4
Wontoy essa yese godowara waakeydi e kuxuttesaara
1 Ye e geedeni hay afaaka do'uttese suma ta beedo. Bidzi zeerusune ta siido. Esini buro taa zeerusecha hade marachi katoke yesesa e maaqicha. Esini "Yoodi hana haya kesuwa! Ha e geede maaqe abakitako nemba ta beyse" yeydi e hido. 2 Yenniyawo Wonto Ayaanay tamba haraje ta beyoronike e mato.
Afaaka kaatuwoy e gara uttichosha ta beedo. Ye e garani uttesi e yecha. 3 Ye uttuxo gara uttichashi bishay hade e woomay keddaydese seelose maaqe shuchiti iyasphidiyara serdesiyaray faqenike e faqicha. E uttesi googe maragadeke laci lacidi faqe iraxhi maashay e yecha. 4 Yeydiwo ye kaati uttuxo googiya lam'i tamma oyddi kaati uttuxiti u yecha. Ye uttuxiti gara booxi maa'o maadhi yese u qinowa worqiyafa naquttese kuxase gadutte gulley gaduttese lam'i tamma oyddi cimiti uttiya u yecha.
5 Ye uttuxowafa zeelunxini, didunxini, googunxini e kesso. Ye uttuxo buro laappi toompey faqiya e yecha. Ye laappi toompeni laappi Wonto Ayaanitako. 6 Assini ye uttuxo buroni hade daw'atake maaddhese orjena geejheshe bagadeke hidesesi e yecha.
Buronani geedenani aafey u gara kundese en'a meddhiti oyddi kaati uttuxo googe oyddi badena u yecha. 7 Bidzunxo meddhoy garma e bishicha, lakkunxo meddhoy maydo e bishicha, haysso meddhoy axi aafusha bishe aafusha e keengicha, oysso meddhoy hamiya yese kooke e bishicha. 8 Ye be bishana bishana yese oyddi meddhiti be bidzi bidzina izzuppi fange fange u keengicha. Wudenani zawanani aafey kundesesa u maaqicha. Wonta qama
"Hayla, hayla, hayla,
yechayo, yeseyo, yooneyo
uddi base danda'e Laaxe maaqe Wonto!"
yeydi burse baaka hiya u yecha.
9 Ye meddhiti kaati uttuxo utti koolo makki aallo en'a maaddhi yesesuse e kuxa fuula keddaysi u nashicha, u kuxicha, u galaticha. 10-11 Ye woggaa lam'i tamma oyddi cimiti kaati uttuxo gara uttesi buro deemona undi koolo makki aallo en'a maaddhi yesesuse
"Nu Laaxo nu Wonto! Uddi abakoko ne meddho.
Uddi abakoy e meddhuttosaara yeso e degessosaaray
neni 'Maaquwaye!' yeydi ne hineko.
Ha e gisha kuxaara kuxa fuulaara osaaray
neese maaqese bishako e bishe"
hidi hissine be qinowa kuxase gadutte be gulle ye kaati uttuxo buro gaddi u dissicha.