3
Sardeese yese Wonto zawaxituse anxutta woosso
1 Sardeese yese Wonto zawase maaqe Wonto woosaxuko ha ta ohesa diizuwa:
Laappi Wonto Ayaanitaara laappi xhoolintiyara keengesi ohesi ha esako. Ye esini
'Ne hanta erako ta ere. "En'ako e yese" yeydiko ne hiyutte. Yeydi hiyuttuwa baaka haydhiko ne yese. 2 Yoonase, birkuwa! Ne hanta ta Wonto buro facete keenguwasa mati ta degesso baa gisha haybese uddhese atta basita minxuwa. 3 Aba bisha erunxe ne ettesenikiyara ne siidesenikiyara gaxhuwa, esuna hantuwa, ne cubbo dhaddi maaquwa! Birti kafe ne dheeba'aykoma hade kaysokeko ne erdo baanne ta yoone. Aba wogga neeko ta yoonesa fetto eruwannako. 4 Yeydi e maaddhakoni oddhe geritako neera wolko Sardeese be maa'o tunusso baasiti yesa. Taara hamese bissheshesha u maaqe gisha booxi maa'o maadhiko taara wolko u hange.
5 Iishashi hade usukeko booxi maa'o e maa'e. E sunxeni en'a yeseesiti sunxi essaaka diizutte yeso fissharowafa ucci ooxuwasso. Tanini nuwade burowara afaase e woosaxiti burowara "Esi taasuko" hidiko ta hine.
6 Ayaanay be godowa godowa yese Wonto zawaxituse ohesa washe keengesi naddhi siwwaye' yeydiko e hine.
Filadelfiya yese Wonto zawaxituse anxutta woosso
7 Filadelfiya yese Wonto zawase maaqe Wonto woosaxuko ha ta ohesa diizuwa:
Haylaara aadaxaara maaqe Dawitese maaqicha suma do'esa be kuchiya ayti yesesi e do'esa ooneni ayxuwasi, e ayxesa ooneni do'uwasi ohesi ha esako. Ye esini
8 'Ne hanta erako ta ere. Hay, ooneni ayxese danda'uwa do'uttese sumako ne buro ta gaddese. Ne osay oddhe e maaqenike erako ta ere. Oddhe e maaddhakoni ta otosa kattiko ne yese. Tambani "Tani esa eruwasso" yeydi hidi ne geede maaddho baannako. 9 Yoonase Ayhudaxita maaddho badi yesine "Nuni Ayhudaxitako" yeydi hineesita Humbaye bade maaqe zaadaxita yoodi ne toke buro u ungoronike uso mahoko ta mahe. Tani nemba eehenike u eroronikeko ta mahe. 10 "Danda'uwa!" yeydi ta hidosa ne katto gisha tanini ha saha gara yeseesita uddi naadhi beyese ha saha gara yoone maddha woggaaka nemba kafako ta kakke.
11 Yebo, ukkeko ta yoone. Ne iisshine neese ingutte moore ooneni ekkuwannike ne keengesa minsi aykuwa. 12 Iishashe ta Wonto Hayla Zawaaka biddoko ta mahe. Yahafa fetto kesuwasso. Ta Wonto sunxaara, kille ta sunxaara yeydiwo ta Wonto katamaa sunxaarako e gara ta diize. Ye katamani afaafa Wonto da'aafa hodhe kille Yerusaleemeko.
13 Ayaanay be godowa godowa yese Wonto zawaxituse ohesa washe keengesi naddhi siwwaye' yeydiko e hine.
Lodoqiya yese Wonto zawaxituse anxutta woosso
14 Lodoqiya yese Wonto zawase maaqe Wonto woosaxuko ha ta ohesa diizuwa:
Ameen maaqe be eetonikewo aade ohesaara aade ato zeeresaara maaqe Wontoy meddhoy uddi e badenawo meddhuttesi ohesi ha esako. Ye esini
15 'Ne hanta erako ta ere. Toydesesani mishesheshani maaddho baannako. Micha oo'oyne toyya ne maaddhesako fetto modheko e maaqicha. 16 Toyya oo'oyne micha maaddho badi yesine qelbez hidesesa ne maaqe gisha ta asshaafa nemba cutesuko ta hine.
17 "Tani wodumako, laga wodunteko ta keenge, taase faceshe basi baasso" yeydiko ne hine. Yeydi hiwwa baaka shoqeydesesa, higilsesa, jhi'o, bal'a, gundusesesa ne maaqenike eruwannako. 18 "Ne wodungoronike tamaaka gelli geejheshe worqeni maaqqe borsuse ne gunduse ne fashoronike booxi maa'oni yeydiwo beyese ne danda'oronike ne aafe esuna ne tishe dhale ta garafa woonguwa" hidiko neese ta ohe. 19 Tani ta eeheesita uddi gaylako ta gayle, murako ta mure. Ye e gisha bidzi muxhurona hantuwa, ne cubbo dhaddi maaquwa!
20 Hay, sumaaka eedhi gasa hi do'orosa xheygiyako ta yese. Ooneni ta kato siidi gasa do'o'ayko esuko gelliko esaara wolko qamete ta muune, esini taara wolkoko e muune. 21 Tani iisshi nuwadiyara wolko utti kaattonikeko iishashi taara wolko utti e kaatoronike ta mahe.
22 Ayaanay be godowa godowa yese Wonto zawaxituse ohesa washe keengesi naddhi siwwaye' yeydiko e hine" hidi e hido.