17
Eruttese zaakoyndo maaqe indo gisha
1 Laappi quule be kuchiya aytese laappi woosaxiti giddaafa bidzi taako yoodi "Yoowwa! Laga waaxiti gara uttese eruttese zaakoyndo maaqe indo gara yaa'utte yaa'ako nemba ta beyse. 2 Ha saha gara yese kaataxhey isaara wolkoko u laggetto. Ha saha gara yeseesiti weyne daana usshi goojheshenike isaara laggetenako u goojjho" yeydi e hido.
3 Ye e geedeni Wonto Ayaanay harajena ta beyoronike taa mati yesune ye woosaxi tamba saha melaa etti e aando. Yaakani Wonto cashe sunxiti e gara diizuttese zo'o bo'o gara utte indo ta beedo. Ye bo'oni laappi qinowara tammi ushumiyara e keengicha. 4 Ye indoni suuxe bishe maa'owara hade zodhaankeydese maa'owara maadhi i yecha. Assini worqenaara be bishana be bishana yese kuxuttese shuchunaara naquttese seelo be gara gussi waardi i yecha. Be kuchiyani worqiyafa hantuttese essaa ushusho miijhe i aytecha. Ye miijhiyakani darri hisse abakowara i laggetowafa bente tunaaray kundi e yecha. 5 I deemowani "Orje Babiloone, uddi zaakoynditusaara saha gara darri hisse abakitusaara indo" yeydi hine aachuttese birche keenge sunxi diizutti e yecha. 6 Ye indoni haylaxiti suuxunaara Yesuusa gisha be otosuna haydhaasiti suuxunaara goojjhi i yesune ta beedo. Iso ta beedo woggaa iitana ta micco.
7 Ye e geedeni woosaxi tamba "Ne miceshi abasuna? Ha indosaara ha indoy e gara utte laappi qinowara tammi ushumiyara keenge bo'osaara eruttese danda'uttuwa u bircheko neese ta ohe. 8 Ne beedo bo'oy buro yesako e yecha, hattema baasso, hannina biixi bookowafako e kese. Dhaddi be baane godowako e hange. Ha sahay meddhuttosafa ayti u sunxiti yeso fissharowa diizutto baasiti ha saha gara yeseesiti bo'oy olo yechashe hattema baasa, hannina yoonesa e maaqesa be beene gisha micako u mice.
9 Ha esa erese gaxe keenge kaheko e worguse. Laappi qiniti ye indoy u gara uttese laappi bakkitako. Yeydiwo laappi kaataxheko. 10 Ichichi kaatiti kaatti gardiko yese, bidzi kaatuko hatte yesa, feday assi bidzi kaati buro gara yootako e yoone. Ye esi be yooneniyaka oddhe woggasewo deceko esa e worguse. 11 Olo yechashaara hatte baasaara maaqe ye bo'oy beese hazzunxo kaatuko. Esini laappukaafa bidzoko. Dhaddi be baane godowako e hange. 12 Ne beedo tammi ushumiti hatte aallo kaatto badi yese tammi kaataxhitako. Hatte aallo kaate dheeddakoni oddhe woggase bo'owara wolko be kaatoronike kaatese adeto efako u ekke. 13 Ye tammi kaataxhiti wol bisha maxoko u keenge. Usini be osani maaqqe be adeto bo'osuko garsi u inge. 14 Dori gara toora densiko esaara u dargutte. Darguttuwaye baaka dori laaxitume Laaxaara kaataxhituse u kaataara be maaqe gisha uso iichako e iiche. Esaara wolko yeseesiti e xheydositaara e xhardositaaray e garafa be geede maaddho baasiti esaara wolkoko u iiche" yeydi e hido.
15 Afaase woosaxini taako "Laggetichanni e gara uttusune ne beedecho ye waaxitini be biyyana biyyana yese axita, be wude wude yese axita, be nuunana nuunana zeere axita, iitana laga axitako. 16 Bo'owara ne beedo tammi ushumitaaray laggetichanniyo inxha'ako u inxha'e. Abako keenguwasaara gundusiyarako iso u dakke, i achoko u muune, tamanani iso u megge. 17 Be maxo bidzo mahena be kaateto ye bo'ose ingena 'Maaquwaye!' hidi Wontoy hidosa u alsoronike ye be maxo u muxhurowa gaddasi esako.
18 Ne beedo indoy ha saha kaataxhe gara kaatiya yese malla katamako" yeydi e hido.