyddi meddhitusaara cimituseni u googiya gooddi u yecha. 12 Keddaydese be katona
"Shufutta doruse adetowara woduntiyaray,
gaxaara osaaray, kuxaara fuulaaray,
galataaray esuse bishako e bishe" yeydi u zingallo.
13 Ye e geedeni afaakani maaqqe sahaaka, sahase e oomoni maaqqe bagadiyani ye usittaa yese meddhoy uddina
"Kaati uttuxo gara uttesesusaara
dorusaara galataara fuulaaray,
kuxaara osaaray koolo makki aallo maaquwaye"
yeydi u zingalusune ta siido.
14 Oyddi meddhiti "Ameen!" hidi uydo, cimitini be deemona undi u disso.